Tulo ka Igsoong Lalaki, Usa ka Manluluwas
Himamata si Carlos, si Set, ug si Isaac nga Taga-Mexico—tulo ka igsoong lalaki nga naningkamot gayod nga maglakaw kauban si Jesukristo.
Mga litrato pinaagi ni Shirley Brito
Himamata si Carlos!
Edad 18. Ganahan og mga video game ug computer programming. Gustong mahimo nga usa ka driver sa panglumba nga sakyanan ug tigdisenyo sa moabot nga panahon.
Nasayod si Carlos nga ang sakripisyo magdala og mga panalangin.
“Ang akong igsoong lalaki nga si Set ug ako dunay autism. Naglisod gyod ko sa pag-eskwela tungod niini. Dayon si mama midapit namo sa pagbasa sa mga kasulatan matag buntag tibuok pamilya, ug nakatabang kaayo kini nako. Nakatabang kini sa akong pag-eskwela ug pagbarog sa akong kaugalingon.
“Sa laing panahon, dili ko gustong moadto og youth conference kay busy gyod ko sa klase sa eskwelahan. Apan miadto ko, ug mibati ko nga napanalanginan nga makahimo og mas maayo sa klase kay sa akong gihunahuna. Tungod niini nga mga kasinatian, wala nako ipadayon ang akong mga pag-eskwela sa unibersidad ug nangandam ko sa pagmisyon. Nasayod ko nga ang sakripisyo makatabang na usab kanako.”
Himamata si Set!
Edad 17. Gustong magdula og mga video game, maghimo og mga carton nga mga armor, ug makigdula sa tulo ka iring sa ilang pamilya.
Si Set naningkamot nga magmabination sa uban, bisan og ang mga tawo dili buotan ngadto niya.
“Dunay lalaki sa eskwelahan nga dunay mga problema sa kahimsog. Usab, ang iyang antipara dili kaayo maayo, ug usahay mabangga siya ngadto sa mga butang. Usa ka adlaw nalamba siya, ug gikataw-an siya sa mga tawo. Wala ko mokatawa—miadto ko ug gitabangan siya sa pagbarog. Sa wala madugay, mihunong siya sa pag-eskwela. Nakita nako siya wala madugay sa iyang birthday party, ug nag-wheelchair siya. Gipaningkamotan nako nga malingaw siya sa iyang party. Higala nako siya.
“May nakahigala sab ko karong tuiga sa FSY. Sa una, dili ko ganahang moadto. Nakaadto na ko sa una, ug ang ubang mga tawo dili ganahang makig-uban nako. Apan karong tuiga walay usa nga mihukom nako—sa sukwahi, ila kong gidayeg sa unsay akong naagian.”
Himamata si Isaac!
Edad 14. Ganahang magdula og mga video game, makigdula sa ilang mga iring, ug nagtuon nga mahimong veterinarian sa moabot nga panahon.
Si Isaac misalig nga tabangan siya sa Manluluwas.
“Didto kami sa balay sa akong lola kausa dihang ang akong igsoong lalaki ug ig-agaw misulod nga nagdala og gamay kaayong orange nga iring. May samad kini ug dili mosalig bisan kinsa kanamo. Sa kataposan, misalig ra siya kanako. Giatiman nako kini ug gipakaon. Dihang oras na sa pagpamauli, gitugotan ko sa akong mga ginikanan nga dad-on kini sa balay. Tingali ang Espiritu Santo ug si Jesukristo nagtabang kanako.
“Sa laing panahon, mibati ko nga mas ubos ako kay sa tanan. Gibasa nako ang mga kasulatan, ug akong nabasa ang Alma 7:11: ‘Ug magpadayon siya, mag-antos sa mga sakit ug mga kasakit ug mga pagtintal sa matag matang.’ Una sa tanan, giagian ni Jesukristo ang atong tanan nga kasakit, ug kanunay Siya nga anaa sa pagtabang kanato, bisan sa labing gamay sa tanan nga butang.”
Paglakaw kauban sa Manluluwas
Si Carlos, si Set, ug Isaac dili kay igsoon lamang—managhigala sila. Ug ang matag usa nila misalig sa ilang labing talagsaon nga Higala ug Manluluwas, si Jesukristo.
Isaac: “Nasayod ako nga buhi si Jesukristo. Giantos Niya ang atong tanan nga mga kasakit. Ang kinabuhi dili kanunay nga sayon, apan OK ra kana. Makahimo Siya og mga milagro.”
Set: “Tungod Kaniya, ang atong kinabuhi magiyahan ngadto sa hustong dapit. Kon tugotan nato ang atong kaugalingon nga magiyahan Niya, mamaayo ra ang tanan.”
Carlos: “Ang Langitnong Amahan ug si Jesukristo adunay gahom sa pagtabang kanato. Kon motuman kita Kanila, Sila motabang kanato sa mga butang nga atong giagian sa atong kinabuhi.”