Ang Akong Hosanna

Usa sa akong paboritong mga kapitulo sa Bag-ong Tugon naghisgot kabahin sa madaogong pagsulod ni Jesukristo sa Jerusalem. Ang katawhan misinggit, “Hosanna sa Anak ni David: Dalaygon ang nagaanhi sa ngalan sa Ginoo; Hosanna sa kahitas-an” (Mateo 21:9). Matag higayon nga makabasa ko niini, maghunahuna ko: Unsa ang akong hosanna?

Ako nagkanga-kanga sa akong tibuok kinabuhi. Usahay bation nako nga napakyas kaayo ug nawad-an og paglaom tungod kay dili nako mapahayag ang akong kaugalingon sa paagi nga gusto nako. Nangandoy ko nga hingpit nga makasulti o kaha dili na gayod makasulti pag-usab. Kanunay ko nga mabalaka kon ako mosulti atubangan sa uban o gani kon ako mag-ampo og kusog. Hilom ko nga nangamuyo alang sa pailob, kalinaw, ug tabang sa daghang higayon. Kini ang usa sa akong personal nga mga hosanna—ang akong pangamuyo alang sa kalingkawasan.

Sama nga si Kristo wala mobaliwala sa mga pangamuyo sa katawhan sa Jerusalem, Siya wala gayod mobaliwala sa akong pangamuyo. Wala Niya gitangtang ang akong pagkanga-kanga, apan Siya milig-on nako sa mga paagi nga wala nako dahoma. Siya mitabang nako nga mobati og kalinaw sa mga higayon sa kabalaka ug mitabang kanako nga makaamgo nga ang akong tingog, bisan dunay depekto, igo na alang Kaniya.

Ang matag usa nato adunay usa ka butang sa atong kinabuhi nga modasig nato sa pag-ampo. Usahay, tingali bation nato nga ang atong mga pangamuyo wala tubaga. Apan Siya makadungog sa matag hosanna. Ug sa Iyang hingpit nga pamaagi ug panahon, Siya motabang kanato.

Sa Getsemani, si Kristo nag-antos alang sa atong mga sala ug mibati sa atong mga kasakit ug sa atong mga pakigbisog. Siya nagpadayon sa paggiya ug paghupay sa tanan nga modangop Kaniya ug sa Langitnong Amahan. Ang mao gihapon nga Kristo kinsa nag-antos alang kanato didto sa Getsemani ug sa krus mibangon usab gikan sa lubnganan, mibuntog sa kamatayon aron kita makabaton og paglaom. Ang Iyang Pagkabanhaw mao ang kataposang tubag sa matag hosanna.