Ntukirengagize Impuhwe Zawe Bwite

Umwarimu w’ishuri yigeze kwigisha ko n’ubwo balene ari inyamabere nini cyane idashobora kumira umuntu kubera ko balene zifite umuhogo muto. Umukobwa umwe yarabihakanye avuga ati: “Ariko Yona yamizwe na balene.” Maze umwarimu aramusubiza, ati: “Ibyo ntibishoboka.” Uwo mukobwa ntiyanyuzwe, maze aravuga ati: “Ubwo nzagera mu ijuru, nzamubaza.” Umwarimu amubaza amuseka ati: “Yona se abaye yari umunyabyaha akaba ataragiye mu ijuru?” Uwo mukobwa aramusubiza ati: “ubwo rero, ushobora kumubaza.”

Turaseka, ariko ntidukwiye kubura ububasha inkuru ya Yona iha “ushakisha ibyishimo yiyoroheje,” cyane cyane abo bari mu ngorane.

Imana yategetse Yona “[kujya] i Nineve” kubatangariza ukwihana. Kandi Nineve yari umwanzi ukomeye wa kera wa Isirayeli, bityo rero Yona yahise yerekeza mu kindi cyerekezo, akoresheje ubwato, agana i Tarushishi. Ubwo yagashyaga ahunga umuhamagaro we, hateye umuyaga ukaze cyane. Birumvikana ko ukutumvira kwe ari ko nyirabayazana, Yona yiyemeza kujugunywa mu nyanja. Ibi byatumye inyanja irimo umuhengeri mwinshi ituza, birokora abo bari kumwe mu bwato.

Mu buryo bw’igitangaza, Yona yarokotse urupfu igihe “ifi nini” Nyagasani “yateguye” imumize. Ariko yamaze iminsi itatu mu mwijima ukabije kandi uteye ishozi, kugeza ubwo yaje kurukwa imusozi. Maze yemera umuhamagaro we wo kujya i Nineve. Ariko kandi, igihe abo muri uwo mujyi bihannye maze bakarokoka kurimburwa, Yona arakazwa n’impuhwe zigiriwe abanzi be. Imana yihanganira Yona imwigisha ko ikunda abana bayo bose kandi ko ishaka kubarokora bose.

Mu gukora amakosa inshuro zirenze imwe mu nshingano ze, Yona atanga ubuhamya bugaragaza ko mu buzima bupfa, “bose baraguye.” Akenshi ntabwo tuvuga ubuhamya bw’Ukugwa. Ariko kuba dusobanukiwe inyigisho tukagira n’ubuhamya bwa roho bw’impamvu buri wese muri twe ahangana n’ibigeragezo mbonezamuco, iby’umubiri, n’iby’imimerere ni umugisha ukomeye. Hano ku isi, ibintu bibi kandi bidashimishije biraba, kandi byose “nti[bi]shyikira ubwiza bw’Imana.” Ariko iyi mimerere yo mu buzima bupfa ni ingaruka z’amahitamo ya Adamu na Eva kandi ni ishingiro ry’impamvu nyayo turiho: “kugira ngo [du]shobore kugira umunezero”! Nk’uko ababyeyi bacu ba mbere babyigishijwe, twabona ibyishimo nyakuri ari uko gusa dusogongeye ku busharire ndetse tukumva uburibwe bw’isi yaguye.

Ubuhamya bw’Ukugwa ntibwitwazwa ngo habe icyaha cyangwa ngo herekanwe imyifatire idahwitse ku nshingano za buri muntu mu buzima, busaba buri gihe umwete, ingeso nziza, no kubazwa inshingano. Ariko bugomba kuturinda gucika intege igihe ibintu bibi bibaye, cyangwa igihe tubona ugutakaza imbonezamuco k’ugize umuryango, inshuti, cyangwa umuyobozi. Akenshi ibintu nk’ibi bidutera kwishora mu byo kunenga abandi cyangwa kubagirira inzika bitwambura ukwizera kwacu. Ariko ubuhamya bukomeye bw’Ukugwa bushobora kudufasha kurushaho kumera nk’Imana nk’uko byasobanuwe na Yona, “kugira impuhwe, gutinda kurakara, kugira neza cyane” kuri bose, natwe ubwacu turimo, mu kudatungana kwacu kutakwirindwa.

N’ubwo inkuru ya Yona igaragaza ingaruka z’Ukugwa, nanone ituyobora bikomeye ku Mana ishobora kuturokora muri izo ngaruka. Ukwitanga kwa Yona kugira ngo arokore abo barikumwe mu bwato mu by’ukuri bigaragaza ko yabaye nka Kristo. Kandi inshuro ebyiri zose igihe Yesu yasabwaga ikimenyetso cy’igitangaza kigaragaza ubumana Bwe, yasubije mu ijwi rikomeye agira ati “nta ikimenyetso kizatangwa … keretse ikimenyetso cya Yona,” avuga ko nk’uko Yona yamaze “iminsi itatu n’amajoro atatu mu nda ya balene, ari nako n’Umwana w’umuntu azamara iminsi itatu n’amajoro atatu mu nda y’isi.” Nk’ikimenyetso cy’igitambo cy’urupfu rw’Umukiza n’ukuzuka mu ikuzo, Yona ashobora kuba yari afite inenge. Ariko kandi, icyo ni cyo kigize ubuhamya bwe bwite no kwiyegurira Yesu Kristo, byatangiwe mu nda ya balene, bibabaje ariko bitera imbaraga.

Ugutakamba kwa Yona ni uk’umuntu mwiza uri mu bizazane, kandi ahanini akaba ariwe wabyiteye. K’uwera, mu gihe ibyago bitewe n’akamenyero kabi, amagambo, cyangwa umwanzuro mubi, n’ubwo yaba yari afite izindi ntego nziza nyinshi kandi akagira umuhate wo gukiranuka, bishobora kumubabaza mu buryo bwihariye kandi bigatuma yumva atereranywe. Ariko kandi uko ibyago duhura na byo byaba bimeze kose, buri gihe haba hari ahantu hashobora gutuma tugira ibyiringiro, ugukira, n’ibyishimo. Tega amatwi Yona agira ati:

“Nagize ibyago ntakira Nyagasani … ; Nahamagariye mu nda y’ikuzimu. …

“Kuko wanjugunye mu ndiba, hagati mu nyanja. …

“[Nuko] ndavuga nti, ‘Nciwe mu maso yawe, ariko nzongera kureba [ingoro ntagatifu yawe].

“Amazi yarankikije no ku bugingo, ubujyakuzimu burangota, urumafu rwizingiye ku mutwe wanjye.

“Naramanutse njya mu ndiba y’imisozi; … ariko yankuye mu ngeso mbi. …

“Igihe roho yanjye yacikaga intege … nibutse Nyagasani: isengesho ryanjye ryinjiye … mu ngoro yawe.

“Abibeshya bakiringira ibitagira umumaro, birengagiza impuhwe zabo bwite..

“Ariko jyeweho nzagutambira igitambo n’ijwi ry’ishimwe, kandi nzahigura umuhigo nahize. Agakiza gaturuka kuri Nyagasani”

Nubwo hashize imyaka myinshi, nshobora kukubwira neza aho nari nicaye, n’uko niyumvaga, igihe, ndi mu ndiba y’ibigeragezo bwite, nkabona iki cyanditswe gitagatifu. Ku muntu uwo ariwe wese wiyumva nk’uko niyumvaga icyo gihe, ko wirukanywe, uri kurohama mu ndiba y’amazi, urumafu rwizingiye ku mutwe wawe n’imisozi y’inyanja yakuzengurutse; icyo ngusaba wigira kuri Yona ni uko: utakwirengagiza impuhwe zawe bwite. Ufite uburenganzira bwo guhita ubona ubufasha buturuka ku Mana no gukira nubwo ufite inenge zawe za kimuntu. Izi mpuhwe zihebuje zimurikira ziza binyuze muri Yesu Kristo. Kubera ko akuzi neza kandi agukunda byimazeyo, aziguha nkaho ari izawe“bwite,” bisobanuye ko zikubereye neza, zagenewe kugabanya imibabaro yawe bwite no kugukiza ububabare bwawe bwihariye. Rero, kubw’ijuru no ku bwawe, ntukazitere umugongo. Zemere. Tangira wirinda gutega amatwi “ibitagira umumaro” by’umwanzi, ushobora kugushuka ugatekereza ko ihumure riboneka mu kugashya uhunga inshingano zawe za roho. Ahubwo, ukurikize urugero rwa Yona wihannye. Takambira Imana n’umwete. Jya mu ngoro. Komera ku bihango byawe. Korera Nyagasani, Itorero Rye, n’abandi witanga kandi ushimira.

Gukora ibi bintu bizana ugusobanukirwa urukundo rw’igihango rudasanzwe rw’Imana kuri wowe, urwo Bibiliya y’Igiheburayo yita ubugwaneza. Uzabona kandi wumve ububasha bw’Imana y’indahemuka, budacogora, budashira n“impuhwe zuje urugwiro”, bishobora kugutera “ubushobozi … bwo … gutabarwa” mu cyaha icyo ari cyo cyose cyangwa ugusubira inyuma uko ariko kose. Imihangayiko myinshi ishobora gutuma udahita usobanukirwa izo mpuhwe. Ariko uko ukomeza “guhigura umuhigo wahize,” uzabona urumuri rukomeza kumurikira cyane ubugingo bwawe. Kandi hamwe n’uko gusobanukirwa ntabwo uzabona ibyiringiro gusa no gukira, ahubwo, mu buryo butangaje, uzabona umunezero, ndetse no hagati mu bigeragezo bigoye. Nk’uko Umuyobozi Russell M. Nelson yatwigishije neza cyane ati: “Iyo intumbero y’ubuzima bwacu iri ku mugambi w’agakiza w’Imana … na Yesu Kristo n’inkuru nziza Ye, dushobora kumva umunezero tutitaye ku birimo kuba cyangwa ibitarimo kuba mu buzima bwacu. Umunezero uturuka kuri We kandi uza kubera We.”

Twaba duhanganye n’akaga gakomeye nk’aka Yona, cyangwa se ingorane za buri munsi zo muri iyi si yacu idatunganye, ubutumire ni bumwe: ntukirengagize impuhwe zawe bwite. Reba ikimenyetso cya Yona nka Kristo uriho, We wazutse akava mu mva yari amazemo iminsi itatu yatsinze byose—ku bwawe. Mugarukire. Emerera muri We. Mukorere. Mwenyura. Kuko muri We, kandi We wenyine, dusangamo ugukira kuzuye kandi gushimishije guturuka k’Ukugwa, ugukira twese dukeneye cyane kandi dushakisha duciye bugufi. Ndahamya ko ibi ari ukuri. Mu izina ritagatifujwe rya Yesu Kristo, amena.