Digital Lamang
7 ka Bintaha nga Anaa Nimo isip usa ka Santos sa Ulahing mga Adlaw sa Panahon sa Artificial Intelligence
Kining bag-ong teknololohiya makahatag og kausaban. Apan ikaw adunay mga kahibalo ug kahanas sa pagdumala niini.
Tingali nakadungog na ka mahitungod sa artificial intelligence (AI) Mao kini ang sunod nga importanitng butang, klaro nga—ang mga computer nga makatubag ug makahimo og mga butang sa mga paagi nga ingon og susama sa kaalam sa tawo.
Tingali nakadungog usab ka og pipila ka panagna mahitungod sa artificial intellingence. Mga butang sama sa: “Kuhaon niini ang atong mga trabaho!” “Mohimo kini og bag-ong mga trabaho!” “Gub-on niini ang kalibotan!” “Himoon niini nga mas nindot ang kalibotan!”
Wala gayod kita makahibalo sa sakto unsay mahitabo, apan usa ka butang ang segurado: Ang AI nga mga himan ug mga teknolohiya nakahimo na og kadasig o kontrobersiya.
Isip usa ka miyembro sa Ang Simbahan ni Jesukristo sa mga Santos sa Ulahing mga Adlaw, ikaw adunay espirituwal nga mga bintaha niining bag-ong panahon sa artificial intelligence nga makatabang nimo nga makabaton og hingpit nga kalipay ug kalinaw. Makakat-on ka mahitungod niini diha sa mga kasulatan ug sa mga pulong sa moderno nga mga propeta. Ania ang pito lang niini, wala han-aya sa partikular nga pagkahan-ay.
1. Ikaw nakahibalo sa imong tinuod nga pagkatawo—ug sa bili sa matag anak sa Dios.
Ikaw anak sa Dios. Mao usab ang matag tawo dinhi sa yuta. Ang trabaho ug himaya sa imong Langitnong Amahan mao ang pagtabang nato nga mahimong sama Kaniya (tan-awa sa Moises 1:39). “Ang bili sa mga kalag mahinungdanon sa panan-aw sa Dios” Doktrina ug mga Pakigsaad 18:10). Ang pagkahibalo sa imong bili—ug sa bili sa matag tawo—nagpasabot nga imong gihatagan og bili unsa kita nga mga anak sa Dios ug unsa ang atong mahimo.
Si Elder David A. Bednar sa Korum sa Napulog Duha ka Apostoles mipasidaan nga ang AI “adunay potensiyal sa paglibog sa atong tinuod nga pagkatawo isip mga anak sa usa ka mahigugmaon nga Langitnong Amahan.” Apan dili ka motugot nga ang kasayon ug gahom sa AI mobuta nimo sa kamatuoran nga ang mga tawo (nailhan usab nga mga anak sa Dios) ang labing importante sa mga mata sa Dios. Dili kwarta, dili kahayahay, dili “kauswagan,” ang importante ngadto sa Dios kondili ang mga tawo. Imong hatagan og bili unsa ang mahimo ug mabuhat sa mga anak sa Dios.
2. Ikaw nasayod nga ang teknolohiya mahimong gamiton alang sa maayo o daotan (o sa binuang) nga mga katuyoan.
Ang bisan unsa nga himan o teknolohiya mahimong gamiton alang sa maayo o daotan. Gipasidan-an ka niini kaniadto. (Pananglitan, ang paggamit sa internet sa paghimo sa family history nindot kaayo; ang paggamit niini aron makaakses sa pornograpiya dili, dili gayod nindot.) Dayon adunay butang nga dili kaayo maayo o daotan apan binuang lang—pananglitan, ang tanang walay paghunahuna, walay tumong nga pag-usik-usik sa panahon diha sa walay kataposan nga pag-scroll.
Sa samang paagi, ang pipila ka kagamitan sa AI mahimong maayo kaayo (pananglitan, ang paggamit niini sa paghubad og mga pinulongan o sa paghapnig og mga tinubdan sa pagpangita og usa ka hilisgotan). Pero, ang pipila dili maayo o binuang (pananglitan, ang paggamit niini sa pagsulat og pakigpulong sa panagtigom alang sa sakramento, pagpanikas diha sa eskwelahan, o paghimo og peke kaayo nga mga bidyo sa inila nga mga tawo).
Ang sentido komon makagiya nimo sa paagi sa imong paghunahuna sa AI, apan ang mas importante, ang Espiritu Santos makatabang nimo sa pag-ila unsa ang maayo o dili maayo (o yano lang nga binuang bahin niini (tan-awa sa #5).
3. Ikaw naghatag og bili sa imong kabubut-on.
Ang imong kabubut-on—ang imong abilidad sa pagpili ug paglihok—mao ang labing importante. Si Satanas nagtinguha sa paglaglag niini sa dihang misukol siya batok sa Langitnong Amahan didto sa Halangdong Konseho sa wala pa kita moanhi sa yuta (tan-awa sa Moises 4:3). Mao nga, unsay kalabotan sa AI ngadto sa kabubut-on? Si Elder Bednar mipasidaan nato: “Tungod kay ang AI nagtakoban sa kredibilidad ug mga saad sa siyentipikanhong pag-uswag, kita tingali walay kalibotan nga maagni sa pagtugyan sa atong bililhon nga moral nga kabubut-on ngadto sa usa ka teknolohiya nga “makahunahuna lamang og telestial. Pinaagi sa pagbuhat sa ingon, kita mahimong mag-anam og kausab gikan sa mga pagkatinugyanan nga makalihok ngadto sa mga butang nga palihokon lamang.”
Tungod kay imong gihatagan og bili ang imong kabubut-on, dili ka motugot nga ang AI motuok nimo pinaagi sa paghatag sa imong tanang panahon, pagtagad, mamugnaon nga kalagsik, ug paghimo og desisyon ngadto niini. Ug gani mahimo nimong gamiton ang imong kabubut-on pinaagi sa dili gayod pagpili sa paggamit sa AI kutob sa mahimo. Mao kana ang gahom sa kabubut-on:ikaw mopili; ikaw molihok.
4. Ikaw nahigugma sa kamatuoran.
Tungod kay ikaw usa ka disipulo ni Jesukristo, ikaw nahigugma sa kamatuoran. Mao nga, ang ideya sa paggamit sa AI sa bisan unsa nga paagi nga dili matinuoron o panglimbong dili maayo. Tingali makatintal ang pag-angkon sa buhat sa AI nga imong kaugalingon. Apan tungod kay ikaw nahigugma sa kamatuoran, dili nimo kana buhaton.
Agi og dugang, nasayod ka unsaon sa pagpangita sa kamatuoran. Nasayod ka nga kon ang AI mohatag nimo og impormasyon apan dili motudlo nimo ngadto sa kasaligan nga mga tinubdan alang niana nga impormasyon, kinahanglan nga magbantay ka mahitungod sa pagsalig niini.
Ug nasayod ka nga kini usa lang ka himan, dili tinubdan sa kamatuoran gikan sa Dios. Kana makita diha sa mga kasulatan ug sa mga pulong sa mga propeta, ingon man usab pinaagi sa Espiritu Santo. Sama sa gitudlo ni Elder Gerrit W. Gong sa Korum sa Napulog Duha ka Apostoles, “Ang Artificial intelligence dili makapuli sa pagpadayag o makakuha og kamatuoran gikan sa Dios.”
5. Ikaw aduna sa gasa sa Espiritu Santo.
Ang gasa sa Espiritu Santo makatabang nimo sa pag-ila sa maayo ug sa dili maayo nga mga paggamit sa AI. Kini nga gasa makahatag usab nimo og kahupayan ug kalinaw sa usa ka kalibotan nga ingon og gitulod ngadto sa politikanhon, ekonomikanhon, ug moral nga kasamok agi og resulta niining miabot nga teknolohiya. Samtang magmatinud-anon ka sa imong mga pakigsaad, makabaton ka sa saad sa Dios niini nga giya ug kahupayan (tan-awa sa Doktrina ug mga Pakigsaad 82:10.
6. Ikaw naghatag og bili sa pagkat-on, pagtrabaho, ug pagtubo.
Ang tumong sa plano sa Langitnong Amahan mao nga kita mahimong sama Kaniya. Tungod kay ikaw nasayod niini, nasayod ka nga ang pagtinapolan sa tanang panahon supak niana nga katuyoan. Ug mao nga ikaw nasayod nga ang pag-ingon, “Ipabuhat lang kana sa AI,” sa tanang panahon dili mao ang punto. Ang pagpakabuhi ug pagkat-on adunay kalabotan sa pagpalambo sa imong hunahuna, imong mga kahanas, ug imong kahibalo; kini walay kalabotan sa paghatag sa imong hunahuna ug paghukom ngadto sa usa ka makina.
Ug tungod kay ikaw nasayod nga “ang Ginoo ganahan og paningkamot,” ikaw nasayod nga ang proseso sa pagkat-on importante bisan man lang kutob sa unsay imong mahimo isip resulta (mga papeles, mga buluhaton, mga eksamin, mga grado, mga degree, mga pakigpulong sa panagtigom alang sa sakramento, ug uban pa), tungod kay diha sa proseso angpaglambo mahitabo.
Sama sa gitudlo ni Elder Bednar, “Ang tumong dili lamang ang paghimo o pagpresentar sa impresibo nga sulod; hinoon kini ang pagbuhat ug paghimo sa unsay gipangandoy sa Dios nga kita mamahimo.”
7. Ikaw naghatag og bili sa koneksiyon ngadto sa Dios ug sa Iyang mga anak.
Gusto ka og tinuod, direkta nga koneksiyon ngadto sa Langitnong Amahan pinaaagi sa pag-ampo, pagtuon sa kasulatan, ug ubang espirituwal nga mga paagi. Dili ka motugot sa AI nga mobabag niana nga koneksiyon. Gusto usab ka og tinuod nga koneksiyon ngadto sa mga tawo. Dili lang ka gusto og imitasyon sa tawhanong panag-uban. Gusto ka sa tinuod nga butang. Gusto ka nga mokonektar sa ubang mga anak sa Dios, kinsa adunay mga espiritu ug mga hunahuna ug mga lawas.
Sama sa gisulti ni Elder Bednar: “Ang AI nga kompanyon usa lamang ka mathematical algorithm. Dili kini gusto ninyo. Dili kini manginlabot kaninyo. Wala gayod kini makahibalo kon kamo anaa ba o wala.”