Jakob H.

Ang akong lolo namatay atol sa pagdawat nako sa Melchizedek nga Pagkapari. Ang akong lolo kanunay gayod nga nagsuporta nako, ug nianang adlawa, ang akong lolo dili na makaapil diha sa sirkulo—sa unang higayon sa akong tibuok kinabuhi, sa adlaw nga espesyal alang kanako.

Apan atol sa ordinansa, gibati gyod nako ang Espiritu. Gibati nako ang gugma gikan sa akong amahan ug sa ubang mga tawo didto, ingon man sa akong lolo. Mibati ko nga mapasalamaton kaayo sa ilang mga pagpamatuod. Espesyal gayod kadto nga adlaw ug usa ka emosyonal nga yugto para kanako.

Aron makabaton og koneksiyon tali kanako ug sa Espiritu Santo, kinahanglan nakong tugotan Siya nga mosulod. Usa ka butang nga akong gibuhat mao ang pagbasa og usa ka kapitulo sa Basahon ni Mormon kada adlaw.

Adunay mga panahon nga mas motutok ko sa pag-eskwela o sa trabaho kaysa pagbasa sa mga kasulatan o pag-adto sa seminary. Kadto nga mga higayon lisod gayod kaayo. Apan matag higayon, magsugod ko sa pagbasa sa mga kasulatan pag-usab. Akong giingnan akong kaugalingon, “Sige lang, kinahanglan nimong mopadayon.” Kinahanglan gyod nako, kay kon dili ko mobasa sa mga kasulatan, morag adunay kulang.

Sa Austria, ang bakasyon sa eskwelahan magsugod sa sinugdanan sa Hulyo hangtod sa unang semana sa Septiyembre, ug niini nga panahon dili ka moadto sa seminary. Apan ang FSY nagpahinumdom kanako sa pagbasa sa mga kasulatan. Mahimo kang mobasa kada adlaw, bisan lang og usa ka bersikulo o usa ka kapitulo.

Hatagi lang og panahon ang Dios ug si Jesukristo. Makakat-on ka Kanila diha sa mga kasulatan. Kon nanlimbasog ka sa pagbasa, paggahin lang og 10 minutos kada adlaw, bisan sa break sa eskwelahan o bisan unsa, ug mapanalanginan ka.

Ang pagbasa sa mga kasulatan nakapausab gayod kanako.