Vakadikevi ni Noqu Taro me Baleta na iTukutuku Makawa ni Lotu

Ena noqu kalasi ni itukutuku makawa, a tekivu me talanoataka o noqu qasenivuli Na Lotu i Jisu Karisito ni Yalododonu Edaidai. E a sega ni vakacerecerea o koya na Lotu. E a kaya ni o keda eda vakatara me levu na watida ka dau cati ira na veimatatamata tale eso.

Na veika kece au a vulica taumada me baleta na Lotu sa vakaibalebale sara vei au. Ia na veika au sotava ena kalasi a vakavuna meu nanuma mai eso na taro dredre mai na itukutuku makawa ni Lotu, me vakataka na vuna era sega ni vakatarai kina na tamata loaloa mera taura na matabete ena dua na gauna, kei na vuna e yaco kina na vakawati vakalewelevu.

Ena vuku ni ka oya, au a tekivu vakatataro, vakasama vakatitobu, ka masu. Au a wiliwili mai na ivolanikalou, veivosaki kei rau noqu itubutubu kei ira na iliuliu, ka vulica e levu tale na ka vakai au. Dina ga ni a tiko na noqu taro, ia au a sega ni via soro se tu vakasuka.

Niu vuli kau kila eso na ka, a vaka meu vakila na veivuke vakalou. E se sega tikoga ni matata vei au na veika kece, ia a rawa meu kune vakacegu.

Ia oqo ni tiko na noqu taro, au taura matua tu na veika au sa kila oti, me vakataka na veika kece au sa sotava ka sa vukea na tubu ni noqu ivakadinadina. Niu sotava edua na bolebole, na masu e imatai ni ka au cakava, kau qai tovolea meu vakarorogo ki na Yalotabu niu wilika tiko na ivolanikalou.

Ena yabaki se qai oti oqo, au sa mai kila vakaidina kina na kaukauwa ni Yalotabu, kei na vakacegu na veivakacegui kei na loloma. Au kila ni tiko dina edua na Kalou edau vosa vei keda ka vinakata meda lesu tale i vale.