Gusto Ka ba nga Mas Malipayon? Sulayi ang Pagkamapasalamaton
Kon ang inyong kinabuhi puno sa mga kausaban, ang pagkamapasalamaton makatabang ninyo sa pagtutok sa positibo ug sa pagpabiling malaomon.
Mga paghulagway pinaagi ni Maggie Stephenson
“Dili molabaw ang inyong pagkamalipayon kay sa inyong pagkamapasalamaton.”
Sama niini nga kinutlo gikan ni Elder Gary B. Sabin sa Seventy nagsugyot nga, ang inyong ka malipayon mao ang direkta nga impluwensya kon unsa kamo ka mapasalamaton. Tinuod kini—kon kamo mapasalamaton, nagtutok kamo sa positibo nga mga butang imbes sa negatibo nga mga butang.
Sa gihapon, ang kinabuhi dili kanunay mahitabo sama sa giplano. Ang wala damha nga mga kausaban tingali mas makapaugtas ninyo, makapaguol, o makapasagmuyo imbes makalipay. Apan kon lisod ang mga butang, ang pagkamapasalamaton makatabang ninyo nga magpabiling malaomon. Sulayi kining tulo ka paagi aron mas mapasalamaton sa kinabuhi.
1. Mangita sa Maayo
Kasagaran, lisod kaayo ang pagbaton og pagkamapasalamaton kon kamo mibati nga ingon og adunay kulang. Apan unsa ang mga panalangin nga inyong malaktawan sa pagtutok sa unsay wala ninyo imbes sa unsay anaa ninyo?
Samtang kamo mangita sa maayo sa inyong kinabuhi, paglabay sa panahon mas sayon kini nga makit-an.
2. Pasalamati ang Tighatag
Kon mag-ihap kamo sa inyong mga panalangin, ayaw og kalimot kon-asa kini gikan.
Ang pagpasalamat sa Langitnong Amahan alang sa Iyang mga gasa—lakip na ang gasa sa Iyang Anak—makapalawom sa inyong gugma ug pagtuo Kaniya. Si Elder D. Todd Christofferson sa Korum sa Napulog Duha ka Apostoles mipasabot usab, “Ang pagbati ug pagpahayag og pasalamat sa Dios … moaghat sa pagsimba og usa ka pagbati sa malipayong pagbag-o,” magdala ninyo og kalipay ug kalig-on ug magtabang sa inyong pagpamatuod nga magpabiling segurado.
3. Motutok sa Plano sa Langitnong Amahan
Dayag lang, ang pagbaton og kinaiya sa pagkamapasalamaton wala magpasabot nga ibaliwala ang lisod nga mga butang sa kinabuhi o magmalipayon sa tanang higayon. Bisan si Jesukristo mibati ug miila sa kasakit (tan-awa sa Alma 7:11; Doktrina ug mga Pakigsaad 19:18–19). Ang kaguol normal nga bahin sa mortalidad.
Apan bisan unsa pa man, usa ka butang ang dili gayod mausab: Ang plano sa Langitnong Amahan sa kaluoy. Ang tanang kagul-anan ug kasakit nga inyong nasinati sa kinabuhi mapahimutang sa sakto tungod ni Jesukristo ug sa Iyang Pag-ula (tan-awa sa Gipadayag 21:4).
Si Elder Dieter F. Uchtdorf sa Korum sa Napulog Duha ka Apostoles mipasabot: “Ang kamapasalamaton panahon sa kasakit wala magpasabot nga nahimuot kita sa atong kahimtang. Nagpasabot kini nga pinaagi sa mga mata sa hugot nga pagtuo naglantaw kita lapas sa atong mga hagit karon.”