iToko ni iTabagone ni 2025
7 Na Sala mo Rai Kina vei Karisito
Tovolea na veiitovo oqo mo vagolea kina na matamu vua na iVakabula.
Na bulataki ni itoko ni itabagone ena yabaki oqo —“Rai vei Karisito”—ena tiko kina na bolebole. O na rai vakacava vua e dua e sega ni tiko vakayago? Tekivu ena vitu na veiitovo oqo.
1. Nanuma Nio Koya E Sega Ni Vuni Tiko
Io, sa dodonu mo vakasaqarai Koya. Ia o Koya e vinakata me kunei! E sega ni qito ni veivuni. E gadreva vakalevu na Turaga me vakalougatataki iko—ia oqo na ka dina, ena marau kina o Koya (raica na Vunau kei na Veiyalayalati 41:1). E sega ni vaqara o Koya eso na vuna mo vakuwai kina. Kena veibasai: E dau segata tikoga o Koya me vakalougatataki iko. Me vaka e vakavulica o Elder Patrick Kearon ena Kuoramu ni iApositolo Le Tinikarua, “E sega, [na iVakabula] e sega ni biuta na ilatilati se itatarovi; e vagalalataka o Koya. E sega ni biuti iko tu e tautuba; e kidavaki iko i loma. Na Nona gauna ni veiqaravi sa ivakadinadina bula ni inaki oqo.”
2. Tusanaka na Nona Veivakayarayarataki ena Nomu Bula
E marautaka na Turaga nida “vakatusa na ligana ena ka kecega” (Vunau kei na Veiyalayalati 59:21). Mo vakadeitaka mo tusanaka na Nona veivakayarayarataki ena nomu bula! Vakavinavinaka Vua ni vinaka tiko na veika kece vei iko ka vakasaqara na vakacegu kei na kila-ka ni sega ni vakakina.
3. Vakavinavinakataka na Veika E Tu Vei Iko
Me salavata kei na nomu tusanaka na veivakayarayarataki ni Turaga ena nomu bula, e bibi talega mo vakila—ka vakaraitaka—na vakavinavinaka. O na sega beka ni “raica” vakayago na iVakabula, ia ena rawa nio raica na Nona veivakalougatataki ena nomu bula! E kaya o Elder Gary B. Sabin ena Vitusagavulu, “Ena veiraurau vinaka na nomu marau kei na ilevu ni nomu vakavinavinaka.” Vakavinavinakataka vua na Turaga na nomu vakalougatataki e veisiga. Nio vakila na yalolailai, muria na ivakasala ni sere makawa: “Nomu kalougata mo wilika ga; loloma levu ni noda Turaga.”
4 Masu E Veisiga
Ona rawa ni “raica” vakavinaka cake na iVakabula ena loma ni siga taucoko kevaka o tekivu ena nomu vosa vua na Tamada Vakalomalagi. Kerei Koya me vukei iko mo nanuma tiko na iVakabula ka raica na Nona veivakayarayarataki ena nomu bula. E rawa nio masu ena kena levu ga o vinakata ena loma ni dua na siga. Ni bera na moce, masu tale mo tukuna vua na Tamada Vakalomalagi na veika a yaco. Ena sega vakadua ni vakacauoca me rogoci iko!
5. Cavuqaqataka na iVolanikalou kei na Sere ni Lotu
E dua na sala mo vakanamata tiko kina vei Jisu Karisito o ya mo katona ki na nomu vakanananu edua na tiki ni ivolanikalou taleitaki se na qaqa ni dua na sere veilaveti. Vakatovotovotaka mo nanumi ira lesu nio vakila nira basika mai na veivakanananu ca. E vakavuqa ni nanumi lesu (ka lagati lo) na ulutaga ni dua na serenilotu ena rawa ni veirauti me vagolei donu na nomu vakanananu: “Au luve ni Kalou.” “Au Rai Vei Kemuni.” “Na yaloqu mo vakanomodi.”
6. Raica na iYaloyalo ni iVakabula
Raica eso na iyaloyalo ni iVakabula o taleitaka, ka biuta ena vanua ona raici ira kina vakawasoma. Ena rawa ni oka kina na lalaga ni nomu rumu ni moce, nomu iloilo ni valenisili, nomu loka e koronivuli, se iyaloyalo ena sikirini ni nomu kompiuta se ena nomu talevoni.
7. Raica na Vuravura e wavoliti Iko tu
E sa totoka! Ka cakava na iVakabula ena vukumu (raica na Vunau kei na Veiyalayalati 14:9)! E sega ni kilai edua na vuna me a totoka kina na irairai kei vuravura. De dua a rawa nida vakayagataka na bula oqo ena dua na vuravura e tautauvata, sukuwea, ka roka dravu. Ia na iVakabula a bulia e dua na vuravura “me yaga vei ira na tamata, me reki kina na mata ka marau kina na yalo” (Vunau kei na Veiyalayalati 59:18). Ena dua tale na kena itukutukuni, e totoka na vuravura baleta ni veika totoka e vakavuna meda marau. Kevaka o vinakata mo nanuma na iVakabula, rai wavoki ga.