Usa ka Biyahe padulong sa Templo

Paghulagway pinaagi ni Katelyn Budge

Adunay higayon nga wala ko makabisita sa templo sulod sa mga unom ka tuig. Kini nga mga tuig ang labing ngitngit nga higayon sa akong kinabuhi tungod kay namatay usab ang akong mama sulod niining panahona. Gusto nako nga moadto sa templo, apan mga usa kini ka oras gikan sa akong pinuy-anan, ug wala koy kwarta alang sa sakyanan ug walay modala nako didto.

Dayon sa miaging tuig gitawag ko isip presidente sa klase sa Young Women. Sa dihang ang akong lider sa Young Women mihangyo nako nga tabangan siya sa pagplano og mga kalihokan anang tuiga, ako siyang gisultihan nga ang unang butang nga among buhaton mao ang pag-adto sa templo isip usa ka klase. Sa dihang gipahibalo nako kini ngadto sa young women, mahinamon kaayo sila! Alang sa kadaghanan nila, kini ang ilang unang higayon nga makatambong. Nag-ampo ko ug nagpuasa og maayo samtang nangandam kami alang sa biyahe. Dili ko gusto nga adunay bisan unsa nga makabalda.

Didto sa templo, gibati nako nga nakalingkawas gikan sa matag palas-anon. Misaad ko nga mobisita sa templo sa mas kanunay pa. Nindot kaayo kadto nga kasinatian ug panalangin. Mahinamon kaayo ko nga ako ug ang akong isig ka young women nakaapil sa dako nga buluhaton sa atong Langitnong Amahan.

Nasayod ko nga ang templo mao ang balay sa Ginoo, diin ang sagrado nga mga ordinansa gipahigayon. Didto, kita makahalad og kinasingkasing nga pag-ampo ngadto sa Langitnong Amahan, ug sulbaron Niya ang mga problema ug mga hagit sa Iyang tukmang panahon, mopuno nato sa gugma, ug mohatag nato og walay kataposang kalinaw. Nasayod ko nga kon kita motan-aw ngadto kang Kristo, makita nato ang mga milagro nga atong gikinahanglan. Kita hinigugmang mga anak sa atong Langitnong Amahan, ug Siya adunay dakong buluhaton nga ipabuhat kanato—ang pagpundok sa Israel sa duha ka habig sa tabil.