O Folafolaga Taua o le Fuafuaga a le Tama

Saunia e Elder David A. Bednar

O Le Korama a Aposetolo e Toasefululua

E tatau ona malena a’e o tatou agaga ma le lotofaafetai a o tatou mafaufau i le fuafuaga sili a le Atua mo i tatou.

o se alii talavou i se faapona o loo nonoa faatasi ai ni pito se lua o se alalaupapa

O le fuafuaga a le Tama Faalelagi o loo faamatala mai ai “folafolaga silisili ese ma le taua” (tagai i le 2 Peteru 1:3–4) ma upumoni e faamatalaina ai lo tatou faasinomaga ma le faamoemoega e faavavau.

E pei ona faamatalaina i le “O Le Aiga: O Se Folafolaga i le Lalolagi”: “O tagata uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”

Ua folafola mai e le Tama Faalelagi ia i tatou afai tatou te mulimuli i Lana fuafuaga ma le faataitaiga a Lona Alo Pele, tausi poloaiga, ma tumau i le faatuatua e oo i le iuga, o le a tatou “maua le ola e faavavau, o le meaalofa aupito silisili lea o meaalofa uma a le Atua” (Mataupu Faavae ma Feagaiga 14:7).

O le galuega a le Atua e taula’i atu i le alualu i luma ma le faaeaga o Ana fanau. O vaega uma o Lana fuafuaga ua mamanuina e faamanuia ai i tatou auā “ua tele lava le taua o agaga i [Lana silafaga]” (Mataupu Faavae ma Feagaiga 18:10).

O Le Fuafuaga a le Tama

I le fono i le muai olaga, sa tuuina mai ai e le Tama Faalelagi i Ana fanau agaga Lana fuafuaga mo lo latou alualu i luma ma le fiafia e faavavau. Sa Ia ta’u mai ia i tatou o le a Ia auina mai i tatou i le lalolagi e faamaonia i tatou, e vaai pe o le a tatou usiusitai ia te Ia ma agavaa ia “faaopoopo le mamalu i luga o [o tatou] ulu e faavavau ma faavavau lava” (tagai i le Aperaamo 3:24–26).

Ma sa Ia fetalai mai lea: “O ai Ou te auina atu? Ma sa tali mai se tasi e pei o le Atalii o le Tagata: O Aʼu lenei, auina atu aʼu. Ma sa tali mai le isi ma fai mai: O aʼu lenei, auina atu aʼu. Ma sa fetalai mai le Alii: O le a Ou auina atu le muamua.

“Ma sa ita le lona lua, … ma, i lena aso, e toatele na mulimuli atu ia te ia” (Aperaamo 3:27–28).

E na o le tasi le fuafuaga na tuuina atu—o le fuafuaga a le Tama. E le’i tuuina mai e lo tatou Tama Faalelagi le fesili, “O le a se mea tatou te faia?” Na te le’i sailia ni manatu, fesili atu mo ni fautuaga, pe talosagaina ni talosaga. O le ute o Lana fesili na taula’i atu i le tagata e tatau ona auina atu e faatino tuutuuga ma tulaga o Lana fuafuaga.

lalolagi faatasi ma le la, masina, ma le fetu

E le’i tuuina atu e Lusifelo se fuafuaga sa palotaina e le toatele o tagata auai i le fono i le muai olaga. Sa fouvale o ia! Sa saili o ia e faaumatia le faitalia o le tagata, sa lafoina i lalo, ma “avea ai o Ia ma Satani, … o le tiapolo, le tamā o pepelo uma, e faasese ma faatauaso tagata, ma taitai faatagataotaua i latou i lona loto” (tagai i le Mose 4:1, 3–4). O le faamaualuga, faasaunoa, ma le manatu faapito na faaosofia ai lona tetee atu i le fuafuaga a le Tama.

o se alii talavou, o Iesu Keriso, ma le ata o le faaolataga

O Le Fuafuaga a le Tama ma le Talalelei a le Faaola

O loo faamatala mai i le fuafuaga ia galuega a le Tama ma le Alo lea e maua ai faamanuiaga o le ola e faavavau mo tagata uma.

O le talalelei a Iesu Keriso o le ala lea tatou te maua ai faamanuiaga folafolaina i le fuafuaga a le Atua, e oo lava i aoaoga faavae, mataupu faavae, sauniga, ma feagaiga e tatau ona tatou talitonu i ai ma mulimuli ai. “E leai se isi lava suafa ua tuuina mai i lalo o le lagi vagana ai Iesu Keriso lenei … e mafai ona faaolaina ai le tagata” (2 Nifae 25:20). O le mea moni lava, o le Alii o Iesu Keriso “o le ala, upu moni, ma le ola: e le alu atu lava se tasi i le tama, pe a le ui mai ia te [Ia]” (Ioane 14:6; faaopoopo le faamamafa).

tusi ma le fuafuaga o le faaolataga o loo tusia i totonu

O Faalaniga o le Fuafuaga i le Tusi a Mamona

Tatou te aoaoina upumoni taua e ala i le faailoaina ma le suesueina o le tele o faalaniga eseese mo le fuafuaga a le Tama i le Tusi a Mamona: O Se Tasi Molimau ia Iesu Keriso. Mo se faataitaiga, mafaufau i faataitaiga nei o faalaniga ua filifilia:

“O le fuafuaga alofa mutimutivale a le Foafoa silisiliese” (2 Nifae 9:6).
“O le fuafuaga a lo tatou Atua” (2 Nifae 9:13
“O le fuafuaga o le faaolataga” (Iaroma 1:2; Alema 24:14).
“O le fuafuaga o le togiolaina” (Alema 12:25, 26, 30, 32, 33; 42:11, 13).
“O le fuafuaga o le toefuataiga” (Alema 41:2).
“O le fuafuaga o le fiafia” (Alema 42:16).
“O le fuafuaga tele o le alofa mutimutivale” (Alema 42:31).

O nei faalaniga taitasi e fesoasoani tatou te malamalama manino atili ai i folafolaga taua o le fuafuaga a le Tama ma faatamaoaigaina ai la tatou vaaiga e uiga i faamoemoega ma uiga o o tatou olaga faaletino.

O le mea taua, o le faalaniga e sili ona faaaoga soo mo le fuafuaga a le Atua i le Tusi a Mamona (“o le fuafuaga o le togiolaina”) e taula’i atu i le togiolaina mai le agasala ma le oti ua mafai ona o le Togiola a Iesu Keriso (tagai i le Alema 12:25; 33:22).

Ua Saunia Le Ala

E tatau ona malena a’e o tatou agaga ma le lotofaafetai a o tatou mafaufau i le fuafuaga sili a le Atua. O le malamalama i Lana fuafuaga e maua ai se vaaiga taua, faatamaoaigaina ai lo tatou olioli, ma faamalosia ai i tatou e faatoilalo o tatou lu’itau ma faigata.

E naunau le Tama Faalelagi mo i tatou e toe foi atu ia te Ia. Na te valaaulia ma folafola mai faamanuiaga, ae o le a Ia le faamalosia lava, fai faamalosi, pe taotaomia lo tatou faaaogaina o le faitalia sa Ia tuuina mai ia i tatou. E tatau ona tatou galulue ma filifili e toe foi atu ia te Ia e ala i le mulimuli i le faataitaiga a Lona Alo Pele.

“Ua uma ona saunia ole ala , ma afai tatou te tepa atu e mafai ona tatou ola e faavavau” (Alema 37:46; faaopoopo le mamafa).

Ou te molimau atu ma le fiafia o le Tama Faalelagi o le tusitala o le fuafuaga paia mo Ana fanau. O Iesu Keriso o lo tatou Togiola ma le Faaola. Ma i le avea ai ma se tasi o Ana Aposetolo o aso e gata ai, ou te molimau atu e moni lava o Ia “o le ala, o le upumoni, ma le ola” (Ioane 14:6; faaopoopo le faamamafa).