“သင်သည် ငါ့ကိုချစ်သလော။”

တိဗေရိအိုင်တွင် ပေတရုနဲ့ ရှင်ပြန်ထမြောက်တော်မူသော ကိုယ်တော်ရှင်ကြား သင်ယူဖွယ်ရာဖလှယ်မှုကြားမှာ၊ ကိုယ်တော်ရှင်ကို ကျွန်တော်တို့ချစ်ခြင်းပြသနိုင်မယ့် နည်းလမ်း‌တွေကိုသင်ယူနိုင်ကြပါတယ်။

“ယေ​ရှု​က၊ ယော​န၏​သား ရှိ​မုန်၊ ဤ​သူ​တို့​သည် ငါ့​ကို ချစ်​သည်​ထက် သင်​သည်​သာ၍​ချစ်​သ​လော​ဟု ရှိ​မုန်​ပေ​တ​ရု​အား မေး​တော်​မူ​လျှင်၊ ဟုတ်​ပါ၏​သ​ခင်။ ကိုယ်​တော်​ကို အ​ကျွန်ုပ်​ချစ်​သည်​ကို ကိုယ်​တော်​သိ​တော်​မူ၏​ဟု လျှောက်​၏”

ကိုယ်တော်ရှင်ရဲ့ ဒီစုံစမ်းမေးမြန်းခြင်းရဲ့ အဓိကမေးခွန်းက “သူတို့သည်ငါ့ကိုချစ်သည်ထက် သင်သည် သာ၍ ချစ်သလော” ဖြစ်ပါတယ်။ “သူတို့” ဆိုတာရဲ့အထက်မှာ ကိုယ်တော့်ကိုထားကြတဲ့အခါမှာ ကျွန်တော်တို့ရဲ့ချစ်ခြင်းကို ကိုယ်တော်ရှင်ကိုပြနေတာဖြစ်ပါတယ်၊ “သူတို့” ဆိုတာက လူတစ်ဦးဖြစ်စေ၊ လှုပ်ရှားမှုဖြစ်စေ၊ ဒါမှမဟုတ် ကိုယ်တော့်ကိုကျွန်တော်တို့ရဲ့ ဘဝထဲကနေ အ‌ရေးအကြီးဆုံးလွှမ်းမိုးသူအဖြစ်ကနေ အစားထိုးနေရာဝင်ယူမယ့် အရာတိုင်းဖြစ်နိုင်ပါတယ်။

တစ်နေ့၊ တစ်ပတ်၊ တစ်လ၊ ဒါမှမဟုတ် တစ်နှစ်မှာ ကျွန်တော်တို့လုပ်ချင်တဲ့အရာတွေ ပြီးမြောက်ဖို့လိုအပ်တဲ့အရာတွေ လုပ်ဖို့အချိန်ဘယ်တော့မှလုံလောက်မှာမဟုတ်ပါဘူး။ လူ့ဇာတိစမ်းသပ်မှုရဲ့ တစ်စိတ်တစ်ပိုင်းက ကျွန်တော်တို့ထာဝရကောင်းကျိုးမှာ အ‌ရေးအကြီးဆုံးအရာအတွက် အဖိုးတန်လှတဲ့အချိန်အရင်းအမြစ်တွေကို အသုံးပြုပြီးတော့ သိပ်အရေးမကြီးတဲ့အရာတွေကိုစွန့်လွှတ်ဖို့ ဖြစ်ပါတယ်။

ဥက္ကဋ္ဌ ရပ်ဆဲလ် အမ်၊ နယ်လ်ဆင်ကပြောခဲ့ပါတယ်၊ “သင်တို့အယောက်ချင်းစီတိုင်းအတွက် မေးခွန်းက … တူတူပါပဲ။ … သင်ဟာ သင့်ရဲ့ဘဝမှာ ဘုရားသခင်ကို အရေးအကြီးဆုံးလွှမ်းမိုးမှုဖြစ်စေရန် အခွင့်ပေးဖို့ လိုလိုလားလား ရှိပါသလား။ နေ့တိုင်း သင်ပြုလုပ်တဲ့အရာတွေမှာ သူ့နှုတ်ကပတ်တော်တွေ၊ သူ့ပညတ်တော်တွေ၊ ပြီးတော့ သူ့ပဋိညာဉ်တွေကို လွှမ်းမိုးဖို့ သင်အခွင့်ပေးမှာလား။ သူ့အသံကို အခြားအရာတွေအားလုံးထက် ဦးစားပေးဖို့ သင်အခွင့်ပေးမှာလား။ သင်ပြုလုပ်စေဖို့ သူလိုအပ်တဲ့အရာမှန်သမျှကို အခြားရည်ရွက်ချက်မှန်သမျှထက် ပိုပြီး အရေးတယူလုပ်ဖို့ သင် လိုလိုလားလား ရှိပါသလား။ သင့်ရဲ့အလိုကို သူ့အလိုတော်အားဖြင့် လွှမ်းခြုံခံရစေရန်သင် လိုလိုလားလားရှိပါသလား။ ကိုယ်တော့်ကို ကျွန်တော်တို့ရဲ့ ပထမဦးစားပေးအဖြစ်ထားကြတဲ့အခါမှာ ကျွန်တော်တို့ရဲ့ တပည့်တော်ဖြစ်ခြင်းနဲ့ ဘုရားသခင်အပေါ်ချစ်ခြင်းကို သရုပ်ဖော်နေတာဖြစ်ပါတယ်။

ပေတရုနဲ့ ကယ်တင်ရှင်ကြား ဒီတူညီတဲ့ ဆွေးနွေးမှုရဲ့ နောက်အပိုဒ်မှာ၊ ကျွန်တော်တို့ချစ်ခြင်းမေတ္တာဖော်ပြချက်တွေကို ကိုယ်တော်ရှင်အသိအမှတ်ပြုတဲ့ အခြားနည်းလမ်းကိုသင်ယူနိုင်ပါတယ်၊ “တစ်​ဖန်​[ကိုယ်တော်ရှင်]က၊ ယော​န၏​သား​ရှိ​မုန်၊ သင်​သည် ငါ့​ကို​ချစ်​သ​လော​ဟု ဒု​တိ​ယ​အ​ကြိမ်​မေး​တော်​မူ​လျှင်၊ ဟုတ်​ပါ၏​သ​ခင်။ ကိုယ်​တော်​ကို အ​ကျွန်ုပ်​ချစ်​သည်​ကို ကိုယ်​တော်​သိ​တော်​မူ၏​ဟု လျှောက်​သော်၊ ငါ၏​သိုး​တို့​ကို ထိန်း​လော့​ဟု​မိန့်​တော်​မူ၏။”

ကိုယ်တော်ရဲ့ သားသမီးတွေကို ကျွန်တော်တို့အစေခံတဲ့အခါ၊ နားထောင်တဲ့အခါ၊ ချစ်တဲ့အခါ၊ မြှင့်တင်ပေးတဲ့အခါ ဒါမှမဟုတ် အမှုတော်ဆောင်တဲ့အခါမှာ ကောင်းကင်ဘုံရှင်အဘကို ကျွန်တော်တို့ရဲ့ ချစ်ခြင်းပြသနေတာဖြစ်ပါတယ်။ အဲဒီအမှုတော်ဆောင်ခြင်းက တခြားသူတွေကို ဝေဖန်ခြင်းမပြုလုပ်ဘဲ အမှန်တကယ်ကြည့်ရှုခြင်းလိုပဲ ရိုးရှင်းတဲ့အရာဖြစ်နိုင်ပါတယ်။ သြဝါဒနှင့် ပဋိညာဥ်များကျမ်းရဲ့ အပိုဒ်ငယ်၇၆မှာ၊ ဆီလက်ရှယ်လ် ဂုဏ်ကျက်သရေကိုအမွေခံကြမယ့် သူတွေရဲ့ စရိုက်လက္ခဏာကို တစ်စေ့တစ်စောင်းတွေ့နိုင်ပါတယ်၊ “သူတို့ကို မြင်သကဲ့သို့ သူတို့​မြင်ကြ၏၊ သူတို့ကို သိသကဲ့သို့ သူတို့​သိကြ၏။” သူတို့က တခြားသူတွေကို ဘုရားသခင်မြင်တဲ့အတိုင်း မြင်ကြပါတယ်၊ ပြီးတော့ ကိုယ်တော်က သူတို့ကို ဘုန်းကြီးသောဘုရားပကတိအလားအလာနဲ့၊ ဖြစ်ထွန်းလာမှာကိုမြင်ပါတယ်။

ကျွန်တော့်ရဲ့ သာသနာပြုပြီးတော့အိမ်ကိုပြန်လာတဲ့အခါ၊ ကျွန်တော်နဲ့ ကျွန်တော့်ညီတွေ ဆယ်ကျော်သက်အရွယ်မှာစခဲ့တဲ့ မြက်ရိတ်တဲ့စီးပွားရေးကို ကျွန်တော်လွှဲပြောင်းယူခဲ့ပါတယ်။ တက္ကသိုလ်မှာ ပညာသင်ရင်းလည်း ကျွန်တော်အလုပ်များနေခဲ့ပါတယ်။ နွေဦးရက်သတ္တပတ်မှာ၊ မိုးသည်းထန်စွာရွာပြီး နီးကပ်လာတဲ့နောက်ဆုံးစာမေးပွဲတွေကြောင့် ကျွန်‌တော်စိတ်ရှုပ်ထွေးပြီး ခြံအလုပ်တွေနောက်ကျခဲ့ပါတယ်။

ရက်သတ္တပတ်အလယ်လောက်မှာ ကောင်းကင်ကရှင်းလင်းသွားပြီး၊ အတန်းတွေပြီးတဲ့အခါမှာ ခြံအလုပ်တွေကိုပြန်အမှီလုပ်ဖို့ ကျွန်တော်စီစဥ်ခဲ့ပါတယ်။ ဒါပေမယ့် ကျွန်တော်အိမ်သို့ရောက်တဲ့အခါမှာ၊ ကျွန်တော့်ရဲ့ ကုန်တင်ကားနဲ့ ပစ္စည်းကိရိယာတွေ မရှိတော့ပါဘူး။ သိချင်လာတာနဲ့၊ ကျွန်တော်သွားရမယ့် ခြံတွေကိုသွားခဲ့ပါတယ်၊ ခြံတိုင်းက လှလှပပရိတ်ပြီးသားဖြစ်နေပါတယ်။ အစီအစဥ်ထဲက နောက်ဆုံးခြံမှာ၊ ကျွန်တော်ရဲ့ညီ မြက်ရိတ်စက်ရဲ့နောက်မှာတွန်းနေတာကိုမြင်ခဲ့ပါတယ်။ သူကျွန်တော့်ကိုမြင်ပါတယ်၊ ပြုံးပြပြီး လက်ပြပါတယ်။ ကျေးဇူးတင်မှုတွေနဲ့၊ ကျွန်တော်သူ့ကို ဖက်ပြီးကျေးဇူးတင်ကြောင်းပြောခဲ့ပါတယ်။ သူ့ရဲ့ အဓိပ္ပာယ်ပြည့်ဝတဲ့ အစေခံခြင်းလုပ်ရပ်က သူ့အပေါ် ကျွန်တော်ရဲ့ချစ်ခြင်းနဲ့ သစ္စာရှိမှုကို နက်ရှိုင်းစွာအားကောင်းစေခဲ့ပါတယ်။ တစ်ဦးနဲ့တစ်ဦးအစေခံခြင်းက ဘုရားသခင်နဲ့ သူ့ရဲ့ချစ်လှစွာသောသားတော်တို့ကို ကျွန်တော်တို့ရဲ့ ချစ်ခြင်းပြသနိုင်တဲ့ အမှားအယွင်းမရှိတဲ့ နည်းလမ်းတစ်ခုဖြစ်ပါတယ်။

ကျေးဇူးတော်ချီးမွမ်းတတ်သောစိတ်ရှိခြင်းအားဖြင့်လည်း ဘုရားသခင်အပေါ် ကျွန်တော်တို့ရဲ့ ချစ်ခြင်းကို သိသာထင်ရှားစေနိုင်ပါတယ်။ ကိုယ်တော်ရှင်မိန့်မှာခဲ့ပါတယ်၊ “ခပ်သိမ်းသော​အရာတို့၌ ဘုရားသခင်၏​လက်ကို ဝန်ခံခြင်း​မရှိသောသူမှတစ်ပါး …လူသားသည် အဘယ်​အရာနှင့်မျှ သူ့ကို မပြစ်မှား။ ” ကိုယ်တော်ရှင်က ကျွန်တော်တို့ အသက်တာတွေထဲက ကောင်းတဲ့အရာတိုင်းရဲ့ ရင်းမြစ်တစ်ခုအဖြစ် အသိအမှတ်ပြုခြင်းအားဖြင့် ဘုရားသခင်အပေါ် ကျွန်တော်တို့ရဲ့ချစ်ခြင်းကိုပြသနိုင်ပါတယ်။

ကုမ္ပဏီတစ်ခုစဖွင့်ခဲ့တဲ့ အစောပိုင်းကာလတွေမှာ၊ ကျွန်တော့်စီးပွားရေးလုပ်ဖော်ကိုင်ဖက်နဲ့ကျွန်တော်က အရေးကြီးတဲ့ အစည်းအဝေးတွေမတိုင်ခင်မှာ ကောင်းကင်ဘုံရှင်အဘရဲ့ အကူအညီကိုတောင်းပြီး စိတ်အားထက်သန်စွာဆုတောင်းကြပါတယ်။ ထပ်ခါထပ်ခါပဲ၊ ဘုရားသခင်က ကျွန်တော်တို့ရဲ့ ဆုတောင်းချက်တွေကို အဖြေပေးခဲ့ပြီးတော့ အစည်းအဝေးတွေ အဆင်ပြေခဲ့ပါတယ်။ အစည်းအဝေးတစ်ခုအပြီးမှာ၊ ကျွန်တော့်ရဲ့လုပ်ငန်းဖော်က ကျွန်တော်တို့ကအကူအညီတောင်းဖို့ မြန်ဆန်ပြီးတော့ ကျေးဇူးတင်တဲ့အခါမှာ နှေးကွေးနေကြောင်းထောက်ပြခဲ့ပါတယ်။ အဲဒီအချိန်ကစပြီး၊ ကျေးဇူးတင်ခြင်းအတွက် စစ်မှန်တဲ့ဆုတောင်းချက်တွေပြုလုပ်ဖို့၊ ကျွန်တော်တို့ရဲ့ အောင်မြင်မှုတွေမှာ ကိုယ်တော်ရှင်ရဲ့လက်တော်ကိုသတိပြုမိဖို့ အလေ့အကျင့်တစ်ခုပြုလုပ်ခဲ့ပါတယ်။ ဘုရားသခင်အပေါ် ကျွန်တော်တို့ရဲ့ ချစ်ခြင်းကို “ ကျေးဇူးတင်ခြင်းရှိသော သဘောထား” ဖြင့်ပြသပါတယ်။

ကောင်းကင်ဘုံရှင်အဘနှင့် သူ၏ချစ်လှစွာသောသားတော်တို့အပေါ် ကျွန်တော်တို့ရဲ့ ချစ်ခြင်းကိုပြသနိုင်တဲ့ နောက်ထပ်နည်းလမ်းကတော့ သူတို့ကိုနာခံဖို့ ရွေးချယ်ခြင်းပဲဖြစ်ပါတယ်။ ကယ်တင်ရှင်မိန့်မှာခဲ့ပါတယ်၊”ငါ့​ကို​ချစ်​လျှင် ငါ့​ပ​ညတ်​တို့​ကို စောင့်​ရှောက်​ကြ​လော့။” ဒီလိုနာခံမှုမျိုးက မတွေးမခေါ်ဘဲ ဒါမှမဟုတ် တွန်းအားပေးခြင်းကြောင့် နာခံတာမဟုတ်ဘဲ၊ စိတ်ရင်းမှန်နှင့် ချစ်ခြင်းကို လိုလိုလားလားဖော်ပြခြင်းဖြစ်ပါတယ်။ ကောင်းကင်ဘုံမှခမည်းတော်က ကျွန်တော်တို့ကိုနာခံစေဖို့ ဆန္ဒရှိစေချင်ပါတယ်။ ညီအမ ထမရာ ဒက်ဗယျူ၊ ရူးနီးယားက ဒါကို “ချစ်ခြင်းအားဖြင့်နာခံခြင်း” လို့ခေါ်ပါတယ်။ သူမပြောခဲ့ပါတယ်၊ “ကျွန်မတို့မှာ ပြည့်စုံတဲ့နာခံခြင်းမရှိသေးပေမယ့် ကျွန်မတို့က လက်ရှိမှာချစ်ခြင်းအားဖြင့် နာခံဖို့ကြိုးစားကြပါတယ်၊ ကိုယ်တော့်ကိုချစ်တဲ့အတွက်၊ ကိုယ်တော်နဲ့နေဖို့၊ ထပ်တလဲလဲရွေးချယ်ကြပါတယ်။

ကောင်းကင်ဘုံရှင်အဘက ကျွန်တော်တို့အား ကိုယ်တော့်ကိုရွေးချယ်‌စေချင်ရန် လှုံ့ဆော်ပေးဖို့ရွေးချယ်ပိုင်ခွင့်ကို ပေးထားပါတယ်။ ကိုယ်တော့်ရဲ့အမှုတော်နဲ့ ဘုန်းတော်က ကျွန်တော်တို့ကိုထာဝရအသက်တာကို ဆောင်ယူလာစေရုံသာမက ကျွန်တော်တို့ရဲ့အကြီးမားဆုံးဆန္ဒဖြစ်တဲ့ ကိုယ်တော့်ဆီပြန်သွားနိုင်ဖို့ မျှော်လင့်ချက်လည်းပါဝင်ပါတယ်။ သို့သော်လည်း၊ သူက ကျွန်တော်တို့ကို နာခံဖို့ဘယ်တော့မှာတွန်းအားပေးမှာ မဟုတ်ပါဘူး။ ဓမ္မသီချင်း “သိ‌စေသော်၊ ဤဝိညာဥ်တော်လွတ်မြောက်ပြီ ”မှာ ကျွန်တော်တို့သီဆိုကြပါတယ်၊

သာသနာခေါင်းဆောင်များအနေနဲ့၊ ကျွန်တော့်ဇနီး၊ ခရစ်စတီးနားနဲ့ ကျွန်တော်တို့က နာခံဖို့ရွေးချယ်ခဲ့ကြတဲ့ သာသနာပြုတွေကြောင့် စိတ်ခွန်အားရရှိခဲ့ပါတယ်၊ ဒါဟာသာသနာပြုစံနှုန်းတစ်ခုကြောင့်အတွက်သာမဟုတ်ဘဲ ကိုယ်တော့်ကိုကိုယ်စားပြုပြီး နှိမ့်ချစွာရွေးချယ်ခြင်းအားဖြင့် ကိုယ်တော်ရှင်အပေါ် သူတို့ရဲ့ ချစ်ခြင်းကို ပြသချင်ခဲ့ကြလို့ပဲဖြစ်ပါတယ်။

အသင်းလူကြီး ဒေးလ် ဂျီ၊ ရန်လန်သင်ကြားခဲ့သလိုပါပဲ၊ “ကျွန်တော်တို့ကောင်းကင်ဘုံရှင် အဘဘုရားသခင်ရဲ့ မိဘအနေနဲ့ထိန်းကျောင်းခြင်းက သူရဲ့သားသမီးတွေကို မှန်တာကို လုပ် စေဖို့မဟုတ်ဘဲ၊ မှန်တာကို လုပ်ဖို့ ရွေးချယ် စေဖို့ဖြစ်ပြီး နောက်ဆုံးမှာ သူ့ကဲ့သို့ဖြစ်လာဖို့ပဲဖြစ်ပါတယ်။ သူက ကျွန်တော်တို့ကို ရိုးရိုးရှင်းရှင်းပဲနာခံစေချင်တယ်ဆိုရင်၊ သူက ကျွန်တော်တို့ရဲ့ အပြုအမူတွေကို ဆုချပေးဖို့နဲ့ အပြစ်ပေးဖို့အတွက် ချက်ချင်းပြုလုပ်မှာဖြစ်ပါတယ်။” ကိုယ်တော်ကို ကျွန်တော်တို့နာခံပြီးလိုက်လျှောက်ဖို့ ရွေးချယ်ကြတဲ့အခါမှာ ဘုရားသခင်အပေါ် ကျွန်တော်တို့ရဲ့ချစ်ခြင်းကို ပြသနေတာဖြစ်ပါတယ်။

ကောင်းကင်ဘုံရှင်အဘနဲ့ ကယ်တင်ရှင်တို့ကို ကျွန်တော်တို့ရဲ့ အသက်တာတွေမှာ ပထမဦးစားပေးကြတဲ့အခါ၊ တစ်ဦးနဲ့တစ်ဦး အစေခံကြတဲ့အခါ၊ သူတို့ဆီကလာတဲ့ ကောင်းချီးတိုင်းကို ကျေးဇူးတင်စွာအသိအမှတ်ပြုကြတဲ့အခါ၊ သူတို့ကို နာခံပြီး လိုက်လျှောက်ကြတဲ့အခါမှာ သူတို့က ကျွန်တော်တို့ရဲ့ချစ်ခြင်းဖော်ပြမှုကို အသိအမှတ်ပြုလာကြပါတယ်။

ကျွန်တော်တို့တစ်ယောက်ချင်းတိုင်းဟာ ဘုရားသခင်ရဲ့ စစ်မှန်တဲ့သားသမီးတစ်ဦးဖြစ်ပြီး၊ ကိုယ်တော်က ကျွန်တော်တို့ကို ပြည့်ဝစွာချစ်ကြောင်း ကျွန်တော်သက်သေခံပါတယ်။ သူ့ရဲ့ ချစ်ခြင်းကို ကျွန်တော်တို့သတိထားမိနိုင်ပြီး နားလည်နိုင်မယ့် နည်းလမ်းတွေနဲ့ ခံစားစေဖို့သူတောင်းတနေကြောင်း ကျွန်တော်သက်သေခံပါတယ်။ နောက်ပြီး လှပတဲ့သဘောတရားကတော့ ကျွန်တော်တို့ ကိုယ်တော်အပေါ်ရှိတဲ့ချစ်ခြင်းကို ပြသကြတာနဲ့အမျှ ကျွန်တော်တို့အတွက် သူ့ရဲ့ချစ်ခြင်းကိုလည်း ပိုမိုနက်ရှိုင်းစွာ ခံစားလာနိုင်လေပဲ ဖြစ်ပါတယ်။ ယေရှုခရစ်တော်၏နာမတော်အားဖြင့်၊ အာမင်။