O Lau Faafanua e Toe Foi i le Fale
Aisea e taua tele ai le malamalama i le fuafuaga o le faaolataga?
Ata na saunia e Mackenzie Alexander
I le Tusi a Mamona, na amata ai e le perofeta o Iaroma lana talafaamaumau i le faapea mai, “Se a se isi mea e sili atu e mafai ona ou tusia nai lo mea ua tusia e o’u tamā? Aua pe latou te lei faaali mai ea le fuafuaga o le faaolataga?” (Iaroma 1:2)
Afai e manatu o ia na pau lena o le mea tatou te manaomia, o lona uiga la e fai si taua tele o le fuafuaga o le faaolataga!
Ma o lena lava! O le faafanua atoatoa mo o tatou olaga. Na saunoa Peresitene Russell M. Nelson, “O se malamalamaaga i le fuafuaga ofoofogia a le Atua ua aveesea ai le mealilo mai i o tatou olaga ma masalosaloga ma lemautonu mai lo tatou lumanai.”
E mafai faapefea la e lenei faafanua ona fesoasoani ia te oe e faatautaia le lemautonu o le olaga?
O Fea Na Ou Sau Ai?
O le Atua o lou Tama Faalelagi. Sa e ola faatasi ma le Atua ae e te le’i fanau mai. E alofa o Ia ia te oe!
Sa faamalamalama mai e Elder Alan T. Phillips, “E le o oe o se fua faafuaveta o le natura, se matuaoti na foafoa e le atulaulau, po o se taunuuga o anomea e tupu faafuasei i le aluga o taimi. O le mea e i ai se mamanu, e i ai foi se ta mamanu.”
A oo ina faigata le olaga, e faamafanafanaina le iloa ua e i ai iinei mo se faamoemoega ma e leoleoina e se Tama Faalelagi alofa.
O Fea Ou Te Alu i Ai?
E te le o i ai iinei e fesēa’i solo ma le leai o se faamoemoe—e i ai sou taunuuga! E finagalo le Tama Faalelagi ia e sau i le fale ia te Ia ma avea e faapei o Ia. Sa Ia saunia le fuafuaga o le faaolataga ina ia mafai ona e maua faamanuiaga uma o Lona malo (tagai i le Mataupu Faavae ma Feagaiga 14:7).
O le iloaina o le fuafuaga a le Tama Faalelagi o le a fesoasoani ia te oe i le olaga. Pe a e “faia se vaaiga mamao” ma mafaufau faaselesitila, e tele filifiliga e faigofie atu ona fai—e aofia ai le filifili e mulimuli ia Iesu Keriso.
E Faapefea Ona Oo Iina?
E ese mai le tuuina mai ia i tatou o se taunuuga, o le fuafuaga o le faaolataga o loo faaalia ai foi le ala e oo atu ai iina.
O Iesu Keriso o le faataitaiga atoatoa lea o le mulimuli i le ala e toe foi atu ai i le aiga. Afai e te vaai atu ia te Ia—ma savavali faatasi ma Ia—o le a Ia fesoasoani ia te oe e toe foi atu i le Tama Faalelagi ma avea atili e faapei o Ia. Na faamatala mai e Elder Sergio R. Vargas o le Fitugafulu, “I le ta’ele o o tatou loto taitoatasi o loo i ai se manao e toefoi atu i lo tatou aiga faalelagi, ma o Iesu Keriso o la tatou polokalama taiala faalelagi lea. O Ia o le ala.”
Ae Faapefea Pe a Ou Leiloa?
E ui lava ina i ai se faafanua, e mafai ona e faia se afe sese. O le a e faia pea ni mea sese. Ae peitai aua le popole! Na saunia e le Tama Faalelagi se Togiola ina ia mafai ai ona e salamo i taimi uma, toe liliu atu ia te Ia, ma avea atili e faapei o Ia. Manatua: “Tatou te le tumau i luga o le ala o feagaiga e ala i le lē faia lava o se mea sese. Tatou te tumau i luga o le ala i le salamo i aso uma.”
A o e suesue i le fuafuaga o le faaolataga, ia manatua sa mamanuina ma le alofa. E finagalo le Tama Faalelagi ia e sau i le fale. Ma afai e te mulimuli i Lana faafanua, o le a Ia fesoasoani ia te oe ia e oo atu iina.