Atensiyon, mga Time-Traveler!

Mga paghulagway pinaagi ni Dave Murray

Hunahunaa nga ang usa ka time machine kalit nga migawas. Sa dili pa ka mobati og hilabihan nga kahinam sa imong kaniadto, ania ang sitwasyon: motugot lamang kini nga mobalik ka ug mobisita sa imong kanhi nga kaugalingon!

Mosakay sa machine … molingkod sa lingkoranan … ug vwaaap! Dayon makita nimo ang imong mas batan-on nga ikaw. Unsay imong isulti sa imong kaugalingon? Tingali ang imong mas batan-on nga kaugalingon nindot kaayo ang adlaw, ug sultihan nimo nga tagamtamon ang matag minuto. O tingali dili nindot ang imong adlaw, ug imong gakson ang imong kaugalingon ug maluluy-on nga gakos.

Kon ako kadto, adunay dakong kahigayonan nga ang akong mas batan-on nga kaugalingon maugtas sa usa ka butang. Mabalaka ko kanunay tungod kay dili ko ganahan nga masayop! Dili kaayo ko maayo sa mga kausaban, sama sa pagbalhin ngadto sa bag-ong grado o eskwelahan. Ug adunay daghang higayon nga mobati ko nga walay labot.

Sukad niana, nakakat-on ko og pipila ka kahanas sa pagsagubang niini nga mga hunahuna ug mga pagbati.

Kon mabalik nako ang panahon, ania ang eksperto nga mga sugyot nga akong ipakigbahin sa akong mas batan-on nga kaugalingon:

• Labi na kon mosulay og usa ka butang nga bag-o, ikaw gayod magkasayop-sayop—ug OK ra kana! Praktisa ang pagkamaluluy-on ug ang pag-awhag sa imong kaugalingon. Sama sa giingon ni Presidente Jeffrey R. Holland, “Ang mga tawong dili hingpit ang kanunayng gikauban sa Dios. Tingali makapasagmuyo kaayo kini Kaniya, apan Iya kining gisagubang. Mao usab kita. … Pagmapailubon ug pagmabination ug pagmapasayloon.” Karong panahona kon mosulay ko og usa ka butang nga bag-o, akong dasigon ang akong kaugalingon, sama sa, “Kini tingali magkasayop-sayop. Apan ingon niana ang unang mga pagsulay! Dayon makapraktis ko ug molambo”

• OK ra nga maguol kon ang mga kahimtang mausab, labi na ang panaghigalaay. Salig lang nga ang mga relasyon mas monindot samtang magtubo ka. Magkadaghan ang imong mga higala. Makakat-on ka sa pagtakda og mga limitasyon nga dili kaayo makigsuod sa mga tawo nga magdala og negatibo sa imong kinabuhi o makapakunhod nimo sa emosyonal ug sa espirituwal nga paagi. Ug ang tinuod nga panaghigalaay mausab paglabay sa panahon. Samtang magpaduol ka sa Langitnong Amahan ug sa Manluluwas—sa kanunay mao ang imong labing importante nga mga relasyon—Sila mogiya nimo ngadto sa mas lig-on ug maanindot nga relasyon sa umaabot.

• Makasinati ka og mga panahon nga mag-inusara sa kinabuhi, apan molabay ra kini. Ang Manluluwas nakasabot sa kasakit sa pag-inusara ug maglakaw niana nga dalan uban kanimo. Sa dili madugay makahimamat ka og mga tawo nga magpakabana nimo ug managsama kamo og mga gusto. Ug tag-ana unsa? Ang imong mga kasinatian makatabang gayod nimo nga makapalambo og usa ka talagsaong gahom: empatiya! Tungod kay nahibalo ka kon unsay bation nga dili iapil, mahimo kang labing maayo sa pagmatikod ug pagpaapil sa uban sama sa buhaton sa Manluluwas.

Unsay ipasabot niini? Ang kinabuhi nag-anam ka maayo! Sama sa gipasalig ni Presidente Russell M. Nelson kanato: “Daghan kaayo kita og paaboton! …

“Ako wala moingon nga ang umaabot nga mga adlaw sayon, apan ako mosaad kaninyo nga ang umaabot mahimayaon alang niadtong kinsa nakaandam ug kinsa nagpadayon sa pagpangandam nga mahimong mga instrumento sa mga kamot sa Ginoo.”

Wala kana magpasabot nga usa kini ka perpekto nga proseso matag adlaw. Naghunahuna ko sa kinabuhi nga daw sama sa tulo ka hut-ong sa dimensiyon nga nagliyok, diin usahay daw balik-balik ko nga nag-atubang og pamilyar nga mga problema. Apan kon magpadayon ko sa pagsunod ni Jesukristo, sa tinuod lang mopadulong ko sa mas taas nga espirituhanong ang-ang kaysa asa ko kaniadto—nagpadayon ug pataas.

Karon turno na sad nimo. Unsa man ang imong isulti sa imong mas batan-on nga kaugalingon? Ug, sa paghimo og lakang sa unahan, unsa kaha ang balikon ug isulti sa imong umaabot nga kaugalingon nganha nimo sa pagkakaron?!

Wow. Daghan kaayo ang angayng hunahunaon. Mas maayo pa mohunong na lang kita sa dili pa mabungkag ang atong mga hunahuna. Malipayon nga time travelling!