Dali, Sunod Kanako
Exodo 12
Ang Atong Pagpalabay—ang Sakramento
Adunay komon nga koneksiyon tali sa karaang Pagpalabay ug sa atong sinemanang sakramento.
Mga paghulagway pinaagi ni Alyssa Tallent
Sa wala pa ang karaang mga Israelita makabiya sa pagkaulipon sa Ehipto, sila gisugo sa pagtuman og piho nga mga instruksiyon gikan sa Ginoo aron ang tiglaglag nga anghel molugway kanila, o molabay kanila (tan-awa sa Exodo 12). Human sila mobiya sa Ehipto, ang mga Israelita nagpahigayon og kasaulogan matag tuig, nga gitawag og ang Pagpalabay, aron mohinumdom kon giunsa sa Ginoo pagpalingkawas ang Iyang katawhan sa pakigsaad.
Atol sa kataposang semana sa Iyang mortal nga kinabuhi, si Jesukristo diha sa usa ka tingkaon sa Pagpalabay. Karon atong gitawag kana nga tingkaon og ang Kataposang Panihapon. Ang Manluluwas migamit niana nga okasyon aron ipaila ang ordinansa sa sakramento, nga atong giapilan karon matag semana. (Tan-awa sa Mateo 26:26–28; Lucas 22:19–20; Doktrina ug mga Pakigsaad 20:77, 79.)
Ania ang duha ka komon nga mga koneksiyon tali sa unang Pagpalabay, sa Kataposang Panihapon sa Ginoo, ug sa sakramento karon nga makatabang kanato nga mahinumdom sa atong kalingkawasan pinaagi sa Manluluwas.
Ang Pan
Pagpalabay: Sulod sa pito ka adlaw, ang mga Israelita mokaon og walay patubo nga pan (nga mas dali buhaton ug dili dali nga agup-opon ug madaot).
Kataposang Panihapon: Si Jesukristo mipanalangin ug mipikas-pikas sa pan sa Pagpalabay, ug Iya kining gihatag ngadto sa mga disipulo. Siya misulti nila nga mokaon niini isip paghinumdom sa Iyang lawas, nga Iyang nahibaloan nga sa dili madugay mabun-og ug mamatay apan mobangon pag-usab.
Sakramento: Kita mokaon sa pan isip paghinumdom sa lawas ni Jesukristo.
Si Jesukristo mao ang Pan sa Kinabuhi. Pinaagi sa Iyang Pagkabanhaw, kitang tanan mabanhaw nga anaay hingpit, dili madunot, dili mamatay nga mga lawas. Siya mipalingkawas kanato gikan sa kamatayon.
Ang Dugo sa Nating Karnero
Pagpalabay: Ang nating karnero sa Pagpalabay walay tatsa, usa ka tuig ang kagulangon sa nating karnero nga laki. Kini patyon, ug ang dugo niini kuhaon ug isulod sa panaksan. Ang isopo (usa ka hilba) ituslob sa panaksan ug gamiton sa pagpahid sa dugo palibot sa gawas nga babag sa pultahan sa balay. Kini mao ang panggawas nga timailhan nga nagpaila sa katawhan sa pakigsaad sa Ginoo nga palabyan sa tiglaglag nga anghel aron sila mapalingkawas gikan sa pagkaulipon sa Ehipto.
Kataposang Panihapon: Si Jesukristo migamit og bino aron magrepresentar sa Iyang dugo. Iyang gisultihan ang Iyang mga disipulo sa pag-inom niini isip paghinumdom sa Iyang dugo, nga ipaagas alang kanila alang sa kapasayloan sa mga sala isip kabahin sa bag-o nga pakigsaad.
Sakramento: Kita moinom og tubig isip paghinumdom sa dugo ni Jesukristo.
Si Jesukristo mao ang Kordero sa Dios. Ang Iyang dugo gipaagas samtang Siya miantos alang sa atong mga sala ug mga kasakit. Ang Iyang dugo—Iyang sakripisyo—naglimpyo kanato. Siya nagtubos kanato gikan sa sala.