Savali Faatasi ma A’u

Pe na i ai se taimi na talosagaina ai oe e fai se mea e te le’i manatu e mafai ona e faia? Atonu e te le’i lagonaina le le lava o le malosi po o le lava o lou atamai, pe na e popole o le a taliē mai isi ma faitioina oe. Afai na e faalogoina lagona faapena, e le o tuua na o oe.

I le faitau afe o tausaga ua mavae, sa i ai se alii e igoa ia Enoka. Na fetalai atu le Atua ia Enoka e tala’i atu le salamo i tagata—o nisi o tagata sili ona amioleaga ua vaai i ai le lalolagi.

Sa manatu Enoka e lē mafai ona ia faia. Sa ia ta’u atu i le Atua e laitiiti tele o ia, sa le’i lava ni ana uo, ma sa le lava lona poto (tagai i le Mose 6:31).

Ae na tuuina atu e le Atua ia Enoka se folafolaga. Sa Ia ta’u atu i le tagata ua fefe, “Alu atu ma fai e pei ona Ou poloaiina ai oe” ma “o le a sosola ese mauga ai ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe; o lea savali faatasi ma aʼu” (Mose 6:32, 34).

“Savali faatasi ma aʼu.” Oka se valaaulia faigofie, ma matagofie.

Na folafola atu e le Atua ia Enoka afai o le a lava lona lototele e amata ai, ona faatasi lea o le Atua ma ia i laasaga uma o le ala. O le a faia e le Atua ia Enoka ia malosi ma faamalosia o ia e faia nisi mea ma fesoasoani ia te ia ia avea atili nai lo le mea e mafai ona ia mafaufauina.

O se tasi o suafa e tele o le Faaola o Emanuelu, po o le “Ua ia i tatou le Atua” (Mataio 1:23). O loo i ai i le suafa ma le natura o le Alii le savavali faatasi ma i tatou. O le filifiliga e ā tatou—pe o le a tatou savavali faatasi foi ma Ia?

O nei aso, tatou te vaavaai atu ai ia Enoka o se alii o le faatuatua ma se perofeta ma se taitai maoae. Ae ao leʼi i ai Enoka le perofeta, sa i ai se Enoka laitiiti o lē sa masalosalo ia te ia lava ae sa filifili lava e savavali faatasi ma le Atua.

Pe a faigata le olaga, pe a e lē lagonaina ua lava oe, ia manatua le folafolaga a le Alii ia Enoka, ma ia te oe. O le a Ia savali faatasi ma oe. O le a Ia le tuua lava na o oe, e oo lava i se laʼa se tasi.

Emanuelu. Ua ia i tatou le Atua. Ua ia te oe le Atua!

E pei o outou alii talavou, na talosagaina e le Alii ia Enoka e faataunuu tiutetauave taua o le perisitua. O Lana galuega o le talaʼi atu lea o le salamo i se nuu amioleaga. Sa faaalia e Enoka ona masalosaloga. “[O aʼu] ua na o se tama,” o lana tala lea. “Ua inoino mai tagata uma ia te aʼu … e gese laʼu tautala; o lea, aisea ua avea ai aʼu ma au auauna?” (Mose 6:31).

Sa tali mai le Alii ma le mana ma le faamautinoaga. “Alu atu ma fai e pei ona Ou poloaiina ai oe. … “Tatala lou gutu, ma o le a faatumuina” Ua i ou luga loʼu Agaga … ; o le a sosola mauga ai ou luma … ; o lea, savali faatasi ma aʼu” (Mose 6:32, 34).

Na aoaoina e Enoka a tuuina mai e le Alii ia i tatou se galuega, tatou te le feagai ai na o i tatou. Pe a tatou osia ma tausia feagaiga ma Keriso, tatou te savavali faatasi ma Ia ma faasoa atu i Lona mana—e avea i tatou ma meafaigaluega i Ona aao.

E pei o Enoka, e i ai sau matafaioi taua: auaunaga, auauna atu i le malumalu, faatautaia o le faamanatuga, suesueina o tusitusiga paia, ola i tulaga faatonuina o le talalelei, salamo, saunia mo misiona, ma isi mea. E mafai ona lagona ai le lofituina. Atonu e te lagona le lē agavaa. E le afaina lena. E le faatatau i le faia na o oe o na mea. E faatatau i le filifili i le asō—i lenei aso ma aso uma—e savavali faatasi ma le Atua.

Faatasi ma Lana fesoasoani, e mafai ai ona e faia mea uma. O le a Ia faamalosia, faamagalo, ma faagafatia oe e sili atu nai lo lou tomai masani. E alofa o Ia ia te oe! I le avea ai ma Au Peresitene Aoao o Alii Talavou, matou te alolofa ia te outou ma tulimatai atu e auai faatasi ma outou i le suesueina o le autu musuia o le 2026: “Savali Faatasi ma Aʼu.”