“Ang akong mga ginikanan nagdiborsyo, ug ang usa negatibo sa Simbahan. Unsaon nako nga magpabilin ang Espiritu kon kauban nako kana nga ginikanan?”

“Sa Doktrina ug mga Pakigsaad 11:21, ang Ginoo nagsulti nato: ‘Ayaw tinguhaa ang pagpahayag sa akong pulong, apan unaha sa pagtinguha ang pagbaton sa akong pulong … ; unya, kon ikaw magtinguha, ikaw makabaton sa akong Espiritu.’ Ipadayon ang pagtinguha sa Espiritu Santo pinaagi sa pagpailob, pagkamabination, pagtuon sa kasulatan, pag-ampo, ug pagpuasa. Siya mogiya kanimo.”

Gabriela A., 16, São Paulo, Brazil

“Pipila ka butang nga nakatabang nako mao ang paggahin og panahon nga ako ra aron magbasa sa mga kasulatan matag adlaw, moistorya mahitungod sa akong gituohan sa positibo ug mapagarbohong paagi, ug mahimong maayong ehemplo. Usab, makaampo ko bisan kanus-a ug ang Langitnong Amahan anaa kanunay alang nako.”

Ethan W., 17, Washington, USA

“Nakasinati ko niini nga sitwasyon kaniadto, ug nag-ampo ko nga mapadayon nako ang mahangtorong panglantaw. Mag-ampo ug magpuasa aron mabati ang Espiritu, ug ang Langitnong Amahan mohatag nimo sa labing maayo nga tubag nga masulbad kini nga sitwasyon!”

Isabelle L., 17, São Paulo, Brazil

“Ang pagka-Kristohanon mao ang usa sa labing maayo nga mga paagi sa pagdapit sa Espiritu ug bation ang kalipay ug kalinaw. Akong nahibaloan nga kon ako moserbisyo ug magmabination ngadto sa usa ka tawo, bation gayod nako ang Espiritu.”

Maybelle K., 15, Utah, USA

“Akong bation ang Espiritu kon magbuhat ko og mga butang nga akong nahibaloan nga sakto kauban niana nga ginikanan, sama sa pag-ampo panahon sa tingkaon ug pagbasa sa akong mga kasulatan. Kon ako mahimong misyonaryo pinaagi sa ehemplo, ako nagpalambo sa akong pagpamatuod, nga makatabang nako sa pag-ila sa Espiritu ug mogahin og panahon alang sa Langitnong Amahan ug ni Jesukristo!”

Mara B., 13, Ontario, Canada