Unsaon Nako Pag-angkon og Kalamposan ug Kalipay sa Akong Kinabuhi?

Ang pagbati sa pagpasalamat mahinungdanon kaayo alang sa kalamposan ug kalipay nga imong gilaoman nga masinati. Ang pagpasalamat motabang nimo nga mapainubsanon. Ang pagpasalamat nag-abli sa imong mga mata sa katinuod sa Dios ug sa gugma sa uban. Kini nakahimo nga ang tabang nga imong madawat sa kinabuhi makapabayaw nimo imbes nga modala nimo nga magsalig sa uban.

Sa laing bahin, ang kakulang sa pagpasalamat moresulta sa pagbati nga adunay katungod, o tingali kini usa ka paghulagway sa anaa na nga pagbati sa katungod. Bisan unsa pa man, ang pagtuo nga ang kalibotan o ang laing tawo, gobyerno, o entidad ang responsable sa pagtubag sa imong mga panginahanglan ug sa pagseguro sa imong kahupayan ug kalipay makapaluya.

Ikaw nasayod nga tungod sa tanan nimong kahago ug personal nga paningkamot nga ang imong kinabuhi mao ang imong responsibilidad. Ang imong pagpili sa kataposan makahimo sa kalainan alang kanimo. Ang akong tambag nimo mao ang pagdawat sa responsibilidad—andam, malipayon, mahinamon—sa imong kaugalingon, kon unsa ka, ug kon unsa ka mamahimo, ug agig dugang, sa impluwensiya nga pwede nimong gamiton sa kalibotan.

Ang mahinungdanong elemento nianang personal nga responsibilidad mao ang pagbati sa personal nga pagkamaytulubagon ngadto sa Dios. Matag usa kanato utangan sa atong paglalang ug sa mortal nga kinabuhi ngadto Kaniya. Ang kapasidad sa pagkinabuhi, sa pagpili, ug sa paglihok atong nautang ngadto Kaniya kinsa “nanalipod [kanato] sa matag adlaw, pinaagi sa paghatag [kanato] og ginhawa, aron [kita] mabuhi ug molihok ug mobuhat sumala sa [atong] kaugalingong kabubut-on.”

Nakautang kita sa atong katubsanan gikan sa kamatayon, espirituhanon man ug pisikal, ngadto sa Anak sa Dios, si Ginoong Jesukristo. Ang Amahan mipadala sa Iyang Anak aron “iisa sa krus” aron, sama sa gipasabot sa Manluluwas, “kay ako gituboy man sa mga tawo niana usab ang mga tawo ituboy sa Amahan, sa pagbarog sa akong atubangan, aron pagahukman sa ilang mga buhat, kon sila matarong man o kon sila daotan.”

Adunay Adlaw sa Paghukom, ug ang hugot nga pagtuo sa imong Langitnong Amahan ug ni Ginoong Jesukristo ug sa Ilang katungod sa pagdumala sa imong kinabuhi mogiya kanimo sa pagbuhat sa matarong nga butang. Maghatag usab kini kanimo og gahom aron makabaton sa Ilang tabang, ug pinaagi niana nga tabang nga mangahas ug mobuhat sa dagkong mga butang. Ang akong pangamuyo kanimo mao ang pag-abiabi sa imong Langitnong Amahan, imong Manluluwas, ug sa Balaang Espiritu nga hingpit nga maanaa sa imong kinabuhi. Ug dili lang ang pag-abiabi, kondili ang paghangyo ug pagpaningkamot alang sa pagtuman sa Ilang saad nga kanunay nimong mabatonan ang Balaang Espiritu nga mag-uban kanimo.

Usahay ang inyong henerasyon gihulagway nga nagkagrabe ang kabalaka ug kasagaran nag-antos sa depresyon. Pero kon husto o dili husto kining mga pagsukod, usa ka butang ang segurado—ang kinabuhi nga walay Dios kasagaran puno sa kahadlok ug kabalaka.

Sa laing bahin, ang pagsalig ug kalinaw moabot diha sa paghimo sa kinabuhi nga usa ka hiniusa nga paningkamot uban sa Dios. Nagpasabot kini sa pag-uban sa hugot nga pagtuo diha sa Dios ug ni Kristo uban ang madasigon nga pagbati sa personal nga responsibilidad. Kini nga konsepto masabtan diha sa tambag nga: “Pag-ampo ingon og ang tanan nag-agad sa Dios. Pagtrabaho ingon og ang tanan nag-agad diha kanimo.”

Ako namulong bahin sa pagpasalamat, personal nga responsibilidad, ug hugot nga pagtuo diha sa Dios ug ni Kristo. Kon ang matag usa niini anaa sa imong kinabuhi, wala akoy kahadlok alang sa imong kaugmaon. Oo, ang mga hagit sa daghang matang moabot. Walay usa kanato ang hingpit nga makalikay niini; wala kini gituyo nga mahimong lahi. Apan tungod niini nga mga kalidad, magmalamposon ka sa imong mga hagit ug malikayan ang sobra nga wala kinahanglana nga mga kalisdanan. Si Presidente Russell M. Nelson (1924–2025) mitudlo:

“Kon ang sentro sa atong kinabuhi anaa sa plano sa Dios sa kaluwasan, … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay. … Alang sa mga Santos sa Ulahing mga Adlaw, si Jesukristo mao ang hingpit nga kalipay!”

Makasalig ka sa gugma sa imong Langitnong Amahan, sa grasya sa Iyang Bugtong Anak, ug sa inspirasyon sa Iyang Balaang Espiritu. Tinuod Sila. Buhi Sila. Nakaila Sila kanimo, ug nahigugma Sila kanimo. Gamita ang Ilang tabang, manubag Kanila alang sa imong kinabuhi, ug mahimong haligi sa kusog ug kalig-on alang sa uban. Magmapasalamaton alang sa padayon nga mga panalangin nga gibu-bo diha kanimo, bisan sa pagginhawa sa matag yugto.