E Faaleleia Mea Uma Pe a E Faalagolago i le Atua

I le taimi lea, sa amata ona ou masalosalo i le moni o le talalelei, o la’u molimau, ma pe o ai Iesu Keriso. I se tasi taimi, sa oo lava ina ou fesiligia Lona i ai ma amata ona ou mafaufau o a’u o se tagata e le talitonu i le Atua. Sa malō ma ma’a’a lo’u loto e pei o se maa aisa.

O lena vaega o lo’u olaga sa matuai faigata ma lavelave. Ou te manatu e mafua lenei mea, ona a tatou le toe talitonu ia Iesu Keriso ma Lona mana, o le a leai se uiga o o tatou olaga ma o le a faanoanoa.

Mulimuli ane, sa uunaia a’u e lo’u tamā e toe auai i le lotu. Sa ou faia lenei mea e ui lava sa ou le mautonu ma taulimaina ni fesili se tele.

I se tasi aso i le lotu, sa ou vaaia ai se pepa lautele o i ai se savali e uiga i le seminare. O lenei mea na faaosofia ai se fiafia ia te a’u. Sa ou alu atu i lo’u epikopo e fesili atu ia te ia e uiga i ai. Sa vave ona ia faaopoopoina a’u i le talanoaga a le vaega seminare ma fai mai e amata i le 5:30 i le taeao.

O lea, sa amata ai ona ou auai i le seminare. O lenei mea na fesoasoani ia te a’u e faia ai ni uo fou ma iu ai ina maua se molimau i le Ekalesia ma tusitusiga paia. Sa i ai so’u faiaoga na faamalosiau moni i la’u vasega ma aumai i fafo le mea sili o loo ia i matou. Sa ou iloaina o le suesueina o tusitusiga paia e mafai moni ai ona tatou iloa le Faaola. E i ai se eseesega i le va o le faalogo i le molimau a se tasi ma le sailia o lau lava molimau e ala i le suesue ma le faatuatua.

I le amataga, sa ou iloa e uiga i le Tama Faalelagi ma Iesu Keriso e ala i mea na ta’u mai e isi ia te a’u. Ae e le mafai ona tatou faalagolago atoa i molimau a isi. E manaomia ona tatou saili ia iloa le Faaola mo i tatou lava.

E manaomia ona tatou faaavanoaina se taimi mo le Faaola ma mo mea paia ina ia mafai ai ona avea i tatou ma se tasi o Ona soo. Ua ou aoaoina e te iloa o Ia pe a e:

1. Saili ma le loto i ai ia te Ia.

2. Faitau tusitusiga paia.

3. Taumafai e faaleleia atili faaleagaga.

4. Tatalo.

5. Auai i le malumalu.

6. Auauna atu i isi.

7. Anapogi.

8. Mulimuli i Ana faataitaiga.

9. Ia maua se loto lelei.

10. Tete’e atu i le tautala leaga pe faitatala e uiga i isi.

O nei mea na fesoasoani ou te iloa ai le Faaola—ma avea ai ma se tasi o Ona soo. O le avea ma se soo o Iesu Keriso e tāua tele auā e mafai ona tatou faaaogaina Lona malamalama e fesoasoani ai i isi. E ala i a tatou faataitaiga lelei, e mafai ai e isi ona iloa le tele o le avea o le talalelei o se faamanuiaga.

Ina ua ou toe foi i le lotu, sa ou i ai i se tulaga maualalo lava i lo’u olaga—sa tumu i masalosaloga, e aunoa ma ni uo, e aunoa ma se faamoemoe, ma le le iloaina po o ai moni lava a’u po o le a foi lo’u faamoemoega.

O le taimi nei, o le talalelei o le “afi” lea ua faamalamalamaina ai lo’u olaga ma fesoasoani ia te a’u e faia mea sa’o ma avea ai ma se tagata e sili atu ona lelei. A aunoa ma le talalelei, ou te le iloa po o fea o le a ou i ai.

E faaleleia mea uma i le olaga pe a e faalagolago i le Atua. Mai le taimi e te sailia ai o Ia, o le a amata ona e a’e mai ma sau i luga mai le lua ma o le a amata ona faaleleia mea uma. Ioe, o le a oo mai pea faigata, ae o lenei faatuatuaga ma le manao e talitonu o le a faasolosolo malie ona siitia ai oe. Atonu e umi se taimi, ae o le a lelei mea uma!

Pe a e faalagolago i le Tama Faalelagi, o le a mafai ona e faasaga atu i soo se mea o loo feagai ma oe—pe o luitau, masalosaloga, faafitauli tau le soifua maloloina, po o le tuuatoatasi. Mo se faataitaiga, atonu e te ausia ni togi lelei i se suega, faaleleia lou soifua maloloina, po o le mauaina o tali—o nisi taimi o tali sa e sailia talu mai lou 10 tausaga, e pei foi o lo’u tulaga—pe afai e te sailia o Ia ma faalagolago ia te Ia.

Ua ou mautinoa nei mea. Faafetai i le talalelei, e mafai ona ou faapea atu ua suia au. O le mea moni, ua suia mea uma—o lo’u loto, mafaufauga, amioga, ma mataupu faavae. Ua ou iloa nei le upumoni, ma o lena mea e faia ai se eseesega tele. Ua faaleleia mea uma ona o le talalelei a Iesu Keriso.