Usa ka Kwentas nga adunay usa ka Saad
Usa ka bililhon nga regalo gikan ni Lolo nakatabang nako nga makatutok sa templo.
Paghulagway pinaagi ni David Comerón
Ganahan ko og naggilaw-gilaw nga mga butang. Kanunay gayod. Ganahan ko kon giunsa sa mga naggilaw-gilaw pagkuha ug pag-aninag sa kahayag, ug sa akong hunahuna mao kana ang hinungdan nga ganahan kaayo ko og kristal nga mga chandelier. Ganahan kaayo ko labi na sa kristal nga mga chandelier sa templo.
Nahinumdom ko nga naglakaw uban sa balaang pagtahod sa usa ka open house sa templo kuyog sa akong pamilya sa nuybe anyos pa ko. Dili ko malimot nga nagbarog ubos sa mga chandelier sa lawak sa celestial nga labihan ang kahingangha. Dili ko makatuo kon unsa ka matahom, ka limpyo, ug ka puti ang tanan.
Sa dihang naglakaw kami pagawas sa templo, ang akong lolo miingon nako nga siya adunay regalo alang nako. Misiga ang akong mga mata samtang gikuha sa akong lolo ang naggilaw-gilaw nga kwentas gikan sa iyang bulsa. Taas kadto nga kwentas nga adunay gamay, usa ka kristal sa tumoy—sama nianang anaa sa templo.
“Kini akong gihimo alang nimo,” miingon si lolo samtang iyang gitaod ang kwentas sa akong liog. Ang akong lolo usa ka electrician. Namaligya siya og tanang matang sa matahom nga mga chandelier. Giingnan ko niya nga gihimo niya ang kwentas nga may sobra nga kristal gikan sa iyang shop ug gusto niya nga isul-ob ko kini aron kini mopahinumdom kanako sa templo.
Mihangyo siya nako nga mosaad nga moadto ko sa templo sa umaabot nga panahon, ug siya mihatag sa iyang pagpamatuod kon sa unsang paagi nga ang templo nakapanalangin sa iyang kinabuhi ug kon sa unsang paagi nga kini makapanalangin sa kinabuhi sa tanan. Matag higayon nga akong isul-ob ang kristal nga kwentas maghunahuna ko sa templo ug unsa ko ka gusto nga moadto sa sulod. Kanunay nakong gihinumdoman kadtong akong gisaad sa akong lolo.
Sa dihang igo na ang akong pangidaron aron mopahigayon og mga pagbunyag sulod sa templo, ganahan ko sa matag kahigayonan nga moadto. Sa templo, kanunay nakong bation nga nakakonektar sa akong Langitnong Amahan. Ug dili gayod nako makalimtan ang akong gibati human sa pagdawat sa akong pagtuga. Human nianang sagrado nga kasinatian, misulod ko sa celestial nga lawak ug migakos sa akong lolo ubos sa matahom nga kristal nga chandelier.
Husto ang akong lolo nga ang templo makapanalangin sa atong kinabuhi. Nagpadayon kini sa pagpanalangin sa akong tibuok nga kinabuhi tungod kay nakatabang kini nako nga mahinumdom sa akong katuyoan dinhi sa yuta.