မော်မုန်ကျမ်း—ကျွန်ုပ်တို့ဘဝခရီးလမ်းရှိအဖိုးမဖြတ်နိုင်သောရတနာ

အယ်လမာနဲ့ မောဇိယရဲ့သားတွေလိုပဲ၊ “[ကျွန်တော်တို့ဟာ] ဘုရားသခင်၏​နှုတ်ကပတ်တော်ကို သိနိုင်ခြင်းငှာ၊ ကျမ်းစာများကို လုံ့လဝီရိယ​ထက်သန်စွာ [စေ့စေ့​ဖတ်]ကြပြီး” သမ္မာတရား၌ ကျွန်တော်တို့ခိုင်မာကြရပါမယ် (အယ်လမာ ၁၇:၂)။

‌ဂျော်ဂျီယာပြည် အတ္တလန်တာမြို့သာသနာမှာ သာသနာခေါင်းဆောင်တွေအနေနဲ့ အမှုတော်ဆောင်နေတဲ့အချိန်မှာ၊ ကျွန်တော့်ဇနီးနဲ့ကျွန်တော်က သာသနာပြုတိုင်းကို တစ်နေ့မှာ အနည်းဆုံးမိနစ်၃၀လောက် မော်မုန်ကျမ်းဖတ်ဖို့ တိုက်တွန်းခဲ့ပါတယ်။ အဲဒီကတိကဝတ်က ကျွန်တော်တို့ရဲ့ ယုံကြည်ခြင်းကို တိုးတက်စေခဲ့ပြီး အံ့သြဖွယ်အမှုတွေကို ရှာဖွေပြီးမျှော်လင့်နိုင်ဖို့ ကူညီပေးခဲ့ပါတယ်။

သာသနာပြုခြင်းပြီးဆုံးသွားတဲ့အခါ နေ့စဉ်ကျမ်းစာလေ့လာဖို့ အချိန်တွေအရင်လောက်မရနိုင်တော့တာ ဖြစ်နိုင်ပေမယ့်၊ သင်က နေ့စဉ် ဆုတောင်းပြီး မော်မုန်ကျမ်းကို ဦးစားပေးလေ့လာမယ်ဆိုရင် ဝိညာဉ်ရေးရာခွန်အားနဲ့ ကိုယ်တော်ရှင်နဲ့ သူ့ရဲ့ကတိတော်တွေအပေါ် ယုံကြည်မှုကို ပိုမိုတွေ့ရှိရမယ်လို့ ကျွန်တော်ကတိပေးပါတယ်။

နီဖိုင်းက ဒီလိုသွန်သင်ပေးခဲ့ပါတယ်၊ “ခရစ်တော်၏​နှုတ်ကပတ်တော်တို့ကို ပွဲခံပျော်မွေ့ကြလော့။ အကြောင်းမူကား၊ ရှုလော့၊ ခရစ်တော်၏​နှုတ်ကပတ်တော်တို့သည် သင်တို့ပြုရမည့်​အရာမှန်​သမျှကို ပြောပြလိမ့်မည်”(၂ နီဖိုင်း ၃၂:၃)။

ပွဲခံပျော်မွေ့ကြတယ်ဆိုတာ ဖတ်တာထက်ပိုပါတယ်၊ ဒါဟာ အနှစ်အရသာကိုသိရှိခြင်း၊ စဥ်းစားဆင်ခြင်ခြင်းနဲ့ အသုံးချခြင်းဖြစ်ပါတယ်။ မော်မုန်ကျမ်းကိုလေ့လာတဲ့အခါ၊ သင့်ရဲ့ကျမ်းစာလေ့လာမှုကို ပိုအဓိပ္ပာယ်ရှိအောင်လုပ်နိုင်မယ့် နည်းလမ်းတွေကို စဉ်းစားပါ။ ဥပမာ၊

• ဧဝံဂေလိစာကြည့်တိုက် အက်ပ်မှာ ရရှိနိုင်တဲ့ သင်ထောက်ကူကိရိယာတွေကိုအသုံးပြုပါ။

• ဘုရားသခင်ရဲ့အစီအစဉ်ကို ကျွန်တော်တို့ နားလည်ဖို့ကူညီပေးခြင်းနဲ့ ကောင်းကင်ဘုံရှင်အဘနဲ့ ပဋိညာဉ်တွေပြုပြီး စောင့်ထိန်းဖို့ ဦးဆောင်လမ်းညွှန်ပေးတဲ့ ထာဝရသမ္မာတရားတွေကို ဖော်ထုတ်တာမျိုး။

• အရေးပါတဲ့ စကားစုတွေကို မှတ်သားပြီး အဲဒီလေ့လာနေစဉ်အတွင်းမှာ သင်သိရှိလာတဲ့အရာတွေကို သိမ်းဆည်းဖို့ သင့်ရဲ့အထင်အမြင်တွေကို မှတ်တမ်းတင်တာမျိုး တို့ဖြစ်ပါတယ်။

မော်မုန်ကျမ်းမှာ ကျွန်တော်တို့စိတ်ဝိညာဉ်ရဲ့မေးခွန်းတွေကို ဖြေဆိုနိုင်တဲ့ တန်ခိုးရှိပါတယ်။ နီဖိုင်း ပြောခဲ့သလိုပါပဲ၊ ကျွန်တော်တို့က “ခပ်​သိမ်း​သော​ကျမ်း​စာ​တို့ကို ငါ​တို့​အတွက် ငါ​ကျင့်​သုံး​သည်​မှာ၊ ငါ​တို့​၏​အကျိုး​နှင့် သင်​ယူ​ခြင်း​အတွက်​ဖြစ်​ပါတယ်” (၁ နီဖိုင်း ၁၉:၂၃)။

ကျွန်တော်တို့ ခရစ်တော်ရဲ့နှုတ်ကပတ်တော်ကို ပွဲခံပျော်မွေ့ကြတာနဲ့အမျှ၊ ဒါဟာ ဗျာဒိတ်တော်ရဲ့တံခါးကိုဖွင့်ပေးပြီး ကိုယ်တော်နဲ့နီးစပ်ဖို့အတွက် ကျွန်တော်တို့ရဲ့ ဘဝရဲ့အခြေအနေအမျိုးမျိုးမှာ ကျွန်တော်တို့ ဘာလုပ်ရမယ်ဆိုတာကို ပြသပေးပါလိမ့်မယ်။

လေဟိက သူ့မိသားစုကို အသက်ပင်ရဲ့အသီးကို မျှဝေပေးချင်ခဲ့သလိုမျိုးပဲ (ရှု ၁ နီဖိုင်း ၈:၁၂)၊ မော်မုန်ကျမ်းအပေါ် သက်သေခံချက်ရလာတဲ့အခါ ယေရှုခရစ်တော်ရဲ့ဧဝံဂေလိတရားကိုသိရှိခြင်းက ရရှိလာတဲ့ ဝမ်းမြောက်ခြင်းကို မျှဝေချင်တဲ့ အလိုဆန္ဒ ဖြစ်ပေါ်လာပါတယ်။

ကျွန်တော်တို့ရဲ့ သာသနာပြုတစ်ယောက်ဖြစ်ပြီး၊ ကျွန်တော်တို့နဲ့အတူ ဒီကဏ္ဍကိုတက်ရောက်နေတဲ့၊ ညီအစ်မဘန်ဆန်က၊ သူ့ရဲ့မောင်လေးကို ကူညီချင်တဲ့စိတ်ဆန္ဒကို ကျွန်တော့်ကို ပြောပြခဲ့ပါတယ်။ အဲဒီအချိန်တုန်းက၊ သူ့မောင်လေးက ကောလိပ်တက်ဖို့ ပြင်ဆင်နေပြီး သာသနာပြုထွက်ဖို့ မသေချာခဲ့ပါဘူး။ ကျွန်တော့်စိတ်ထဲမှာပေါ်လာတာကတော့ ညီအစ်မဘန်ဆန်ကို သူမ သာသနာပြုတဲ့ ပထမလေးလထဲမှာ မော်မုန်ကျမ်းကိုဖတ်ဖို့ ဖိတ်ခေါ်ပြီး၊ သူမ အကြိုက်ဆုံးအခန်းငယ်တွေကိုမှတ်သားစေကာ၊ အဲဒီစာအုပ်ကို သူ့မောင်လေးဆီပို့ပေးဖို့ တိုက်တွန်းဖို့ပါပဲ။

ညီအစ်မဘန်ဆန်က သူမှတ်သားထားတဲ့မော်မုန်ကျမ်းစာအုပ်ကို ပို့ပေးပြီး ညတိုင်းကျမ်းစာဖတ်ဖို့ သူ့မောင်လေးကို ဖိတ်ခေါ်ခဲ့ပါတယ်။ နောက်ပိုင်းမှာ သူမက ကျွန်တော့်ကို ပြန်ပြောပြပါတယ်၊ “ကျွန်မ သာသနာပြုမထွက်ခင်တုန်းက ကျွန်မမောင်လေးက အချိန်ပြည့်သာသနာပြုထွက်ဖို့ မသေချာခဲ့ပါဘူး။ တဖြည်းဖြည်း၊ အချိန်ကြာလာတော့၊ မော်မုန်ကျမ်းကိုဖတ်ရင်းနဲ့ သူ့ဘဝမှာ ဝမ်းမြောက်ခြင်းတွေတိုးပွားလာပြီး သာသနာပြုထွက်ဖို့ စဉ်းစားလာခဲ့ပါတယ်။”

ညီအစ်မဘန်ဆန် သာသနာပြုခြင်းပြီးဖို့ နှစ်ပတ်အလိုမှာ၊ သူ့မောင်လေးက သာသနာပြုအမှုတော်‌ဆောင်ဖို့ ခေါ်သွင်းစာကို ရရှိခဲ့ပါတယ်။ အခုဆိုရင် သူက မက္ကဆီကို တူးစ်တလာ ဂူတီအဲရက်ဇ် သာသနာမှာ အမှုတော်ဆောင်နေပါပြီ။ မော်မုန်ကျမ်းကနေတစ်ဆင့်၊ အယ်လ်ဒါဘန်ဆန် ဟာ သူ့ဘဝကို ဝိညာဉ်ရေးရာရှင်းလင်းမှုဖြင့် သိမြင်လာပြီး၊ ဒါက သူ့ကို ကိုယ်တော်ရှင်ကို အမှုတော်ဆောင်ဖို့နဲ့ အရာအားလုံးအဆင်ပြေသွားမယ်လို့ ယုံကြည်စိတ်ချ‌စေခြင်းကို ဦးဆောင်ပေးခဲ့ပါတယ်။ အဲဒီဆုံးဖြတ်ချက်က ခရစ်တော်ရဲ့နှုတ်ကပတ်တော်တန်ခိုးကြောင့် ဖြစ်ပေါ်လာတဲ့ အမှန်တကယ် အံ့ဖွယ်တစ်ခုပါပဲ။

ကျွန်တော်ရဲ့ချစ်လှစွာသောညီအကိုမောင်နှမများခင်ဗျာ၊ မော်မုန်ကျမ်းကို နက်နက်ရှိုင်းရှိုင်းလေ့လာကြဖို့ သင်တို့အယောက်ချင်းစီကို ကျွန်တော်တိုက်တွန်းပါတယ်။ မော်မုန်ကျမ်းထဲမှာတွေ့ရတဲ့ ခရစ်တော်ရဲ့နှုတ်ကပတ်တော်တွေကို ကျွန်တော်တို့ ပွဲခံပျော်မွေ့ကြတာနဲ့ အမျှ၊ ဝိညာဉ်တော်က ကျွန်တော်တို့ကို ထာဝရသမ္မာတရားတွေကို နားလည်စေပြီး ကိုယ်တော်ရှင်ရဲ့ သတင်းစကားကို ကြားနာဖို့ ကိုယ်တော်ရှင်ပြင်ဆင်ပေးထားတဲ့သူတွေဆီ ခိုင်မာတဲ့သက်သေခံချက်ကို မျှဝေဖို့ ကူညီပေးမယ်ဆိုတာ ကျွန်တော်သိပါတယ်။ ကိုယ်တော်ရှင်က၊ “ငါ၏​ရွေးကောက်​ထားသော​သူများသည် ငါ၏​အသံကို ကြားနာလျက်၊ သူတို့​စိတ်နှလုံးကို မာကျော​စေခြင်း​မရှိကြ” (ဩဝါဒနှင့်ပဋိညာဉ်များ ၂၉:၇)လို့ မိန့်တော်မူခဲ့ပါတယ်။ ယုံကြည်ခြင်းနဲ့ဘုရားသခင်ကိုမေးလျှောက်သူတိုင်းဟာ မော်မုန်ကျမ်းရဲ့ အမှန်တရားနဲ့ အထွဋ်အမြတ်ဖြစ်ခြင်းကို သန့်ရှင်းသောဝိညာဉ်တော်ရဲ့ တန်ခိုးအားဖြင့် သက်သေခံချက်ရရှိကြလိမ့်ဆိုတာ ကျွန်တော်သက်သေခံပါတယ်။ ဒီအကြောင်းကို ယေရှုခရစ်တော်၏နာမတော်အားဖြင့် ကျွန်တော်သက်သေခံပါတယ်၊ အာမင်။