Ang Pasko sa Pagkabanhaw Nagpakita sa Atong Tinuod nga Bili diha ni Kristo

Sa Pasko sa Pagkabanhaw atong gisaulog ang kamatuoran nga tungod ni Kristo, kita mahimong mausab. Kon kita maghinulsol, atong mapakita Kaniya nga gusto kitang mag-usab.

Sa una, mawad-an gyod ko og kadasig tungod sa akong mga sala ug mga sayop. Mag-ampo ko ug dayon mohimo na usab sa samang sayop. Maglibog ko. Naghunahuna ko, “Angayan ba ko nga maghinulsol?” Apan dayon nakapaminaw ko sa pakigpulong ni Sister Tamara W. Runia “Ang Imong Paghinulsol Dili Makapabug-at ni Jesukristo—Kini Makapabati Niya og Kamaya!” Ang iyang pakigpulong mao ang tubag nga akong gikinahanglan. Kon kita anaa sa labing mahagitong panahon sa atong kinabuhi, si Kristo mobayaw kanato ug moawhag kanato. Ang paghinulsol mao ang labing maayo nga paagi sa pagpadayon.

Mianhi si Jesukristo sa yuta aron mobayad sa bugti para kanato. Pinaagi sa paghinulsol ug pagsunod sa Iyang ehemplo, atong makat-onan kon unsaon nga mahimong mas maayo sa umaabot.

Panahon sa Pasko sa Pagkabanhaw, atong gisaulog ang kadaogan ni Kristo. Tungod sa Iyang pagsakripisyo, dili na kinahanglan nga mawad-an kita og kadasig. Pwede kitang magpaduol ngadto Kaniya, ug pinaagi sa paghinulsol, makaandam kita alang sa Iyang Ikaduhang Pag-anhi. Sa akong nasod, duna mi mga kalihokan nga makatabang namo nga mahinumdom kon unsa ka importante ang Pasko sa Pagkabanhaw. Ang tanan magdala og pagkaon ug mopakigbahin kami og mga kasulatan ug among mga pagpamatuod sa usag usa. Manganta mi og espesyal nga mga himno bahin sa Pagkabanhaw ni Kristo. Mao kana ang labing maayo nga bahin sa Pasko sa Pagkabanhaw alang kanako.

Ganahan ko sa kasulatan sa Doktrina ug mga Pakigsaad 93:1: “Sa pagkatinuod, sa ingon niini misulti ang Ginoo: Mahitabo unya nga ang matag kalag nga mosalikway sa iyang mga sala ug moduol kanako, ug motawag sa akong ngalan, ug motuman sa akong tingog, ug mohupot sa akong mga sugo, makakita sa akong nawong ug masayod nga ako kini.” Kon maghinulsol kita, si Kristo mohatag kanato og kahigayonan! Panahon sa Pasko sa Pagkabanhaw, mabati nato ang Iyang gugma ug nasayod kanunay nga kita bililhon ngadto ni Kristo.