Ang Inyong Panaw sa Pasko sa Pagkabanhaw
Ang ginagmay nga mga buhat adunay dakong epekto.
Kadaghanan sa mga tawo walay ideya kon unsay lami sa elepante. Bisan pa man, adunay makakutaw sa hunahuna sa komon nga pamahayag nga “Ang labing maayo nga paagi sa pagkaon sa elepante mao ang pag-anan-anam og kitkit niini.”
Kon ang paghinayhinay og kitkit dili ingon ka makapadani, ania ang lain pa: “Ang panaw sa usa ka libo ka milya nagsugod sa usa ka lakang.” Sa duha ka panultihon, ang ginagmay nga mga aksiyon (o mga kitkit, kon pilion ninyo) makahimo og dakong kalainan.
Kini nga pamaagi makatabang ilabi na sa bag-o nga mga buluhaton sama sa pagkat-on og bag-o nga pinulongan o pagplano sa inyong trabaho. Sa samang paagi, kining usa ka butang sa usa ka higayon nga pamaagi makatabang nato nga malamposong magsugod og bag-o nga mga kinaiya, sama sa pagpaningkamot sa pagsaulog sa Pasko sa Pagkabanhaw sa mas makahuloganong paagi.
Pasko sa Pagkabanhaw, Gipalambo
Tingali inyong namatikdan ang dinasig nga tambag niining miaging pipila ka tuig kon unsaon nato sa paghimo og tumong sa pagpalambo sa atong mga pagsaulog sa Pasko sa Pagkabanhaw. Sa miaging Pasko sa Pagkabanhaw, pananglitan, ang Unang Kapangulohan mihagit nato sa usa ka espesyal nga mensahe sa Pasko sa Pagkabanhaw nga “saulogon ang Pagkabanhaw sa atong buhi nga Manluluwas pinaagi sa pagtuon sa Iyang mga pagtulun-an ug sa pagtabang sa pag-establisar og mga tradisyon sa Pasko sa Pagkabanhaw sa atong katilingban sa kinatibuk-an, ilabi na sa sulod sa atong kaugalingong mga pamilya.”
Si Presidente Russell M. Nelson bag-ohay lang mitudlo nga “[Ang Pasko sa Pagkabanhaw] mao ang labing importante nga relehiyoso nga kasaulogan alang sa mga sumusunod ni Jesukristo.”
Klaro nga importante kini! Apan unsaon nato sa pagpalambo ang atong personal nga mga pagsaulog ug mga kinaiya bahin sa Pasko sa Pagkabanhaw? Labi na kon ang Pasko sa Pagkabanhaw wala nato hatagi og dakong pagtagad kaniadto?
Pinaagi nianang susama nga tinguha sa ginagmay ug kanunayng mga buhat nga mosangpot sa dinagkong mga resulta, atong susihon ang sambingay sa kasulatan nga makatabang.
Tolo human sa usa ka Tolo
Ang sambingay sa napulo ka dalagang birhin nga makita sa Mateo 25 nakadasig sa dili maihap nga mga tawo sa tibuok kalibotan sulod sa liboan ka katuigan.
Si Presidente Camille N. Johnson, Kinatibuk-ang Presidente sa Relief Society, mitudlo, “Sama sa lima ka maalamong dalaga diin ang ilang mga suga puno sa lana sa dihang miabot ang pamanhonon, kita mamahimong hingpit diha ni Jesukristo samtang atong gipuno ang atong mga suga sa makaamuma nga lana sa pagkakabig ngadto Kaniya.”
Kanang “makaamuma nga lana sa pagkakabig ngadto [ni Jesukristo]” usa ka gamhanang imahe nga dala niini. Si Jesukristo ug ang Iyang Pag-ula mao ang labing mahinungdanon sa Pasko sa Pagkabanhaw. Bisan kanus-a kita magpaduol ngadto ni Kristo, wala lamang kita magdugang og lana sa atong mga suga, apan kita dungan usab sa pagtahod ug pagsaulog sa Pasko sa Pagkabanhaw. Ang pagkakabig ngadto ni Jesukristo mao ang butang nga nahisama gayod sa Pasko sa Pagkabanhaw nga inyong mahimo.
Si Elder Dale G. Renlund sa Korum sa Napulog Duha ka Apostoles mitudlo usab nga, “Kita maningkamot nga magpabiling takos kanunay sa pagpakig-uban sa Espiritu Santo nga maanaa kanato. Kini nga kapabilidad kinahanglang maangkon sa indibidwal ug sa personal nga paagi, sa hinayhinay. Ang makanunayon, personal, pribado nga mga buhat sa debosyon nagdapit sa Espiritu Santo sa paggiya kanato.”
Tolo human sa usa ka tolo! Pareha gayod kana sa usa ka kitkit o usa ka lakang sa usa ka higayon. Ang ginagmay, makanunayon, ug tinuyo nga mga buhat magdala og anam-anam nga mga kausaban paglabay sa panahon. Kon kamo maningkamot sa pagpalambo sa Pasko sa Pagkabanhaw karong tuiga, ang matag ginagmay nga paningkamot nga inyong himoon aron mas mapaduol ngadto sa Manluluwas ug sa Iyang ebanghelyo makahimo og kalainan.
Ang mga Tabang Nagpadulong Na Kaninyo
Bantayi ang sunod pipila ka bulan alang sa mga ideya ug mga panglantaw bahin sa Pasko sa Pagkabanhaw gikan sa mga magasin sa Simbahan, digital nga mga channel, ug uban pa kon unsaon nga inyong mapalambo ang inyong panahon sa Pasko sa Pagkabanhaw. Makakita kamo og mas daghang ideya kaysa inyong mahimo sa usa lang ka higayon. Apan OK ra kana! Sugdi sa ginagmay ug trabahoa sugod diha. Tolo human sa usa ka tolo, ang inyong suga kusog ug hayag ang siga.