Unsay Ipasabot sa Tinud-anay nga Paghinulsol?

Ang paghinulsol moresulta og kausaban sa mga kinaiya ug batasan, apan ang yanong pag-usab sa mga kinaiya ug batasan dili paghinulsol.

Atol sa akong pagserbisyo isip presidente sa Brigham Young University–Idaho, nakig-istorya ko usa ka Domingo sa hapon sa bishop sa campus. Wala motug-an sa ngalan sa indibidwal, siya mipasabot nako nga siya nakadawat sa pagkompisal gikan sa usa ka batan-on kinsa mihimo sa mosunod nga pamahayag: “Bishop, nakasupak ko sa balaod sa kaputli sa Biyernes sa gabii. Ang pagpakigsulti nimo mao ang kataposang butang sa akong listahan sa mga butang nga buhaton aron maghinulsol. Karon nga ako nakakompisal, nindot na ang akong gibati.”

“Ang pag-ila ug pagbiya sa sala; ang pagbati og kahasol sa tanlag ug ang paghimo og pagpahiuli tungod sa sala; ug ang pagkompisal sa mga sala ngadto sa Dios ug, kon gikinahanglan, ngadto sa atong mga lider sa pagkapari ang tanan mahinungdanon ug importanteng mga elemento sa proseso sa paghinulsol. Bisan pa man, kining mahinungdanong mga lakang wala maglangkob og basta lang listahan nga tsekanan sa mga pamatasan nga mahimo nato nga mekanikal, dali, ug kaswal ra nga makompleto. Kon kita mobuhat niining mga butang ug mapakyas sa pag-ila ug pagdepende sa Manunubos ug sa Iyang maulaon nga sakripisyo, nan bisan ang atong labing maayo nga mga paningkamot makawang.

Usahay ako maghunahuna kon kita isip mga miyembro sa Simbahan mosag-ulo sa lain-laing mga lakang sa paghinulsol—sama sa pag-ila, pagbasol, ug pagpahiuli—ug laktawan ang labing importante nga konsiderasyon sa tanan: ang Manunubos. Ang pagpalayo gikan sa daotan dili makahatag og espirituhanon nga pagkaayo nga dili modangop ngadto ni Kristo.

Ang Manluluwas sa kanunay gitawag nga Labing Maayo nga Mananambal, ug kini nga titulo adunay dakong simbolikanhong kaimportante.

Palihog ikonsiderar ang sala isip espirituwal nga samad nga makapahasol sa konsensya o, sama sa gihulagway ni Alma sa iyang anak nga si Corianton, “pagbasol sa tanlag.” Ang epekto sa kasakit sa atong lawas sama ang epekto sa sala sa atong espiritu—usa ka pasidaan sa kakuyaw ug proteksiyon sa dugang kadaot. Gikan sa Manluluwas ug sa Iyang Pag-ula mabati ang makahupay nga tambal nga makaayo sa atong espirituwal nga mga samad ug makatangtang sa kahasol sa konsensya. Apan, kining tambal magamit lang pinaagi sa mga baroganan sa hugot nga pagtuo kang Ginoong Jesukristo, ug paghinulsol. Ang mga resulta sa sinsero nga paghinulsol mao ang kalinaw, kahupayan, espirituhanong pagkaayo ug pagbag-o, ug hingpit nga kalipay.

Ang mga presidente sa stake, misyon, ug district; mga bishop ug mga presidente sa branch, naglihok pinaagi sa awtoridad sa mga yawe sa pagkapari nga ilang nadawat sa dihang sila gi-set apart, sinugo nga mga representante sa Manunubos, kinsa mohatag sa importante nga tabang sa proseso sa paghinulsol ug pagkaayo. Kini nga mga lider mao ang mga luyo-luyo nga mga doktor kinsa makadayagnos sa espirituwal nga mga sakit ug mohatag og gikinahanglan nga mga medikasyon ug mga tambal.

Ang seryoso nga espirituwal nga mga samad magkinahanglan og padayon nga paningkamot ug panahon aron kompleto ug hingpit nga mamaayo. Ug ang proseso sa pagkaayo mismo mahimong masakit.

Mapasalamaton gayod kita samtang mamalandong kita sa saad sa kasulatan na si Kristo “mobangon gikan sa pagkamatay, dala ang pagpang-ayo diha sa iyang mga pako;; ug kadtong tanan nga magatuo sa iyang ngalan maluwas sa gingharian sa Dios.”

Samtang kita maghinulsol ug mobalik ngadto sa Ginoo, importante nga kita matinuoron sa atong mga kaugalingon. Kinahanglan nga maningkamot kita sa pagbuntog sa paghimo og pamalibad, pamasangil, ug pangagpas nga makapatipas nato sa tinud-anay nga pagbalik ngadto sa Ginoo.

Ug samtang kita maghinulsol ug mobalik ngadto sa Ginoo, kita kinahanglan adunay tinuod nga katuyoan ug magmatinuoron Kaniya kansang kapasayloan atong gitinguha. Ang tiunay nga pagkompisal ngadto sa Dios, ug kon gikinahanglan ngadto sa mga lider sa pagkapari, kinahanglan hingpit ug kompleto.

Ang pipila ka tawo nga kulang sa pagsabot mahitungod sa matang sa paghinulsol nagtuo nga sila makasala sa kalkulado ug giplano nga paagi, nagpaabot nga sayon nga mokumpisal ngadto sa bishop ug dayon moadto sa templo, ngadto sa natad sa misyon, ug sa ubang espirituwal nga mga destinasyon.

Isip mga lider sa gipahiuli nga Simbahan sa Ginoo, kita adunay ligdong nga obligasyon sa pagtudlo sa mga miyembro nga dili magpadala sa maong sayop nga panghunahuna. Unsaon sa usa ka tawo sa paghinulsol ug pagpangayo og kapasayloan inubanan sa tinuod nga katuyoan nga gani ang iyang tinuod nga katuyoan mao ang pagpakasala? Unsaon sa pagbalik sa usa ka tawo ngadto sa Ginoo inubanan sa hingpit nga katuyoan sa kasingkasing kon ang paghinulsol kaswal, taphaw, o nagtakda og panahon aron makalikay nga maulawan sa publiko. Ang maong gihunahuna na daan ug giplano nga pag-usik-usik nagbugal-bugal sa Pag-ula ni Kristo. Ang kapasayloan gikan sa maong sala sa pagkatinuod posible, apan ang dalan nga kinahanglan nga subayon sa usa ka tawo dili sayon, ug ang panaw dili mubo.

Gibalik-balik sa paghatag og gibug-aton diha sa mga kasulatan mao ang kanunay nga pagkasumpay sa baroganan sa paghinulsol, sa kaimportante sa sagrado nga mga pakigsaad ug mga ordinansa, ang makapabalaan nga gahom sa Espiritu Santo, ug ang mahimayaong panalangin sa kanunay nga pagbaton sa kapasayloan sa mga sala.

Isip mga miyembro sa gipahiuli nga Simbahan sa Ginoo, nabulahan kita sa atong unang paglimpyo gikan sa sala may kalabotan sa bunyag ug pagdawat sa gasa sa Espiritu Santo. Ug kanang unang panalangin gipalambo pinaagi sa potensyal alang sa nagpadayon nga paglimpyo gikan sa sala nahimong posible pinaagi sa kanunay nga panag-uban ug makapabalaan nga gahom sa Espiritu Santo—bisan ang ikatulo nga sakop sa Dios nga Kapangulohan. Kining makapalipay nga mga panalangin importante tungod kay “walay hugaw nga butang ang makapuyo uban sa Dios.”

Ang ordinansa sa sakramento usa ka balaan ug binalik-balik nga pagdapit nga sinserong maghinulsol ug mabag-o sa espirituwal nga paagi; importante kini sa proseso sa nagpadayon nga pagkabalaan.

Ang lihok sa pag-ambit sa sakramento, sa kaugalingon niini, dili makapasaylo sa mga sala. Apan kon maghinulsol kita, mangandam nga mahunahunaon, ug moapil niining balaan nga ordinansa uban sa mapainubsanong kasingkasing ug mahinulsolong espiritu, ang saad nga kita makabaton kanunay sa Espiritu sa Ginoo nga magauban kanato. Ug dayon, pinaagi sa makabalaan nga gahom sa Espiritu Santo, kita sa kanunay makabaton sa kapasayloan sa atong mga sala.

Dili tuyo sa atong Langitnong Amahan ug sa Iyang Hinigugmang Anak nga kita makasinati og espirituwal nga pagbag-o, paghupay, ug pagpahiuli bisan makausa sa atong mga kinabuhi sa dihang kita gibunyagan, nagdawat sa gasa sa Espiritu Santo, ug nakompirmahan isip mga miyembro sa gipahiuli nga Simbahan sa Ginoo. Ang bunyag pinaagi sa pagpaunlod, pagpadandong sa mga kamot alang sa gasa sa Espiritu Santo, ug ang sakramento dili linain ug tinago nga mga ordinansa.

Hinuon, kini mao ang mga elemento nga may kalabotan sa usag usa ug gidugang ngadto sa usag usa sa matubsanong kauswagan. Ang matag sunod-sunod nga pakigsaad ug ordinansa nagbayaw ug nagpalambo sa atong espirituwal nga katuyoan, tinguha, ug pasundayag.

Ang han-ay nga pagkasunodsunod sa pagkadisipulo yano ug prangka: mopakita og hugot nga pagtuo diha sa Manluluwas, maghinulsol, modawat og mahinungdanon nga mga pakigsaad ug mga ordinansa, magbag-o, maningkamot nga padayong magbaton og kapasayloan sa mga sala, ug mopadayon nga magmatinud-anon diha sa dalan sa pakigsaad. Ang plano sa Amahan, ang Pag-ula sa Manluluwas, ug ang unang baroganan ug mga ordinansa sa ebanghelyo naghatag og grasya nga atong gikinahanglan aron mouswag pagtulun-an human sa laing pagtulun-an ug lagda human sa laing lagda padulong sa mahantorong padulngan.

Ang paghinulsol ug kapasayloan sa mga sala mao ang langitnong nga mga panalangin nga nahimong posible pinaagi sa walay kinutoban ug mahangtoron nga maulaong sakripisyo ni Ginoong Jesukristo. Kini nga mga baroganan tiunay, ug kini tinuod,. Mosaksi ko sa pagkabalaan, pagkatinuod nga buhi ug dili hitupangan nga gugma sa Manluluwas alang kanato.