Unsa ang atong nahibaloan mahitungod sa mga magbalantay sa karnero sa unang Pasko?

Shepherds [Mga Magbalantay sa Karnero], ni Brian Call

Kita adunay pipila nga nahibaloan mahitungod sa mga magbalantay sa karnero sa unang Pasko.

Sila anaa duol sa Betlehem. Ang mga magbalantay sa karnero anaa “niadtong dapita” diin ang pagkatawo ni Kristo nahitabo (Lucas 2:8). Ug nakaabot sila sa Betlehem nga naglakaw samtang anaa pa Siya didto (tan-awa sa Lucas 2:15–16).

Nagbuhat sila sa ilang katungdanan. Kining mga magbalantay sa karnero “nagtukaw sa kagabhion aron pag-atiman sa ilang mga hayop didto sa kaumahan” (Lucas 2:8). Sila mga maayo ug matinud-anon nga mga magbalantay sa karnero, sama sa Manluluwas—ang Maayong Magbalantay (tan-awa sa Juan 10:11, 14).

Sila nasayod sa mga panagna bahin sa Mesiyas. Sila nasayod gayod kon unsay gihisgotan sa anghel sa dihang siya mipahibalo sa pagkatawo ni “Kristo nga Ginoo” (Lucas 2:11), ang Mesiyas nga gipanagna sa karaang panahon.

Hilabihan ang ilang kahinam. Sa dihang ang anghel misulti nila mahitungod sa “bata … nga naghigda sa pasungan” (Lucas 2:12), “midali” sila sa pag-adto aron motan-aw Kaniya (Lucas 2:16).

Gipakigbahin nila ang maayong balita. “Gisugilon” nila unsay ilang nadungog ug nakita kalabot sa mensahe sa anghel mahitungod sa pagkatawo ni Kristo (Lucas 2:17).

Sila nagpasalamat ug nagdayeg sa Dios. Human niining tanan, sila “namauli, nag-awit ug mga pagdayeg sa Dios tungod sa tanan nga ilang nadungog ug nakita” (Lucas 2:20).