Pasko sa Pagkabanhaw sa Tanang Panahon
Paghimo sa Pasko sa Pagkabanhaw nga usa ka panahon sa paglaom pinaagi sa pagpaduol ngadto sa Manluluwas.
Mga Paghulagway pinaagi ni Toby Newsome
Sa unang Dominggo sa Pasko sa Pagkabanhaw, dihang si Maria Magdalena ug ubang mga babye mibisita sa lubnganan ni Kristo, ang mga anghel misulti kanila, “Wala na siya dinhi: kay siya nabanhaw” (Mateo 28:6). Kini nga mensahe nagdala og dakong paglaom ngadto sa Iyang mga disipulo human sa kasakit nga nasaksihan sa Iyang Paglansang.
Ang labing maayong balita? Kana nga mensahe tinuod gihapon. Si Kristo nabanhaw gihapon. Nagmadaogon gihapon Siya batok sa kamatayon ug sa sala. Ug ang paglaom nga naggikan sa Iyang Pagkabanhaw anaa gihapon para kanimo—dili lang sa Pasko sa Pagkabanhaw, apan sa tanang panahon!
Ang Pasko sa Pagkabanhaw dili lang ang adlaw nga makahatag ka og pasidungog sa Pagkabanhaw. Sulayi ang pipila niini nga mga sugyot sa paghimo sa Pasko sa Pagkabanhaw—ug ang mga pagsaulog niini sa Manluluwas ug sa Iyang Pag-ula ug Pagkabanhaw—nga usa ka tibuok panahon sa paglaom ug hingpit kalipay.
Tun-i ang Kinabuhi sa Manluluwas
Ang mga kasulatan usa ka gamhanan nga himan sa pagtabang nimo nga makaila ni Jesukristo sa personal nga paagi ug makapalig-on sa imong pagtuo ngadto Kaniya. Atol sa panahon sa Pasko sa Pagkabanhaw, pwede kang motutok sa imong pagtuon sa kasulatan sa kataposang semana sa Iyang kinabuhi o sa Iyang pagbisita sa taga-Amerika isip nabanhaw nga Manluluwas sa kalibotan. Ang pagbasa niining gamhanan nga asoy makatabang nimo nga mobati sa gugma sa Manluluwas alang kanimo ug mas masabtan ang Iyang Pag-ula ug Pagkabanhaw.
Kon dili ka segurado kon hain nga mga tudling ang tutokan, pwede kang mosulay sa pagsunod sa giya sa pagtuon sa Pasko sa Pagkabanhaw diha sa Dali, Sunod Kanako o sa ubang giya sa pagtuon nga gimantala sa ChurchofJesusChrist.org.
Pag-apil diha sa Buhat sa Templo
Ang kadaogan ni Kristo batok sa kamatayon ug ang kahibalo nga kita usab mabanhaw mao “ang labing mahimayaon sa tanang mensahe sa katawhan.” Tungod sa Iyang Pag-ula ug Pagkabanhaw, ang atong mga pamilya magmahangtoron, ug ang tanan natong mga katigulangan adunay oportunidad sa paghimo og sagradong mga pakigsaad.
Mahimo kang magsaulog sa Pagkabanhaw ni Jesukristo ug magpadayon sa Iyang buhat sa pagtubos niadtong anaa sa bilanggoan sa espiritu (tan-awa sa 1 Pedro 3:18–20) pinaagi sa pagbuhat og family history ug buhat sa templo. Ang imong pagserbisyo sa templo nagtugot niadtong mga espiritu sa pagpili sa pagdawat usab sa tanang panalangin sa Pag-ula ni Kristo.
Pagserbisyo sa Uban sama sa Buhaton ni Kristo
Si Jesukristo mibayaw ug miserbisyo sa uban sa tibuok Niyang mortal nga pagpangalagad—bisan anaa sa krus. Mahimo nimong pasidunggan ang Iyang ehemplo pinaagi sa pagserbisyo sa mga tawo diha sa imong palibot sa paagi nga Iyang buhaton. Bisan ang yano nga mga buhat sa kaayo sama sa kanunayng pagpahiyom, tinud-anay nga pagpaminaw sa uban, ug pagtabang sa balay makahimo og palibot sa Kristohanong gugma. Kon moserbisyo ka sa uban, ikaw ug sila mahimong mobati sa paglaom ug kamaayo sa panahon sa Pasko sa Pagkabanhaw.
Pag-ambit sa Sakramento nga dunay Katuyoan
Ang Manluluwas Mismo miestablisar og tradisyon sa pagtabang nimo nga mas mohinumdom Kaniya kaysa ubang butang: ang sakramento. Ang pag-ambit sa sakramento nagpakita nga andam ka nga “kanunay mohinumdom kaniya ug mosunod sa iyang mga sugo,” ug agig balos Siya misaad nga ikaw sa “kanunay makabaton sa iyang Espiritu uban [kanimo]” (Doktrina ug mga Pakigsaad 20:77). Kana usa ka gamhanan nga saad! Kon moambit ka sa sakramento kada semana, makasugod na ka sa pagbati sa kamatuoran bahin niana nga saad atol sa Pasko sa Pagkabanhaw ug sa kanunay.
Sulayi sa pagpamalandong ang pagpangalagad, Pag-ula, ug Pagkabanhaw ni Jesukristo samtang moambit ka sa sakramento. Pag-ampo sa sinserong paagi, ug sulayi ang paghunahuna kon sa unsang paagi ang Iyang sakripisyo makapanalangin kanimo sa personal nga paagi.