Pe Santidad porãngue
Ñande Ru Yvagagua ome’ẽ ñandéve opaite mba’e oñeikotevẽva oiko haĝua ñandehegui santos, Ha’e ha’eháicha Santo.
Añembosako’ívo ko reunión-rã, che korasõ oñemboyke umi heta hermanakuéra hekojojáva che aikuaáva, oĩva mombyry, ha avei aĝui. Chéve ĝuarã, ojedescribi porãiterei chupekuéra peteĩ salmo rey David ohaíva’ekue omboaguijévo: “Peme’ẽ Jehova-pe verapy oñeme’ẽva’erã hérape; pegueru ofrenda ha peju henondépe; peñakãity Jehova renondépe pe santidad porãnguéme.”
Ahecha pe santidad porãngue umi hermana-pe oguerekóva ikorasõnguéra oñecentráva opa mba’e iporãvape, oñeha’ãva ojoguave haĝua ñande Salvador-pe. Ome’ẽmbaite hikuai hi’ánga, korasõ, apytu’ũ ha mbarete Ñandejárape oviviháichape ára ha ára. Pe santidad ou ñeha’ã ha ñorairõgui ñaneñe’ẽrendu haĝua mandamientokuérare ha ñamomorã haĝua umi konvénio jajapova’ekue Tupã ndive; pe santidad ha’e jajapo decisiones ombopytátava Espiritu Santo ñande guía ramo.; pe santidad ha’e ñamboyke ñane tendencia natural ha jaiko ´´santoramo Cristo Ñandejára expiación rupive. “Opa momento [ñande rekovépe] ha’eva’erã de santidad Ñandejárape ĝuarã.”
Tupã Yvagagua omanda Israel ra’ykuérape: “Che ha’e Jehova, pene Tupã; upévare, peẽ peñesantifikáta ha ha’éta santo, Che ha’égui santo. Upéicha rupi ani pemongýa pende retekuéra.”
Elder D. Todd Christofferson ombo’e: “Ñande Ru Yvagagua ha’e peteĩ Tupã oguerekóva espectativa ijyvatéva…Ha’e ojapose ñandeehegui Santokuéra ikatu haĝua ‘jagueropu’aka peteĩ gloria celestial’(D. y C. 88:22) ha ‘jaiko ipresenciape’(Moisés 6:57).” Lectures on Faith [Discursokuera fe rehegua] he’i: “Ni peteĩ ser ikatu odisfruta Igloria oguereko’ỹre Iperfección ha santidad.” Ñande Ru Yvagagua ñandekuaa; Ha’e ñanderayhu ha ome’ẽ ñandéve opa oñeikotevẽva oiko haĝua ñandehegui santos Ha’e ha’eháicha santo.
Ñande ha’e ñande Ru Yvagagua rajykuéra, ha opavave jaguereko peteĩ herencia divina santidad rehegua. Ñande Ru Yvagagua he’i: “Péina ápe, che ha’e Tupã; Kuimba’e de Santidad ha’e che réra.” Mundo preterrenal-pe, jahayhu ñande Ru Yvagaguápe ha ñatupãitũ chupe; Ñande ha’esekuri Ha’éicha. Imborayhu perfecto Túvaicha rupi, ome’ẽ Ita’ýra ohayhuetéva, Jesucristo, ha’ehaĝua ñande Salvador ha Redentor. Ha’e ha’e pe Hombre de Santidad Ra’y. ¨Héra ha’e Santo,” pe “Santo Israel pegua.”
Jesucristo ha Ijexpiación reheve, ikatu ñanepotĩ, ñanemara’ỹ, jajejokóvo opa mba’e vaígui ha ñañe’arrepenti añetérõ. Jajebautiza y rupive ñañerredimi haĝua ñane angaipakuéragui, ha ñande ánga oñesantifika jarrecibívo pe Espiritu Santo peteĩ korasõ añete reheve. Cada semana japarticipa Santa Cena ordenanza-pe. Espiritu de arrepentimiento reheve ha peteĩ tekojojase añete reheve, jajapo konvénio ñaimeha dispuesta jajagarrávo ñande ári Cristo réra, ñanemandu’a tapiaite Hese ha ñaneñe’ẽrendu hembiapoukapykuérare ikatu haĝua jaguereko tapiate Ijespiritu ñanendive. Ohasávo tiempo, ñañeha’ãvo ha’e peteĩ Túva, Ta’ýra ha Espiritu Santo ndive, ikatu japarticipa Inaturaleza divina-gui.
Santidad ha’e ñañongatu ñane konveniokuéra
Jahechakuaa hetaiterei prueba, tentación ha jehasa’asykuéra ikatúva ñanemomombyry opa mba’e ivirtuoso, ha digno de alabanza-gui Tupã renondépe; upevére, ñane experienciakuéra ko yvýpe ome’ẽ ñandéve oportunidad jaiporavo haĝua pe santidad. Hetave vece umi sakrifisio jajapóva ñañongatu haĝua ñane konveniokuéra ha’e pe ñanesantifikáva.
Ahecha santidad Evangeline rovápe, peteĩ mitãkuña oguerekóva trece año Ghana-pegua. Peteĩ oñongatuháicha ikonvenio ha’e omomorãvo illamamiento presidenta ramo clase de Abejita-pe. Mirĩ reheve omombe’u ohoha iñamigakuéra rógape, umi mujeres jóvenes menos activas, ojerure haĝua ituvakuérape oheja haĝua toho hikuái tupaópe. Umi túva ha sy he’i chupe hasyha domingokue ta’ýara ha tajyrakuéra ojapóva’erãgui hembiapokuéra hógape, upévare Evangeline oho ha oipytyvõ chupekuéra hempiapokuéra reheve, ha iñeha’ã rupi py’ỹi ojeheja iñamigakuérape toho hikuái tupaópe.
Ñañongaturõ umi konvenio correspondiente, umi sacerdocio ordenanza sagrada ñanemoanbuéta, ñanemomarandúta ha ñanembosako’íta jaike haĝua Ñandejára presencia-pe. Jagueraha mba’epohýi oñondive; ñañemombarete ojupe. Jajoko ñane angaipa jora ñame’ẽvo alivio espiritua ha temporal oikotevẽvape, iñembyahýiva, ijopývova ha hasykatúvape. Jaiko ko mundo mara’ỹme ñañongatúvo pe dia de Reposo ha dignamente jarrecibi pe Santa Cena Ñandejára ára marangatúpe.
Jahovasa ñande familiakuéra ha jajapo ñande rógagui tenda santo. Jajoko ñande potapykuéra ikatu haĝua ñanerenyhẽ peteĩ mborayhu potĩ ha odurátava. Jaipyso ñande po ñande rapichakuérape py’aporã ha poriahuvereko reheve, ha ha’e Tupã testigokuéra; oiko ñandehegui Sion tavaygua, oguerekóva peteĩ korasõ ha voluntad, peteĩ tavaygua potĩ ovivíva joaju ha tekojojápe. “Sion okakuaava’erã porãngue ha santidad-pe.”
Hermanakuéra, tapeho templope. Ha’étarõ ñande peteĩ tavaygua santo oĩva preparado orrecibi haĝua pe Salvador-pe Ijejupe, ñapu’ãva’erã ha ñamonde ñande ao porãnguéra. Mbarete ha honor reheve, jaheja umi yvóra rape ha ñañongatu ñane konveniokuéra ikatuhaĝuaicha [ñañemonde] pureza reheve, heẽ, tekojoja ao reheve.”
Pe Santidad ha’e jajagarra Espiritu Santo ñande guía ramo.
Santidad ha’e peteĩ don Espiritu rehegua. Ja’acepta upe don jadecidivove jajapo umi mba’e ombokakuaáva pe Espiritu Santo poder santifikador ñande rekovépe.
Marta orrecibi ramo Jesucristo-pe hógape, oñandu tuicha deseo oservi porãve haĝua Ñandejárape. Iñermana Maria odecidi oguapývo “Jesús py gotyo” ha ohendu Iñe’ẽ. Marta ikane’o vove oservihaguére pytyvõ’ỹre, ojeplagea: “Ñandejára, nanemolestái piko che hermana oheja aservi che’año?”
Chegustaiterei umi ñe’ẽ pe jeja’o vevyivévagui ikatúva añe’imagina. Mborayhu porã ha poriahuvereko opave’ỹva reheve, pe Salvador oñemoñe’ẽ:
“Marta, Marta, nerembiapoiterei ha rejepy’apy heta mba’e rehe.
“Ha katu peteĩ mba’énte tekotevẽ; ha Maria oiporavo pe pehengue iporãva, ndojepe’amo’ãiva chugui.”
Hermanakuéra, oikota ramo ñandehegui santa,, ña’aprendeva’erã jaguapývo pe Santo de Israel py gotyo ha ñame’ẽ tiempo santidad-pe ĝuarã. ¿Ñamboyke piko pe teléfono, pe lista interminable umi mba’e jajapova’erãgui ha umi tembiapo ko mundo-gua? Ñembo’e, estudio, ha jasegui Tupã ñe’ẽme.oinvita Imborayhu purifikador ha sandor oike haĝua ñane ángape.. Pededika tiempo ha’e haĝua santa ikatu haĝuaicha ñanerenyhẽ Isagrado Espiritu santifikadorgui. Espiritu Santo ñande guía ramo, ñaiméta preparada jarrecibi haĝua pe Salvador-pe santidad porãnguépe.
Pe santidad ha’e oiko ñandehegui santo Jesucristo expiación rupive.
Umi Rey Benjamin ñe’ẽ inspirado-pe he’iháicha, umi oikóvagui santo Jesucristo expiación rupive ha’e umi sumiso, manso, humilde, paciente ha henyhẽva mborayhúgui, pe Salvador ha’eháicha. Ha’e oprofetisa Jesucristo, “Ñandejára Ypu’akapáva orreina, ha’eva’ekue, ha ha’éva eternidad-gui eternidad-pe, oguejýta Yvagagui kuimba’ekuéra ra’y apytépe; ha oikóta peteĩ tabernáculo de barro-pe”. Ou ohovasa haĝua hasývape, ndoguatáivape, ohendu’ỹvape, ha ohecha’ỹvape ha omopu’ã haĝua tekovépe umi omanova’ekuépe, ha upevére, osufri “hetave yvypóra ikatúvagui osufri omano’ỹre.” Ha jepe Ha’e rupive mante oukuaa pe salvación, opuka hese hikuái, ombyepoti ha omoĩ chupe kurusúre; ha katu pe Tupã Ra’y opu’ã pe ñeñotỹhágui opavave ñande ikatu haĝua ñavence pe ñemano. Ha’e ha’e pe oñepresentátava ohusga haĝua ko mundo-pe tekojoja-pe; Ha’e ha’e pe ñanerredimítava opavavépe; Ha’e ha’e pe Santo de Israel. Jesucristo ha’e pe santidad porãngue.
Rey Benjamin tavayguakuéra ohendu vove iñe’ẽnguéra, ho’a yvýpe, tuichaitereígui imirĩ ha reverencia ñane Tupã grasia ha gloria rehe. Ohechakuaa hikuái ijestado carnal. ¿Ñañeme’ẽ piko en cuenta ñadependepaha Cristo, Ñandejára grasia ha poriahuverekógui? Jahechakuaa piko ha’eha Cristo rupive jahupytyha opa don porã temporal ha espiritual? ¿Ñanemandu’a piko ñande Ru plan de felicidad-pe oĩháicha, py’aguapy ko tekovépe ha gloriakuéra eternidad-pe ha’e ñanemba’e pe Isanto Ta’ýrape ha Ha’e rupi mante?
Añembo’e tajajoaju rey Benjamín tavayguakuéra ndive he’i’atãrõ peteĩ ñe’ẽme: “O eguereko poriahuvereko, ha eiporu pe Cristo ruguy oporoexpiáva oñeme’ẽ hağua oréve ore angaipa jora, ha oñemopotĩ hağua ore korasõkuéra; rogueroviágui Cristo-pe, pe Tupã ra’y, ojapova’ekue yvága ha yvy, ha opa mba’e.”
Atestifika jajurõ pe Santo de Israel rendápe, Ijespiritu oguejýta ñande ári ñanerenyhẽ haĝua vy’apavẽgui, ha jarrecibi haĝua ñane angaipa jora ha jaguereko haĝua py’aguapy ñane conciencia-pe.
Ñande Ru Yvagagua ome’ẽ opavave ñandéve pe kapacida ha’e haĝua santa.Tajajapo opa ikatumíva ñañongatu haĝua ñane konveniokuéra ha jajapo Espiritu Santo-gui ñande guía. Jesucristo-re jerovia reheve oiko ñandehegui santa Ijexpiación rupive, jahupyty haĝua pe inmortalidad ha vida eterna, ha ñame’ẽ Tupãme ñande Túva pe gloria Héra omerecéva. Taha’e ñande rekove peteĩ ofrenda sagrada ñañepresenta haĝua Ñandejára renondépe pe santidad porãnguéme. Jesucristo réra sagrádope. Amén.