Unutea J.

Ata na pueina e Stephane Sayeb

Sa o se aoauli, ma ou te manatuaina e pei o ananafi. Sa fai mai lo’u tina ou te nofo i lalo ma faalogo ona sa i ai se mea e fesili mai ai ia te a’u. Faatoa ia mauaina se imeli e talosagaina ai au e tuuina atu se lauga i le konafesi a le siteki. Ina ua ia ta’u mai ia te au lenei mea, sa ou meia: ou te le fiafia e tautala i luma o se aofia. Sa ou tilotilo atu ia te ia ma mata lapopoa.

Sa ia tuuina mai ia te au se taimi e mafaufau i ai ma ole atu i le Alii. Sa ia ta’u mai foi ia te au o se auala lelei tele lea e valaaulia ai lo’u tama, e le lotu, e auai i le matou konafesi faalesiteki mo le taimi muamua. O lea sa ou mafaufau i ai, ma sa ma tatalo faatasi ma lo’u tina.

Sa ou malie e lauga i le konafesi. Ina ua mavae lena, sa matou anapopogi ma tatalo soo o se aiga ina ia mafai e le Agaga ona musuia au ma ina ia mafai ona i ai se aafiaga o la’u lauga i olaga o tagata, aemaise lava o lo’u tama.

Ou te iloa sa ootia lo’u tama i lena aso. Ina ua ou tuuina atu la’u lauga, sa ou tilotilo sa’o atu i ona mata ina ia mafai ona ia iloa o a’u upu ma lo’u faatuatua i le Atua, po o le a lava le telē pe laitiiti, e moni.

Ou te iloa e alofa le Faaola ia te au aua sa i ai pea o Ia iina mo au, aemaise lava i le taimi o lenei tofotofoga. Ma e tusa lava pe i ai ni o’u masalosaloga, ou te iloa o le a i ai pea o Ia iina mo a’u. Po o le a lava le tulaga ou te oo i ai, pau lava le mea ou te faia o le liliu atu ia te Ia ma se loto faamaoni.