“Savali Faatasi ma A’u”—Se’i o Tatou Talatalaina Auiliili

Saunia e Eric D. Snider

O Mekasini a le Ekalesia

O le autu o le tausaga lenei e fa upu le umī, ae o na upu taitasi e tele naua mea e aoaoina ai i tatou.

E pei o le autu a le autalavou i le tausaga ua te’a, “Vaai atu ia Keriso,” o le autu o lenei tausaga—“Savali Faatasi ma A’u”—o ni upu valiata e i ai uiga loloto. I lenei olaga, o le toatele o i tatou o le a le maua le avanoa e vaai pe savavali moni ai ma le Faaola. O le a la le uiga o le “savali” faatasi ma se tasi e le o i ai faaletino? Sei o tatou talatalaina auiliili.

Savali

Ina ua valaauina e le Alii ia Enoka e avea ma se perofeta, sa ia tuuina atu ia te ia se folafolaga: “O au upu uma o le a Ou taʼutonuina; ma o le a sosola mauga ai ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe; o lea, savali faatasi ma aʼu” (Mose 6:34).

Afai na folafola atu ia te oe o le savavali faatasi ma le Atua o lona uiga o le a Ia lagolagoina au upu, aveese mea faalavefau mai lou ala, ma faatasi pea ma oe—ia, aisea o le a e lē savali faatasi ai ma Ia?

Tala maoae: Ua folafola mai ia te oe lenei mea, atonu e lata mai nei, e pei o le Aso Sa na te’a atu nei. Pe a e tagofia le faamanatuga, e te tautino atu e “manatua pea o Ia ma tausi Ana poloaiga”—i se isi faaupuga, ia savavali faatasi ma Ia. Ma aisea e te faia ai lenei mea? “Ina ia mafai ona [e] maua pea lona Agaga e faatasi ma [oe]” (Mataupu Faavae ma Feagaiga 20:77; faaopoopo le faamamafa).

O lenei la, o le a e matauina e le’i ta’uina mai e le Alii ia Enoka, “Tu iinei ma vaavaai solo faatasi ma a’u.” Na te le’i fai mai, “Nofo i lalo ma malolo faatasi ma a’u mo sina taimi.” Sa Ia fai mai, “Savali faatasi ma aʼu.” E tatau ona tatou galulue i uunaiga faaleagaga tatou te maua. E tatau ona tatou faia ma tautatala i mea tatou te talitonu i ai e sa’o.

E pei ona tuuina mai e Peresitene Marion G. Romney (1897–1988), o se fesoasoani i le Au Peresitene Sili, “E faatoa mafai lava ona Ia taialaina o tatou tulagavae, pe a tatou faaminoi o tatou vae.”

Ae ia matau po o le a se isi mea e le’i fetalai mai ai le Alii. Na te lei fai mai, “Tamomoe faatasi ma a’u.” Na te le’i fai mai, “Oso e aunoa ma ni taumafaiga i luga o ou faafitauli uma, faatasi ma a’u.” E le o fetalai mai o Ia ia i tatou e “momo’e televave atu nai lo [tatou] malosi” (Mosaea 4:27). Na te le faamoemoeina i tatou e agai pea i luma i le saoasaoa maualuga. Na te le o faamoemoeina i tatou e aua nei faia ni mea sese pe lotovaivai. E pau lava Lona manao, ia tatou faaauau pea.

Faatasi ma

Tatou te savavali faatasi ma le Faaola. E lē muamua atu ia te Ia. E mautinoa lava e lē aluese mai ia te Ia!

Pe a e savali moni ma se tasi, e te savali i o latou autafa. Ae i lenei upu valiata, tatou te tumau teisi lava i tua o le Faaola. Na te taitai, ae tatou mulimuli—ma le toto’a.

Pe a e i ai i le ala sa’o, e le “taitai” atu le ala ia Iesu—o loo i ai foi o Ia i luga! Ia manatua le faamanatuga! O le Alii, e ala i Lona Agaga, o le a faatasi pea ma oe, pe afai e te valaaulia pea o Ia.

O le Tama Faalelagi ma Iesu Keriso, e le o popole tele po o fea o luga o le ala o e i ai aua o loo La popole po o fea le itu o loo e faasaga i ai. O le a La faafetaui oe po o fea lava o e i ai. E le afaina pe telegese foi lau savali.

A’u

E tatau ona tatou faia se faatinoga (SAVALI). E tatau ona tatou faia e tusa ai ma poloaiga a le Atua ma uunaiga a le Agaga (FAATASI MA). Ma e tatau ona tatou faia nei mea uma e aunoa ma se tasi ae na o Iesu Keriso (A’U).

(Talu ai o Iesu Keriso, Lona Tama Faalelagi, ma le Agaga Paia ua tasi uma i le faamoemoega—tagai i le Ioane 10:30; 17:21; Mataupu Faavae ma Feagaiga 35:2—e sa’o le faapea atu o loo e “savali faatasi ma le Atua,” “savali faatasi ma le Faaola,” “savali faatasi ma le Agaga,” po o soo se mea o lena natura.)

E tele leo e mulimuli ai i lenei lalolagi. E leai se tulaga lē lava o tagata faatosina, tagata lauiloa, ma tagata polokiki e mananao ia te oe e “savavali” faatasi ma i latou (pe tuu atu foi ia i latou ni tupe). O mea e fai mai ai isi atonu e aoga, ae seiloga lava e ogatusa ma aoaoga a le Faaola.

Savali Faatasi ma Ia.