Tara Vale kei na iVakadinadina
E a cici vinaka tiko na bisinisi ni tara vale nei Sarah. Ia a tiko edua na vakatulewa me cakava.
iTaba mai vei Christina Smith, vakavo ke tukuni
Vei Noah, a tiko na digidigi me tara edua na waqa. Vei Tui Penijamini a tiko na digidigi me tara edua na vale cecere. Vei Taci Jereti a tiko na digidigi me tara eso na waqa. Kei Sarah Christensen mai Montana, Amerika? Io, a nanuma o koya ni vinakata me tara vale.
O Hermana Christensen, ka daukaulotu tudei tiko oqo ka veiqaravi tiko ena tabana ni kaulotu na Minnesota Minneapolis Mission, e a cudru vakalailai ena dua na gauna ni a vakataotaki vakalailai na nona ituvatuva me dau tara vale ena vuku ni kaulotu—ka sega mada ga ni nona kaulotu!
Meda tekivu mada ena kena itekivu.
“Au a dau vukei tamaqu tiko mai ena tara na veika eso ena noqu bula taucoko,” e kaya o koya. “Au kila vinaka sara na vakayagataki ni iyaya ni cakacaka vakalivaliva kei na taravale, kau tubu cake meu taleitaka. Niu sa yabaki 16, au a nanuma meu tekivutaka edua na noqu bisinisi ni tara vale.”
“A vakavulici au o tamaqu meu dau semata vata na ka, mai na rua na papa ki na dua na vale taucoko,” e kaya o Sarah.
Tekivutaki edua na Bisinisi
A vakavouya taumada o Sarah edua na vale ena vulaikatakata ni dua na yabaki. A taleitaka vakalevu ka mani taura edua tale na cakacaka ni vakavoutaki vale ena yabaki ka tarava. E muri, a nanuma me cakava edua na cakacaka e levu cake—e dua na vale me “volitaki”, se dua na vale ka na tara me tekivu mai na kena yavu me yacova ni sa tara oti, ka volitaka me rawa tubu kina.
Siga ni basu vale! E a basuka tiko o Sarah edua na valenisili ena itukituki ena dua na nona vanua ni cakacaka.
E sega ni rawarawa na tekivutaki ni dua na bisinisi, vakabibi ni se vakaogai tiko o Sarah ena vuli torocake kei na veitaucici e loma ni vanua.
A tekivuna o Sarah na nona kabani ni taravale ni sa yabaki 16.
“Au sa vulica e levu sara na ka,” e kaya o koya. “Au dau vakayagataka na jeke meu veisaumitaki ira kina na tamata, kau se bera ni bau cakava e liu. A dodonu meu dau logalogavinaka niu vosa vei ira na vulagi ka ra dau konitaraki vei au. Au sa vulica talega na sala meu walia kina na lomaocaoca ni cicivaki ni dua na kabani, ka sega ni ka ni lasa. E dau tu ga na lomaleqa nio na sega ni rawata na tubu e gadrevi ni sa volitaki oti na vale.”
Sega ni Tiko Duadua
Ia e dina ga ni tu na lomaleqa kei na lomaocaoca ka salavata kei na cicivaki ni dua na bisinisi, e a sega ni sotava duadua o Sarah na nona tatadra lelevu.
“E dau rawati vinaka, kau kila ni oqori ena vuku ni Turaga,” e kaya o koya. “Na bisinisi oqo ena sega ni rawa ke sega o Koya. A vukei au o Koya ena gauna ca, ni kaukauwa na cakacaka, kei na veika kecega.”
Na veiwekani voleka nei Sarah kei na nona matavuvale e vu mai na cakacaka vata.
Na matavuale nei Sarah eratou dau tokoni koya talega ena veigauna kece—ka kauti keda lesu ki na kaulotu ka a vakataotaka tiko na nona ituvatuva.
A navuca o Tyler na tuakana me vukei Sarah me tara edua na vale ni lesu mai o koya mai na nona kaulotu. Ia ena dua na siga, a qiriti koya o tuakana ena itukutuku ni a kerei vua me tosoya tale na nona veiqaravi vakadaukaulotu.
“Au a cudruvi koya sara vakalevu,” e kaya o koya. “Au a kaya, ‘Tyler, e sega ni rawa nio ciqoma qori. Au sa tuvanaka oti tu na ka oqo.’ A qai kaya o koya, ‘Na cakacaka ni Turaga e bibi cake mai na nomu cakacaka.’ A tarai au sara ga na ka oya. Au kila ni a dina o koya ka dodonu meu nuitaka na ituvatuva ni Kalou.”
Eratou a kidavaki Tyler na matavuvale nei Sarah ki vale ni oti na nona kaulotu.
iTaba iloloma mai vei Sarah Christensen
Se vukei koya tiko o tamana se o Tamada Vakalomalagi, e kila o Sarah ni sega ni tiko duadua.
Nona Kaulotu Vakaikoya
Na ivakaraitaki nei Tyler e a vakauqeti Sarah me tekivu vakasamataka na nona veiqaravi vakadaukaulotu vakaikoya. “A yaco meu kila na levu ni tamata a vukea o tuakaqu mera lako mai vei Karisito, kau raica talega na levu ni nona voleka vei Karisito vakaikoya. Au a vinakata meu sotava talega na veika vata oqori,” e kaya o Hermana Christensen. “Au a tekivu vulica vagumatua na kosipeli kau raica ni kena levu ga na tubu ni noqu ivakadinadina kei na noqu veiwekani kei na noqu iVakabula, na levu tale ga ni noqu via wasea na veika e tu vei au.”
A digitaka o Sarah me tu vakawawa tu na nona bisinisi ni taravale me qarava na Turaga. Na digidigi oqo e solia vua eso na raititobu vou mana.
“Na ka e vakavulica taumada vei au na noqu kaulotu sai koya ni kosipeli e veisautaka vakadua na bula,” e kaya o Hermana Christensen. “Na susugi cake ena Lotu a dredre kina vei au meu raica na bibi ni kosipeli ena noqu bula.
“Eke ena noqu kaulotu, au sa vakavolivoliti tu mai vei ira na tamata era sega ni kila na Tamada Vakalomalagi kei Jisu Karisito. Nira kila nira sa luve ni Kalou ka sa tiko na Nona ituvatuva me baleti ira, e veisautaka na nodra bula. Sa ka totoka duadua meda vakadinadinataka ka vakaitavi kina. Au a kila vakavinaka oqori ni bera na noqu kaulotu, ia oqo au sa kila ni kosipeli i Jisu Karisito sa ka bibi sara ki na reki ena vuravura oqo kei na vuravura sa bera mai.”
O Hermana Christensen (imatau) kei na nona itokani o Hermana Taylor (imawi) erau taleitaka merau veiqaravi ena sala cava ga erau rawata.
iTaba iloloma mai vei Sarah Christensen
Vakabauta Mai Na Rere
Kivei ira tale eso na itabagone era vakasamataka tiko mera laki kaulotu, e kaya o Hermana Christensen, “Mo vakabauta ka kakua ni rere. E sega ni rawarawa na kaulotu, ia e yaga dina. Ena vakalougatataki iko na Kalou ena sala e sega ni vakasamataki rawa ni o vakatulewataka mo dua vei ira na Nona italai.”
E dina ga ni rarawataka na nona sega ni rawa ni tara vale ni veiqaravi tiko, e sega ni veivutunitaka o Hermana Christensen na nona digidigi. “E dina sara, ni a rawa ni tubu na noqu bisinisi ena gauna au veiqaravi tiko kina vaka daukaulotu tudei,” e kaya o koya. “Ia au kila ni na vakalougatataka na Turaga na noqu solibula ni biuta tu mai vakalailai. Sa rawa me wawa na noqu bisinisi, ia na cakacaka ni Turaga ena sega ni rawa ni wawa!”