O Le Fanua o Lona Ala
Atonu e le faigofie i taimi uma le ala a le Faaola, ae o le a Ia savali faatasi ma i tatou ma taitai i tatou i le mea tatou te mananao e o i ai.
Ata na tusia e Yukai Du
E masani lava ona tatou filifilia se ala aua e taitai atu ai i tatou i le mea tatou te fia o i ai. Ae e tele atu isi mea i se ala nai lo le na o le taunuuga. O loo i ai foi le laufanua—o le ituaiga o eleele o le a tatou oo i ai.
Ua valaaulia i tatou e Iesu Keriso e savavali faatasi ma Ia (tagai Mose 6:34; Mika 6:8; 1 Ioane 2:6; Mataupu Faavae ma Feagaiga 19:23). O le ala ua Ia valaaulia i tatou e savavali ai i luga o le ala o feagaiga—o le ala i le filemu, olioli, ma le ola e faavavau faatasi ma lo tatou Tama Faalelagi—lea tatou te mananao ia iai.
Ae faape’i lenei ala? O le a le ituaiga o laufanua o le a tatou sopoia a o tatou savavali faatasi ma le Faaola?
Vaapiapi
Na faamautu mai e Iesu e faapea “e vaapiapi le faitotoa, e lauitiiti foi le ala e tau atu i le ola” (Mataio 7:14).
Pe a lagona e faatapulaaina Lona ala, e i ai se mafuaaga. O le vaapiapi o le ala e taofia ai oe mai le laa atu i le mea e te ono tiga ai pe leiloa ai.
Faasasa’o
“Ua sa’o ona ala” (Alema 37:12).
O Lona ala e le fepiopioa’i. O le auala sili lea ona tuusao i la tatou sini o le ola e faavavau. E le afe. Ae o nisi taimi tatou te afeafe solo ai. Ona o le Togiola a le Faaola, e mafai ai ona tatou vave salamo ma toe foi atu i Lona ala.
E Tifato ma o Nisi Taimi e Maamaā
“O le ala [e oo atu i le aiga i le Atua] e tifato ma o nisi taimi e maamaā” (Peresitene Henry B. Eyring o le Au Peresitene Sili, “Fesoasoani ia i Latou i lo Latou Toe Foi Atu i le Aiga,” konafesi aoao Ape. 2010 [Ensign po o le Liahona, Me 2010, 25]).
O le savali agai i luga e mafai ona faigata, ma atonu o le a le mafai ona e vaai i luga o le maupuepue o se mauga o loo e a’ea. Ae e faamalosia ma faamalosiauina oe e le Faaola a o e taumafai e faia mea faigata ua Ia valaaulia oe e fai.
O maa i luga o lou ala atonu e ese mai papa o isi. O ou luitau ma tulaga e a oe lava ia. Ae o le Faaola o le soa faimalaga sili lea ma o le a fesoasoani ia te oe e feagai ma faafitauli uma.
Malamalama Lelei
“O lau afioga o le sulu lea i o’u vae, ma le malamalama i lo’u ala” (Salamo 119:105). “Savavali i le malamalama, faapei ona i ai o ia i le malamalama” (1 Ioane 1:7).
Pe a faapouliuligia lou ala, e mafai e le Faaola ona faamalamalama lou ala, e tusa lava pe lava mo le laa e tasi ona sosoo ai lea ma le isi i lau malaga i le fale i lou Tama Faalelagi.
Saogalemu
“E ui lava ina ou savali i le vanu o le ata o le oti, ou te le fefe lava i se mea leaga; aua o oe ta te faatasi ma au” (Salamo 23:4).
E tusa lava po o le a le taufaafefe, faanoanoa, po o le faigata o lou ala, e mafai ona e maua le filemu i le iloaina a o outou savavali faatasi ma Iesu Keriso, o le a Ia savali faatasi ma oe ma taitai oe i le saogalemu, toe foi atu i le Tama Faalelagi.