Akong Gipili nga Madawat ang Akong Pagtuga sa Edad nga 18

Mihukom ko nga gusto nakong madawat ang akong pagtuga sulod sa templo kon mag-18 na ko. Ang kinatibuk-ang komperensiya nagtudlo kanako nga ang mga pakigsaad sa templo magdala kanato paduol sa Manluluwas, nga mao gayod ang akong gipangandoy.

Nasayod ko nga dako kaayo kini nga responsibilidad ang paghimo og pakigsaad sa Ginoo, mao nga gusto kong makaseguro nga ang mga pakigsaad sa templo mao ang butang nga gusto nakong buhaton. Nakigsulti ko sa akong bishop, nagtuon, ug mikuha og kurso nga pagpangandam alang sa templo. Dihang nasabtan na nako ang mga pasalig nga akong pagahimoon, mibati ko nga andam. Andam na ko nga motuman sa akong isaad.

Miadto ko sa templo sa Lisbon, Portugal, nga mga tulo ug tunga ka oras ang gilay-on. Nindot kaayo kadto nga kasinatian. Tingali wala nako masabti ang tanan kay unang higayon pa nako kadto, apan akong gibati ang gugma sa Dios, ug akong nasabtan kon si kinsa gayod ako: usa ka anak sa Dios nga dunay talagsaon kaayo nga potensiyal.

Wala kinahanglana nga maghulat kita hangtod nga mahingpit na aron makaduol ngadto Kaniya. Ang pag-adto sa templo sa unang higayon, alang sa atong kaugalingon, usa ka gutlo sa talagsaon nga paglambo. Mopalig-on gayod kini sa atong relasyon ni Kristo. Mao nga nagtuo ko nga si bisan kinsa nga dunay tinguha kinahanglang mag-ampo mahitungod niini ug mangandam, ug kon mao kana ang ilang tinguha, nan ang templo mao ang labing maayo nga dapit nga adtoon.