Ang Imbitasyon sa Seminary

Paghulagway pinaagi ni Katelyn Budge

Ang pagbalhin gikan sa middle school ngadto sa hayskul murag makahahadlok alang nako. Labaw pa niana, magsugod usab ko sa seminary. Sa among stake, kami adunay seminary sa gabii, mao nga human sa eskwelahan modiretso ko sa seminary. Kini nga eskedyul kasagaran kapoy tungod kay daghan ko og homework karon nga hayskul na ko. Sa gihapon, bisan og wala kaayo koy igong panahon sama sa akong naandan, mapasalamaton ko nga ang akong panahon magahin sa butang nga makaayo nako.

Sa seminary, ang among magtutudlo mitudlo namo kon sa unsang paagi si Enos nag-ampo sulod sa pipila ka oras, nakig-istorya sa Ginoo. Siya midapit namo sa pagbaton og susama nga pagtuo ug sa pag-ampo sulod sa 30 minutos human sa seminary nianang adlawa. Gibuhat nako ang hagit ug nag-ampo. Ang akong magtutudlo misulti namo nga mag-ampo nga ingon og nakig-istorya gyod kami sa Langitnong Amahan. Naningkamot ko sa pagkonektar ngadto Kaniya ug nagpasalamat Kaniya sa mga panalanagin sa akong kinabuhi. Ang 30 minutos nagsugod sa hinay nga paagi, apan murag mipaspas kini nga padulong nang mahuman. Ang pag-adto sa seminary, pagtuon sa mga kasulatan, ug pagkat-on pa og dugang sa ebanghelyo nakapalig-on gayod sa akong relasyon ngadto sa Langitnong Amahan.

Bisan kon ang pipila ka butang sa kinabuhi makahahadlok—sama sa pagsugod sa seminary o pag-eskwela sa bag-ong eskwelahan—nakakat-on ko sa pagsalig sa Langitnong Amahan ug sa Iyang plano. Usa sa akong paborito nga mga kasulatan nga akong nakat-onan sa seminary mao ang Ether 12:6, nga nag-ingon, “Ang pagtuo mao ang mga butang nga gilaoman ug dili makita.” Kita dili kinahanglan nga makakita aron makabaton og pagtuo.

Kon ang mga butang lisod o makalibog, mag-ampo ug mangayo og giya sa Langitnong Amahan aron masayod kon unsay buhaton ug kalig-on aron makapadayon. Ayaw paghunong. Mahimo ninyo kini!