Kon ang Pagbuhat sa Husto nga Butang Murag Nagpalisod sa Imong Kinabuhi

Ni David A. Edwards

Mga Magasin sa Simbahan

Ania ang usa ka leksiyon gikan ni Jose sa Daang Tugon bahin kon giunsa pagpadayon sa pagbuhat sa husto nga butang bisan kon murag makapugong kini sa imong mga tumong.

Mga butang nga murag makapasagmuyo kaayo ni Jose dihang gibaligya siya sa iyang mga igsoon ngadto sa pagkaulipon didto sa Ehipto. Apan ang Ginoo nag-uban kaniya, ug pagkahuman sa usa ka panahon, gipanalanginan siya sa Ginoo nga mahimong labing kasaligan nga sulugoon diha sa balay sa iyang agalon, si Potifar. Busa medyo maayo na ang kahimtang ni Jose human niadto—hangtod nga napugos siya sa paghimo og usa ka desisyon.

Usa ka adlaw, gisultihan si Jose sa asawa ni Potifar nga gusto niyang makighilawas kaniya (tan-awa sa Genesis 39:7). Mingbalibad si Jose. Gipahinumdoman niya siya sa posisyon sa pagsalig nga anaa niya; dili siya gustong maguba kana nga pagsalig. Apan mas importante, iyang gisultihan siya sa labing mahinungdanong rason ngano nga dili niya kini mahimo: “Busa dili ako makaako paghimo sa ingon kadaotang buhat ug sa pagpakasala batok sa Dios?” (Genesis 39:9).

Nagpabilin si Jose nga matinud-anon sa iyang pasalig sa pagtuman sa mga sugo sa Dios. Iyang gibuhat ang husto nga butang.

Apan ang asawa ni Potifar dili modawat sa “dili” isip tubag. Padayon siyang nangayo sa samang butang adlaw-adlaw. Dili gyod buhaton ni Jose kana. Naningkamot siya nga molikay kaniya. Usab, iyang gibuhat ang husto nga butang.

Unya usa ka adlaw gigunitan niya si Jose sa iyang sinina ug mihimo sa sama nga pagbungat. Midailos si Jose niana nga sapot ug midagan palayo. Usab, iyang gibuhat ang husto nga butang.

Nan, kana ang nakapasuko ug nakapapungot kaniya. Namakak siya bahin ni Jose ug miingon nga gipugos niya ang iyang kaugalingon kaniya. Gigamit niya ang piraso sa sinina isip ebidensiya aron pamatud-an ang iyang bakak nga akusasyon.

Mituo si Potifar sa iyang asawa, ug si Jose gilabay ngadto sa bilanggoan. Tanan tungod kay nagpabilin siyang lig-on sa pagbuhat sa husto nga butang.

Ang Husto nga Butang Kanunay nga Husto

Pwede ninyong mahunahunaan nga human sa pila ka panahon magsugod na unta si Jose sa pagpangutana kon ang pagbuhat ba sa husto nga butang tinuod gyod nga kanunay husto buhaton. Murag nakapadugang lang kini sa iyang problema. Apan padayon siyang misalig sa Dios ug mituman sa Iyang mga sugo.

Adunay mga higayon sa imong kaugalingong kinabuhi nga ang pagbuhat sa husto nga butang murag makapahasol kanimo. Pananglitan, tingali maghunahuna ka:

“Usahay murag tanan nanikas sa eskwelahan gawas nako. Ang pagkamatinud-anon ba makapaulahi nako?”
“Ang pagdumili sa pag-inom og kape, tsa, o ilimnon nga makapahubog makapahunahuna sa pipila ka tawo nga lahi ko. Ang pagtuman ba sa Pulong sa Kaalam takos sa sosyal nga pagkahimulag?”
“Tungod kay nagabayad ko og ikapulo, usahay dili ko makapalit sa mga butang nga akong gusto. Kinahanglan ba gayod nga mobayad ko sa ikapulo?”

Apan ang pagbuhat sa husto nga butang kanunay gayod nga takos. Ang pagtuman sa Langitnong Amahan ug ni Jesucristo kanunay gayod nga takos. Hinumdomi lang si Jose. Oo, nag-antos siya og pipila ka mga sangputanan tungod sa pagbuhat sa husto nga butang—seryoso kaayo kini. Apan sa kataposan, ang pagpabiling matinud-anon ngadto sa Dios nahimong usa ka dakong panalangin alang kaniya—ug alang usab sa tanan.

Tungod kay nagpabilin si Jose nga matinud-anon, sa kadugayan nahimutang siya sa usa ka posisyon nga mahimong labing kasaligan nga tawo diha sa korte ni Paraon. Pinaagi sa gahom sa Dios, nalantawan niya ang pito ka tuig nga kagutom, ug iyang gidasig si Paraon nga magtigom og igo nga pagkaon aron makalahutay niini. Nagpasabot kini nga ang Ehipto nakatabang usab sa ubang kayutaan nga naapektohan sa kagutom.

Ang mismong mga igsoon ni Jose miadto pa gani sa Ehipto aron mangayo og pagkaon alang sa ilang pamilya, ug sa kataposan gipaila ni Jose ang iyang kaugalingon ngadto kanila. Nagmahay sila sa ilang gibuhat kaniya, apan miingon si Jose, “Apan ayaw ikaguol, … kay ang Dios maoy nagpaanhi kanako una kaninyo aron maluwas ang kinabuhi sa katawhan” (Genesis 45:5).

Si Jose nakakat-on nga “tanang butang nagbuhat ang Dios alang sa kaayohan niadtong nahigugma Kaniya” (Mga Taga-Roma 8:28). Nasayod si Jose nga ang pagbuhat sa husto nga butang kanunay gyod husto—bisan pa kon kini daw nagpasamot sa mga butang sa pagkakaron.

Dili nimo kanunay dayon makita ang mga benepisyo sa pagbuhat sa husto nga butang. Usahay dili gyod nimo makita ang temporal nga mga benepisyo sa tanan niini nga kinabuhi. Apan samtang magpadayon ka sa paghigugma sa Dios ug pagsalig ug pagpabiling matinud-anon ngadto Kaniya, Siya kanunay nga mopanalangin kanimo sa espirituhanong paagi ug mosuporta kanimo diha sa imong mga pagsulay (tan-awa sa Alma 36:3).