Dili Gayod Mawad-an og Paglaom
Kon atong hunahunaon kon unsay nahimo sa Manluluwas alang kanato, kita makapadayon sa unahan nasayod nga Siya mag-uban kanato sa kanunay.
Paghulagway ni Albert Espi
Hunahunaa nga gigapos ang imong mga kamot diha sa imong likod, ang imong mga tiil gigapos, ug dayon ihulog ka sa tulo ka metros nga giladmon sa swimming pool! Unsa ang imong buhaton? Maningkamot ka ba nga magpabiling maglutaw ug kapoyon ang imong kaugalingon, o magpabiling kalma ug mangita og paagi aron makalingkawas niining lisod nga sitwasyon?
Kadto nga pagbansay aron mahimong mga United States Navy SEAL nag-atubang gayod niini nga hagit. Gitawag kini og “drown-proofing [teknik sa paglahutay nga dili malumos].” Ang tumong mao ang mapamatud-an ang ilang abilidad nga makalahutay sa tubig sa nagkalain-laing mga kahimtang. Sa higayon nga gaposon ug ihulog sila sa tubig, kabahin sa pagsulay ang pagtiglom nila ngadto sa ilalom sa pool nga dili mataranta, mogamit sa ilang mga tiil sa pagtulod ngadto sa ilalom, mobalik sa ibabaw, ug dayon moginhawa kadali sa dili pa motiglom pag-usab. Kini balik-balikon sulod sa gitakda nga oras.
Kadaghanan nato dili moagi sa pagbansay sa Navy SEAL, apan tingali adunay pipila ka butang nga atong makat-onan gikan niini—ug basin makaangkon pa gani og mas dakong pasalamat kang Jesukristo ug sa Iyang Pag-ula sa paglabay sa panahon.
Ang Imong Manluluwas Diha sa Tanang Butang
Ang mga SEAL nagsalig sa ilang pagbansay ug pagkondisyon aron makalampos niining lisod kaayo nga pagsulay—ug kinahanglan nilang kompletohon kining tanan sa ilang kaugalingon. Kitang tanan moagi og mga hagit sa kinabuhi, apan dili parehas sa mga SEAL sa ilang pagbansay, kita dili kinahanglang moagi sa atong mga hagit nga mag-inusara.
Kon kita nabug-atan sa sala, kabalaka, kaguol, o bisan unsang ubang hagit ug mibati nga morag nagka-unlod, makaduol kita ngadto ni Jesukristo. Kon mibati kita nga morag anaa sa pinakailalom ug dili na makatunga, mahimo natong hinumdoman nga ang Manluluwas nakasinati na niini, ug Siya mohatag kanato og kusog aron makasaka pataas, moginhawa pag-usab, ug magpadayon. Uban Niya, kita dili gayod mawad-an og paglaom.
Si Jesukristo ang imong Manluluwas gikan sa sala ug kamatayon. Si Jesukristo ang imong Manunubos kon masayop ka ug kinahanglan nga mahimong mamaayo sa espirituhanong paagi. Si Jesukristo ang imong Tig-ayo gikan sa emosyonal, espiritwal, ug usahay sa pisikal nga sakit ug kasakit nga Siya lamang ang makaayo. Kini ug ang ubang mga ngalan ni Jesukristo nagtumong sa kamatuoran nga Siya mao ang Usa nga maduolan, ilabi na kon ang kinabuhi lisod kaayo.
Sa nagkaduol na ang Pasko sa Pagkabanhaw, atong saulogon ang Pagkabanhaw ni Jesukristo. Buhi Siya! Ug tungod kay buhi Siya, kita mabuhi pag-usab ug makaangkon sa saad sa kinabuhing dayon. Apan sa wala pa ang Iyang Pagkabanhaw, ang Manluluwas nag-antos sa Getsemani ug namatay diha sa krus alang kanato tungod kay nahigugma Siya kanato. Siya “mikunsad paubos sa tanang butang”—nag-antos dili lang sa atong mga sala, apan nakasinati usab sa tanang matang sa sakit, kasubo, balatian, ug tentasyon—aron Siya masayod kon unsaon pagtabang kanato (Doktrina ug mga Pakigsaad 88:6; tan-awa usab sa Alma 7:11).
Tan-awa ang Imong Paglaom diha Kaniya
Dihang gilansang ang Manluluwas, morag ang tanan walay paglaom. Ang Iyang mga disipulo naguol pag-ayo. Misunod sila Kaniya, mituo Kaniya—ug karon wala na Siya. Sa dihang gibutang si Jesus sa lubnganan, naguol sila ug walay kasegurohan. Apan human sa tulo ka adlaw, pagka Dominggo, ang lubnganan wala nay sulod. Nabanhaw si Jesukristo! Kon unsa ang daw nawala, karon nahimong paglaom!
Kon ang mga butang daw ngitngit ug makapawala sa kadasig—sama nga gihulog ka ngadto sa pool nga gigapos ang imong mga kamot ug tiil—ug wala kay makitang paagi aron makalingkawas, paggahin og panahon sa pagpangita og paglaom diha kang Jesukristo, ug hinumdomi nga wala pa ka sa kataposan.
Ang Manluluwas wala makadawat nianang hingpit nga kalipay sa Dominggo sa Pasko sa Pagkabanhaw nga wala una ang paglahutay didto sa Getsemani ug sa krus sa wala pa ang tulo ka adlaw. Busa, kon nag-atubang ka og kalisdanan, ayaw gayod pang-undang! Si Elder Joseph B. Wirthlin (1917–2008) sa Korum sa Napulog Duha ka Apostoles sa makausa miingon, “Diha sa kangiub sa atong kasub-anan, ang Dominggo moabut. … Bisan unsa ang atong kasub-anan, ang Dominggo moabut.”
Pinaagi sa Iyang maulaong sakripisyo ug Pagkabanhaw, si Jesukristo kanunayng anaa aron motabang nimo nga makakaplag og kalinaw ug mouswag ngadto sa labaw pa sa imong gilaoman.