Kalipay ug ang Dalan sa Pakigsaad
Ang dalan sa pakigsaad sa pagkatinuod mao ang dalan sa matubsanong gugma.
Light and Life [Kahayag ug Kinabuhi], ni Mandy Williams
Sa dihang si Israel ug si Elizabeth Haven Barlow mibiya sa Nauvoo, Illinois, paingon sa Walog sa Salt Lake niadtong 1848, ilang gibiyaan ang gamayng batang lalaki nga gilubong sa gamayng sementeryo sa Nauvoo. Ang gamayng bata nga si James Nathaniel Barlow, ilang unang anak, namatay wala madugay human sa pagkatawo niadtong Mayo 1841.
Si Israel ug si Elizabeth wala na gayod magdahom nga makita pa nila pag-usab ang lubnganan sa ilang anak. Apan sa dihang si Israel gitawag sa pagmisyon ngadto sa England paglabay sa pipila ka tuig, miagi siya sa Nauvoo. Sa hangyo ni Elizabeth, mihunong siya aron pangitaon ang lubnganan sa ilang anak ug ibalhin kini ngadto sa dakong sementeryo.
Human nga nakit-an ni Israel ang lubnganan, nakita niya nga nadunot ug nabungkag na kini. Sa usa ka sulat ngadto sa iyang asawa, si Israel misulat nga siya midesisyon nga biyaan ang lubnganan ug balikan sa umaabot.
Wala pa siya makalakaw og pipila ka metros gikan sa lubnganan sa dihang nakadungog siya og tingog sa iyang hunahuna nga nag-ingon, “Papa, ayaw ko biyai dinhi.” Mibalik si Israel sa lubnganan, nakahukom nga ibalhin na lang ang iyang gamayng anak.
Samtang nagpabilin si Israel sa dapit sa lubnganan, iyang gisultihan si Elizabeth, “Mibati ko og usa ka tinguha nga ipahinungod ang akong kaugalingon ug ang tanan nga akong matawag og akoa ngadto sa mga kamot sa Ginoo nga unta maihap ako nga takos nga mobangon kauban ni [James] sa buntag sa Unang Pagkabanhaw.”
Ang debosyon ni Israel sa ebanghelyo ni Jesukristo ug ang pagtuman sa sagrado nga mga pakigsaad makamugna og kinabuhing dayon—kanang labing halangdon sa tanang panalangin—nga posible alang niya ug mopanalangin sa iyang pamilya—mga katigulangan ug mga kaliwatan.
Tinuod usab kini alang natong tanan.
Sagrado nga mga Saad
Ang inyong Langitnong Amahan ug ang Iyang Anak nga si Jesukristo nahigugma kaninyo labaw pa sa bisan unsa nga inyong gihunahuna. Sila gusto nga kamo mopaduol ngadto Kanila ug motabang ninyo nga makat-on ug motubo diha sa pagtuo ug pagsabot. Sila gusto nga mopanalangin ninyo og langitnong gahom, pagkaayo, ug kalinaw sa kalibotan diin ang ingon nga mga panalangin lisod makit-an. Sila gusto nga kamo makasinati og kalipay niini nga kinabuhi ug sa kinabuhi nga moabot.
Nagagikan niining hingpit nga gugma, nagtanyag Sila sa tanan og oportunidad nga mosulod og usa ka kasabotan sa pakigsaad ngadto Kanila diha sa bunyag ug didto sa balay sa Ginoo. Kita adunay panalangin nga mopasalig pag-usab niadto nga mga pakigsaad matag semana atol sa panagtigom alang sa sakramento.
Kon kita moambit sa sakramento, kita modala diha sa atong mga kaugalingon sa ngalan ni Jesukristo. Kita mohinumdom Kaniya ug sa Iyang gugma alang nato nga gipakita pinaagi sa gasa sa Iyang Pag-ula. Ikapakita usab nato ang atong kaandam sa pagsunod sa Iyang mga sugo (tan-awa sa Doktrina ug mga Pakigsaad 20:77, 79).
Si Presidente Russell M. Nelson miingon: “Sa kasagaran, makadungog ko nga kita moambit sa sakramento aron sa pagbag-o sa mga pakigsaad nga gihimo atol sa bunyag. Samtang tinuod kana, mas labaw kini kay niana.” Si Presidente Nelson miingon nga matag higayon nga kita moambit sa sakramento kita naghimo og bag-o nga pakigsaad, “agi og balos niini [ang Ginoo] mihimo sa pamahayag nga kita sa kanunay makabaton sa Iyang Espiritu uban kanato. Pagkadakong panalangin!”
Kon kita maghinulsol ug moambit sa sakramento uban sa putli nga kasingkasing, atong madawat ang Espiritu Santo ug “malimpyohan gikan sa sala sama nga kita gibunyagan pag-usab. Mao kini ang paglaom ug kaluoy nga gitanyag ni Jesus sa matag usa kanato.”
Pagkadako sa kalipay nga makahinulsol ug mapasaylo pinaagi sa matubsanong gugma ni Kristo!
Iyang Balay sa Kalipay
Sukad nahimong Presidente sa Ang Simbahan ni Jesukristo sa mga Santos sa Ulahing mga Adlaw, si Presidente Nelson kanunay nga namulong mahitungod sa dalan sa pakigsaad. Mosulod kita niana nga dalan pinaagi sa “paghinulsol ug bunyag pinaagi sa tubig” (2 Nephi 31:17), ug “dayon mas hingpit kitang misulod niini diha sa templo.”
Ang atong mortal nga kinabuhi usa lamang ka gutlo sa atong pagpakabuhi, apan kana nga gutlo—usahay lisod kaayo—mahinungdanon sa kahangtoran. Aron ang atong kinabuhi mahimong matahom ug malaomon, ang atong Langitnong Amahan naghatag og usa ka Manluluwas. Pinaagi sa Iyang gugma ug maulaong sakripisyo, Iyang gisagubang ug giayo ang tanang butang nga atong masugatan sa kinabuhi. Ug tungod sa Iyang balaan nga balay—Iyang balay sa kalipay—maayo ra ang tanan bisan pa man sa kalisdanan.
San Pedro Sula Honduras Temple
Ang dalan sa pakigsaad sa pagkatinuod mao ang dalan sa matubsanong gugma. Samtang maghimo kamo og mga pakigsaad sa templo, ug dayon motuman niini, makadawat kamo og mga panalangin sa mas dakong gahom, mas dakong gugma, mas dakong kaluoy, mas dakong pagsabot, ug mas dakong paglaom.
Pundoka Sila Pauli
Si Sister Kearon ug ako adunay piho nga pagbati ug dakong kaluoy alang nila ni Israel ug Elizabeth Barlow. Ang among unang anak, usa ka batang lalaki nga ginganlan og Sean, namatay atol sa operasyon sa kasingkasing sa dihang tulo pa lang siya ka semana. Daw kataposan kini sa kalibotan alang namo. Nianang higayona, naghunahuna kami kon makalahutay ba kami. Gilubong namo siya sa sakit palandongon nga gamayng lubnganan sa England. Kinse ka tuig ang milabay, ang among pamilya gihangyo nga mobalhin sa among panimalay didto sa United Kingdom aron full time nga moserbisyo sa Simbahan, ug gibiyaan namo kanang gamay nga lubnganan.
Nakasabot kami sa unsay gibati sa mga Barlow. Ang gilubngan sa among gamayng bata layo kaayo, apan sama sa mga Barlow, nagtuo kami sa Pagkabanhaw ni Jesukristo ug sa mahangtorong matang sa among pamilya pinaagi sa pakigsaad sa balaang pagselyo.
Kami adunay mga katigulangan ug ubang mga minahal ang anaa sa laing kinabuhi nga nag-ingon namo, “Ayaw kami biyai dinhi.” Tungod sa mga pakigsaad sa templo, walay usa nga mabiyaan. Ang atong katungdanan mao ang paghigugma nila, pagserbisyo nila, ug pagtabang sa pagpundok nila pauli.
Kana ang hinungdan nga kita adunay mga ordinansa. Kana ang hinungdan nga kita mohimo og mga pakigsaad. Kana ang hinungdan nga kita magtukod og mga templo. Kana ang hinungdan nga ang Langitnong Amahan mipadala sa Iyang Anak aron mabugto ang mga higot sa kamatayon aron usa ka adlaw kita mohilak sa kalipay atol sa atong mahangtorong panagkita pag-usab uban sa atong mga minahal nga naghulat kanato ug sa presensya sa Amahan ug sa Anak.
Ang atong Langitnong Amahan nahigugma kanato—ninyo ug nako. Hinaot nga kita makakaplag og kalipay ug kalinaw samtang magtuman kita sa atong mga pakigsaad ug moapil sa Ginoo sa Iyang mahimayaong buhat sa pagluwas.