Wala Kinahanglana nga Kamo Mahimong Batid

Mga paghulagway pinaagi sa Getty Images

Kadaghanan nato adunay kasinatian nga makasugat og talagsaong bahin sa art o pasundayag ug naghunahuna: “Unta makahimo ko niana, apan dili igo ang akong talento.”

Daghan sa inyong paborito nga obra nahimo pinaagi sa mga tawo nga dunay daghang natural nga talento. Apan mahingangha mo nga kasagaran usa ka yano nga tawo ra diay kinsa adunay dinasig nga ideya.

Ang “Let Easter Anthems Ring,” usa sa bag-ong himno nga bag-ohay lang gipagawas sa Simbahan, gisulat sa usa ka Santos sa Ulahing mga Adlaw nga ginganlan og Larry A. Hiller. Usa siya ka propesyonal nga tagsulat ug editor (miretiro na karon), apan dili usa ka tagsulat og kanta. Dili siya usa ka maayo nga singer o musikero.

Usa lamang siya ka tawo nga ganahan og musika ug adunay dinasig nga ideya.

Dihang nagserbisyo isip direkor sa ward choir mga tuig na ang milabay, si Brother Hiller misulay sa pagsulat og bag-ong mga liriko alang sa karaan nga kanta nga iyang nadiskobrehan. Ganahan siya sa maong kasinatian ug nangutana sa usa ka higala kinsa nagtrabaho sa Simbahan kon aduna ba siyay nahibaloan nga uban pang kanta nga nanginahanglan og bag-ong mga pulong. Gitudlo niining higala kaniya ang usa ka tuno sa himno nga gi-compose niadtong mga 1800.

Si Brother Miller miingon,“Gigahinan nako og panahon kana nga musika ug ang mga pulong miabot gyod dayon sa akong hunahuna: ‘Rise up, ye Saints, rejoice.’ Ug gikan niana akong nabati ang pinaka unod sa teksto ug kon unsa kini angay nga mahimo—usa ka kanta sa paglipay bahin sa Manluluwas.”

Kana nga himno gimantala sa Ensign niadtong 2012. Aduna kini upat ka bersikulo ug kabahin kini sa Pag-ula ni Jesukristo. “Nakatutok kini pag-ayo bahin sa ‘inyong makita pag-usab ang inyong mga minahal; adunay pagkabanhaw,’” miingon si Brother Hiller. Sa dihang ang Simbahan nanawagan alang sa bag-ong mga himno, si Brother Hiller gihangyo nga ipunting pag-usab ang iyang mga liriko ngadto mismo sa Pasko sa Pagkabanhaw.

Human mausab ang daghan sa mga liriko—bisan ang nag-unang linya, “Rise up, ye Saints, rejoice,” nagpabilin—karon si Brother Hiller adunay tulo ka bersikulo nga himno nga gitawag og “Let Easter Anthems Ring.” Tingali makanta ninyo kini sa miting sa sakramento karong kapanahonan sa Pasko sa Pagkabanhaw!

Nabati ba ni Brother Hiller ang kadasig sa dihang nagsulat siya sa mga pulong?

“Mapaubsanon akong motubag,” miingon siya. “Apan oo. Adunay mga higayon nga mabati nako ang pagkasunod-sunod sa mga pulong diha sa akong hunahuna. Makapatagbaw kini ug makalipay kaayo. Ug kanunay nakong mabati ang maong kalipay kon mabasa nako pag-usab ang usa ka butang nga nakapatandog gyud nako niadtong panahona. Kana lamang makapahinumdom niadtong mga pagbati sa pagpamatuod. Mora og gibalik-balik lang ang kasinatian.”

Lagmit ganahan ang mga tawo sa himno, apan murag ang tawo nga nakabenepisyo og maayo mao (drumroll)… ang nagsulat niini! Ang paggamit sa atong mga talento ug dinasig nga mga ideya dili lang makapanalangin sa uban—makapanalangin usab kini kanato.