Unsaon Nako sa Pagpakabuhi nga Malaomon?

Ang pagkamalaomon ug dili mabalak-on mao ang usa ka desisyon nga himoon sa matag usa kanato. Kini nga kinaiya sa kasagaran magsugod sa pagkamapasalamaton. Ang pagkamapasalamaton mao ang unang lakang paingon sa pagkamalaomon ug dili mabalaka.

Daghan kaayo ang angay nga pasalamatan. Nagpuyo kita sa kataposan nga dispensasyon ug aduna sa gipahiuli nga ebanghelyo ni Jesukristo nga dili lamang mogiya nato apan usab mohatag nato sa mahayag ug mahimayaon nga umaabot human dinhi.

Ang doktrina ug kultura sa ebanghelyo ni Jesukristo mao ang pagka malaomon. Ang plano sa kalipay mao ang plano sa mahigugmaong Amahan sa Langit sa pagpanalangin sa Iyang tanang anak. Walay mga limitasyon sa kaliwat o kultura niining komprehensibo nga plano.

Akong personal nga pag-ampo nga kita makapakigbahin sa ebanghelyo sa mas hingpit uban sa tanang anak sa atong Amahan. Akong pag-ampo usab nga kita mahiusa inubanan sa pagkadaiya ug nga kita mahimong usa uban sa Manluluwas.

Ganahan ko sa pangamuyo nga pag-ampo sa Manluluwas alang kanato. Nahitabo gayod kini sa hinapos nga mga oras sa Iyang mortal nga kinabuhi sumala sa narekord sa Ebanghelyo ni Juan. Kana nga pag-ampo gitumong ngadto sa mga sumusunod ni Kristo, lakip nato, mao ang petisyon sa Manluluwas ngadto sa Iyang Amahan: “aron silang tanan mausa ingon nga ikaw, Amahan, ania kanako ug ako anaa kanimo, aron sila usab maania kanato.” Sa mosunod nga bersikulo nagpadayon ang Manluluwas, “Ang himaya nga imong gihatag kanako akong gihatag ngadto kanila aron sila mausa, ingon nga kita usa.” Pagkahiusa mao ang giampo ni Kristo sa wala pa Siya budhii ug Ilansang sa krus.

Usa ka dako nga hagit alang sa atong dispensasyon gihatag sa sinugdanan sa pagpahiuli sa ebanghelyo ni Jesukristo. Ang dalan sa pagkamatarong giestablisar sa Ginoo pinaagi sa yano apan mahantorong mga baroganan: Kinahanglan kita motamod sa atong mga igsoon sama sa atong kaugalingon. Kinahanglan kita magpraktis og hiyas ug pagkabalaan. Kinahanglan kita maghiusa. Kon dili kita maghiusa dili kita Iyaha.

Aron magkahiusa, makakat-on kita gikan sa milabay nga panahon ug mag-andam alang sa umaabot.

Unsa ang pipila ka paagi nga kita makakaplag og kalinaw niining mabingkilon ug malalison nga kalibotan?

• Kita mahimong maana sa kalibotan apan dili kalibotanon.

• Mahimo kitang determinado nga dili motugot sa pagkadaotan, pagkamalalison, ug pagkamabingkilon sa kalibotan nga moataki sa kabalaan sa atong hiniusang paningkamot sa pagsunod ug pagsimba sa Manluluwas diha sa atong mga panimalay ug mga pamilya.

• Kita makapuyo nga positibo ug malipayon nga kinaiya kon kita magpabilin nga lig-on diha sa dalan sa pakigsaad.

• Samtang dili kita makakontrol sa uban, makakab-ot kita og kalinaw nga moabot gikan sa personal nga pagkamatarong.

Kita mahimong mahiusa diha sa atong mga kongregasyon bisan asa kita magpuyo. Si Apostol Pablo nakahibalo nga ang mga calling, serbisyo, ug mga kontribusyon sa mga miyembro lahi gayod kaayo, apan pareho ka importante. Gitandi usab niya ang mga bahin sa indibidwal nga lawas sa tawo ngadto sa lawas sa Simbahan. Ang matag bahin sa lawas importante sa tibuok lawas.

Ang ubang mga miyembro adunay mga hagit sa pagbati nga sila importante ug gikinahanglan sa lawas sa mga Santos. Ang punto ni Apostol Pablo mao nga ang matag usa nga miyembro gikinahanglan ug importante.

Sa pagtapos: Kon imong itutok ang imong kinabuhi diha sa Manluluwas, ikaw makakaplag sa imong kaugalingon sa positibo ug malipayon nga paagi ug makabaton og hingpit nga kalipay.

Sama sa maayo kaayo pagkatudlo ni Presidente Nelson:

“Ang kinabuhi puno sa mga pagtipas ug kapakyasan, mga pagsulay ug mga hagit sa tanang matang. Malagmit ang matag usa kanato adunay mga panahon nga ang kaguol, kasakit, ug kawalay paglaom halos misanap kanato. Unya ania kita dinhi aron makabaton og hingpit nga kalipay?

“Oo! Ang tubag usa ka lanog nga oo!

“… Ang mga santos mahimong magmalipayon sa bisan unsang kahimtang. Mahimo kitang mobati og kalipay bisan og bati ang atong adlaw, bati ang semana, o bisan bati ang tuig!

“Ang kalipay nga atong gibati dili kaayo konektado sa mga sirkumstansiya sa atong kinabuhi ug apan ang tanan konektado kaayo sa gitutokan sa atong kinabuhi.”

Kana nga gitutokan mao ang Manluluwas!

Ako mopamatuod nga kon kita determinado nga magpuyo nga positibo ug malipayon, uban sa kahayag sa Manluluwas nga mao ang atong gitutokan ug atong giya, kita magsubay sa dalan sa pakigsaad. Samtang atong higugmaon, sundon, ug simbahon ang Manluluwas, kita makabaton og “kalipay niini nga kalibotan, ug kinabuhing dayon sa kalibotan nga moabot.”