Plano sa Langitnong Amahan alang sa mga Pamilya
Ang mga pagtulun-an, mga ordinansa, ug mga pakigsaad diha sa templo mopanalangin sa tanang pamilya sa yuta.
Mga paghulagway pinaagi ni Shawna Tenney
Bag-ohay lang, si Sister Uchtdorf ug ako mitambong sa bunyag sa usa sa among apo sa tuhod. Samtang nagtan-aw kami sa daghang henerasyon nga malipayong nagsaulog niini nga panghitabo, gibati namo ang grabe nga pasalamat ngadto sa atong Langitnong Amahan alang sa Iyang plano sa kaluwasan para sa Iyang mga anak. Among nabati kon unsa ka importante ang pamilya ug sagradong mga pakigsaad ngadto Kaniya sukad pa sa sinugdanan.
Makita ang kamahinungdanon niini diha sa asoy sa Daang Tugon bahin sa matinud-anon nga si Jacob, kinsa mihimo og layo ug lisod nga pagbiyahe aron mangita ug asawa, magminyo sulod sa pakigsaad, ug magtukod og usa ka pamilya.
Usa ka gabii, mihunong si Jacob aron mopahulay apan nakakita lamang og mga bato aron iyang unlanan. Seguro grabe gayod siya kakapoy, tungod kay nakatulog gihapon siya—ug nagdamgo.
Nakita ni Jacob ang “usa ka hagdan nga misangko sa langit: sa maong hagdan may mga anghel sa Dios nga nagsaka-kanaog.
“Nakita usab niya ang Ginoo nga nagbarog tupad kaniya ug miingon, Ako ang Ginoo, ang Dios ni Abraham ug ni Isaac” (Genesis 28:12–13).
Dayon ang Ginoo mihimo og pipila ka importanteng pakigsaad nga gisaad ngadto ni Jacob—mga saad nga gihimo usab Niya ngadto sa amahan ug apohan ni Jacob, si Isaac ug Abraham, naglakip sa:
-
Mga saad nga si Jacob mahimong amahan sa “daghang kanasoran” (Genesis 28:3, 14).
-
Usa ka gisaad nga yuta alang sa kaliwat ni Jacob (tan-awa sa Genesis 28:4, 13).
-
Mga saad nga pinaagi ni Jacob ug sa iyang “kaliwat … tanang katawhan sa kalibotan … panalanginan” (Genesis 28:14).
Grabe ka sagrado ang kasinatian ni Jacob nga siya mipahayag, “Ania diay ang Ginoo niining dapita. … Kini gayod ang gipuy-an sa Dios ug ang ganghaan sa langit” (Genesis 28:16–17). Ug busa, ginganlan ni Jacob ang maong dapit nga Betel, nga nagpasabot og “balay sa Dios” (tan-awa sa Genesis 28:19).
Ang mga templo susama kaayo sa hagdan nga nakita ni Jacob. Ang mga pagtulun-an, mga ordinansa, ug mga pakigsaad sa balay sa Ginoo nagkonektar sa langit ug sa yuta. Ang mga pakigsaad mahimong ikompara sa mga ang-ang sa hagdan nga makapaduol nato ngadto sa Ginoo. Ug pinaagi sa atong pagserbisyo diha sa balaang mga templo, atong gipanalanginan ang “tanang katawhan sa kalibotan”—kaniadto, karon, ug sa umaabot.
Ang Malipayong Panlantaw sa Langit
Si Elder Bruce C. Hafen, usa ka emeritus nga sakop sa Seventy, sa makausa nakadawat og tawag sa telepono gikan sa editor sa usa ka nasyonal nga mantalaan nga magasin aron hisgotan ang basahon nga nagsuhid sa kasaysayan sa mga tinuohan mahitungod sa langit sa lainlaing mga relihiyon.
“Nabantayan sa mga tagsulat nga ang publiko mibati og dakong kagutom alang sa langit—mga pamilya sa langit,” miingon si Elder Hafen. Apan “kasagaran sa mga simbahan sa Kristiyano nagtanyag og dyutayng tubag niining personal nga kagutom”—gawas lang sa usa: Ang Simbahan ni Jesukristo sa mga Santos sa Ulahing mga Adlaw.
Diha sa gipahiuli nga Simbahan sa Manluluwas, kita adunay sagrado nga mga templo. Aduna kitay mahangtorong kaminyoon, nga dunay awtoridad sa pagselyo nga mopanalangin lapas pa sa pisikal nga kamatayon. Kita adunay saad sa usa ka mahangtorong kaugmaon kauban ang mga minahal diha sa presensiya sa Amahan ug sa Anak. Tungod niining tanan, nakahukom ang mga tagsulat nga ang konsepto sa Santos sa Ulahing mga Adlaw bahin sa langit mao ang labing hingpit—ug, modugang ko, ang labing malipayon.
Sama sa gitudlo ni Presidente Russell M. Nelson, “Ang Ginoo … mihimo sa yuta nga kita makaangkon og pisikal nga mga lawas ug magmugna og mga pamilya. Siya miestablisar sa Iyang Simbahan sa paghimaya sa mga pamilya. Naghatag Siya og mga templo aron ang mga pamilya magkauban sa kahangtoran.”
Pagpanalipod sa Pamilya
Dili kini makapahibulong kanato nga ang usa ka butang nga labihan ka importante sa plano sa Dios mag-atubang og oposisyon. Miingon si Presidente M. Russell Ballard (1928–2023), “Si Satanas nasayod nga ang pinakaseguro ug ang pinaka-epektibo nga paagi sa pagsamok sa buhat sa Ginoo mao ang pagminos sa pagka-epektibo sa pamilya ug ang pagkabalaan sa panimalay.”
Tungod sa unsay atong nahibaloan, angay lang nga kita maoy usa sa labing kugihan nga mga tigpanalipod sa pamilya diha sa kalibotan.
Unsaon nato kini sa paghimo?
Makahimo kita og “gagmay ug yanong mga butang” (Alma 37:6) nga makapalig-on sa mga relasyon sa pamilya. Kini naglakip sa pagsunod sa mga baroganan nga gilatid diha sa pamahayag bahin sa pamilya: “hugot nga pagtuo, pag-ampo, paghinulsol, pagpasaylo, pagtahod, gugma, kaluoy, buhat, ug maayong makalingaw nga mga kalihokan.” Dili igsapayan unsa ang kahimtang karon sa inyong pamilya, mahimo ninyong mapakita pinaagi sa inyong mga aksiyon nga ang mga relasyon sa pamilya importante nganha kaninyo sa kahangtoran.
Pinaagi sa pagsunod, pagpanalipod, ug pagpakigbahin sa mahangtorong mga kamatuoran kabahin sa pamilya, makatabang kita sa uban nga makita nga “ang pamilya mahinungdanon sa plano sa Tiglalang alang sa walay kataposan nga destinasyon sa Iyang mga anak” ug nga ang “balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangtoran.”
The Chosen One [Ang Usa nga Pinili], ni Dan Wilson
“Ako Nag-uban Kanimo”
Dihang si Sister Uchtdorf ug ako nagtan-aw sa mga sakop sa among pamilya nga mihimo sa sagradong mga pakigsaad ngadto sa atong mahigugmaon, mahangtorong Langitnong Amahan, ang among mga kasingkasing napuno sa hingpit nga kalipay ug pasalamat. Malipayon mi nga dili lang sa among mga anak ug sa ilang mga anak apan usab sa among mga ginikanan ug sa ilang mga ginikanan. Among gipamalandongan uban ang dakong gugma kon sa unsang paagi ang mga pakigsaad sa ebanghelyo naghiusa kanamo latas sa mga henerasyon.
Ang mga panalangin nga gisaad sa Ginoo ngadto ni Abraham, Isaac, ug ni Jacob diha sa iyang damgo adunay kalabotan sa mga pamilya. Ug ila kining gipaabot ngadto sa tanan Niyang mga anak sa pakigsaad—lakip nimo ug nako. “Timan-i,” ang Ginoo miingon, “ako nag-uban kanimo, panalipdan ko ikaw bisag asa ka paingon, … dili ko ikaw biyaan” (Genesis 28:15).
Ako mosaad nga samtang kamo mosunod ug mopakigbahin sa plano sa atong Langitnong Amahan alang sa mga pamilya, Siya mag-uban kaninyo, ilabi na kon moabot ang mga pagsulay nganha kaninyo o sa inyong mga minahal. Siya motabang kaninyo, mosuporta kaninyo, ug mogiya kaninyo ngadto sa hingpit nga kalipay uban Kaniya, kauban sa Iyang Anak nga si Jesukristo, ug uban sa inyong pamilya—sa kahangtoran.