Faasoaina Atu o La’u Molimau i se Vitio Fusu

Sa ou filifili e faasoa atu le talalelei i se galuega faatino faaiu mo la’u vasega 12 o le Igilisi. Sa fai mai lo’u faiaoga matou te tusia ma faaali atu se lauga faatalitonu tagata i se mea matou te faananau i ai. Sa tuuina mai ia i matou le tele o le saolotoga i mea e talanoa ai ma le auala e faaali atu ai.

Sa ou filifili e talanoa atu i le auala e mafai ai ona tatou faatoilaloina faigata uma e ala atu i le Atua ma e ala i le taulaga togiola a Keriso. Sa ou manao foi e tuufaatasi lena mea ma se isi mea ou te fiafia i ai—fusu. Ou te fiafia lava e toleni ma fusu i le aluga o tausaga. Ou te maua le olioli i le avea ma tagata sili atu. Peitai, o nisi taimi, ou te lavea ai, ma e tiga. Ou te pau ma le mafai ona ou tu i luga.

Sa ou filifili e pu’e se vitio faagaeetia lea ou te faatusatusa ai le olaga i se fusuaga. Sa ou faia se leo o la’u tautalaga a o faasolo le vitio. Sa ou talanoa e uiga i le olaga, o nisi taimi o le a tu’i faafaatusa mai a tatou foliga; o le a tatou matua vaivai lava e faaauau pea; o le a tatou masalosalo i o tatou gafatia ma mafaufau pe aoga le taumafai. Sa ou molimau atu e i ai se fuafuaga a lo tatou Tama oi le Lagi mo i tatou uma—e ala ia Keriso e mafai ai ona tatou faatoilaloina mea faafeagai uma. Ou te iloa moni lava a aunoa ma Keriso, o au o se meanoa, ae ona o Ia, e mafai ona ou ausia mea ou te lei mafaufauina lava!

Sa ou matua galue malosi ina ia mautinoa o le ata tifaga, o le savali, ma laualuga o na mea uma o la’u molimau na faailoa moni mai ai lava mea sa ou lagonaina i lo’u loto.

Ae ou te lei faaalia atu la’u galuega faatino i la’u vasega, sa ou lagonaina sina popole. Aua paga, ua aoaoina i tatou e le lalolagi e faapea o le tele o tulaga faatauaina faaKerisiano e faaanamua ma e le toe taua. Sa ou popole pe faapefea e lenei mea ona aafia ai lo’u togi po o manatu o a’u uo. Ae sa ou mauaina se faamautinoaga o se mea lelei tele lenei mea! Sa le na o le mauaina o se togi lelei—ae sa faatatau i le molimau atu i le mea na ou iloa e moni.

A o ou faaali atu le vitio i le vasega, sa ou toe lagonaina foi o se mea lenei na finagalo lo’u Tama Faalelagi ou te faia. Ina ua uma le vitio, sa ou te’i i le amata patipati o tagata uma. Sa pasi mai e tagata ia te a’u ni tusiga i o latou manatu e uiga i la’u galuega faatino. O le tele o nei tusiga na ta’ua ai mea e pei o le "Viia le Atua" po o le "E lelei le Atua." O le toatele o tamaiti o la’u vasega na fai mai ia te au sa latou lagonaina se mea faapitoa tele a o latou matamata i la’u vitio.

Ina ua maua la’u togi, sa ou fiafia lava e vaai ua ou maua ni togi atoatoa. Sa faafetai mai lo’u faiaoga ia te a’u mo la’u molimau ma mo le taimi na ou faaaluina e faaali atu ai i le ala sa ou faia ai.

Ou te molimau atu o loo tatou ola i taimi faigata—ua ta’ua e le lalolagi le lelei o le leaga ma le leaga o le lelei . Ae o loo i ai pea le tele o le lelei nai lo le leaga! Ou te iloa a tatou faasoa atu ma le lototoa ma le malosi o tatou talitonuga ma tuuina atu a tatou molimau, e le gata o le a faamanuiaina i tatou, ae o le a tatou vaaia foi olaga o isi o siomia i tatou ua faamanuiaina foi.