Sekretong mga Ninja nga Santa

Paghulagway pinaagi ni Katelyn Budge

Alang sa akong pamilya, ang Pasko usa ka bakasyon nga puno sa kalipay. Sukad sa akong mahinumdoman, ang akong pamilya nakabuhat og butang nga among gitawag og Sekretong mga Ninja nga Santa. Simpli kini apan makapadasig nga tradisyon. Una, mag-andam mi og gasa o kard para sa usa ka tawo nga nanginahanglan. Dayon mosekreto mi og adto sa iyang hagdanan, ibilin ang gasa, pabagtingon ang doorbell, ug modagan og layo sa dili pa siya makasakop namo. Murag apil ka sa usa ka espesyal nga misyon sa Pasko!

Nindot kaayo nga mahimong Sekretong mga Ninja nga Santa. Sa matag higayon, mobati ko niining kaanindot, kalipay sa kahiladman nga makapahiyom nako, sama sa miulbo nga kalipay sa akong kasingkasing. Kini nga tradisyon nakapausab sa akong panglantaw sa Pasko.

Sa dihang mas batan-on pa ko, naghunahuna ko nga ang Pasko sa kasagaran mahitungod lamang sa mga regalo. Apan karon, nakita nako kini isip panahon sa pagserbisyo sa uban ug pagpakigbahin sa gugma ni Kristo. Among gihimo ang pagserbisyo nga kabahin sa matag Pasko, maningkamot sa pagtabang sa daghang mga tawo kutob sa mahimo. Dili kini kanunay nga sayon—usahay nagpasabot kini nga momata og sayo aron motabang sa silingan nga nagpuyo sa unahan o igahin ang Sabado sa hapon aron maglimpyo sa chapel. Apan kanunay kini nga sulit sa oras. Ang ganti mao ang pagkakita sa pagkamapasalamaton sa ubang tawo, pagkadawat og mga panalangin sa akong kaugalingong kinabuhi, ug pagsinati sa putli nga kalipay nga naggikan sa kahibalo nga nagbuhat ko og maayo.

Kon maghunahuna ko mahitungod ni Jesukristo, maghunahuna ko kon unsa Niya kita ka pinangga ug giunsa Niya pagpakita kana nga gugma pinaagi sa pagserbisyo sa uban. Ang Iyang kinabuhi nagdasig nako nga moserbisyo usab, ug nahibalo ko nga kon moserbisyo ko sa uban, nagserbisyo ko sa Dios. Ang Pasko dili lamang bahin sa paghatag og mga gasa, bahin kini sa paghatag sa imong kaugalingon. Mao kana ang gitudlo kanako sa Sekretong mga Ninja nga Santa, ug kana ang akong gipangandoy nga magpabilin sa akong hunahuna kada adlaw.