Maghimo og Kalainan pinaagi sa Yano nga mga Imbitasyon
Dili gyod nimo mahibaloan kon unsa ang maayo nga mahitabo sa imong pagpakigbahin sa gugma ug kahayag sa Manluluwas ngadto sa uban.
Paghulagway pinaagi ni Kyungeun Park
Usa ka adlaw sa dihang si Presidente M. Russell Ballard (1928–2023) usa pa ka junior sa high school, ang iyang higala nga si Nedra nangutana niya, “Russ, nganong wala ka magtambongan sa seminary?”
Nianang higayona, ang mga ginikanan ni Presidente Ballard wala na motambong sa simbahan. Usahay moadto siya kuyog sa iyang buotan nga mga higala, apan wala siya motambong sa seminary. Busa si Nedra midapit niya, ug pagkasunod adlaw miabot siya pagka alas 6:30 a.m. alang sa sayo sa buntag nga seminary. Sukad niana, miapil na siya sa seminary matag adlaw—bisan sa bugnaw, puno sa niyebe nga mga kabuntagon.
“Ang mga butang nga akong nakat-onan sa seminary mitandog sa akong kasingkasing,” si Presidente Ballard miingon. “Mitubo ang akong pagpamatuod samtang nagkat-on ko mahitungod ni Jesukristo ug sa Iyang gipahiuli nga ebanghelyo. Nakapaandam kini kanako sa pagserbisyo sa akong misyon sa England ug sa pagpadayon sa tibuok kinabuhi nga serbisyo ngadto sa Ginoo ug sa Iyang Simbahan.”
Si Nedra lagmit walay ideya kon unsay mahitabo sa iyang yano nga imbitasyon, apan ang iyang ehemplo nagpakita nga ang mga oportunidad anaa bisan asa aron ipakigbahin ang kahayag ug kalipay nga dala sa Iyang ebanghelyo. Karong panahona sa tuig—panahon sa Pasko—mao ang espesyal nga panahon sa pagbuhat sa ingon samtang atong saulogon ang pagkatawo ni Jesukristo, ang “kahayag, kinabuhi, ug ang paglaom sa kalibotan.”
Sugdan inubanan sa Gugma
Ang Manluluwas mitudlo nga ang labing mahinungdanon sa tanang sugo mao ang “higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna” ug ang “higugmaa ang imong isigkatawo sama sa imong kaugalingon” (Mateo 22:37, 39).
Magsugod kita niana kon kita modapit sa uban sa pag-adto sa simbahan ug sa mga kalihokan sama sa Pasko nga panagtigom alang sa sakramento o Christmas party sa ward. Ang imong gugma sa Dios molig-on sa imong tinguha ug abilidad sa pagserbisyo Kaniya ug sa paghigugma ug pagserbisyo sa uban. Kon kadtong anaa sa imong palibot makabati nga ikaw tinuoray nga nahigugma ug nagpakabana nila, sila lagmit nga mahimong mas andam nga makakat-on pa og dugang mahitungod nimo—lakip na sa unsay imong gituohan.
Ipakigbahin ang Unsay Anaa sa Imong Kasingkasing
Pananglitan ang imong higala modapit nimo sa usa ka party, apan nakapili na ka nga moadto sa temple trip sa ward nianang adlawa. Imbes moingon nga “Pasensya, dili ko makaadto,” mahimo usab ka nga mosulti sa imong higala mahitungod sa templo ug sa mga panalangin nga nahatag niini sa imong kinabuhi. Ingon lang niana ka yano!
Si Presidente Ballard mitudlo nga kita “mopamatuod sa unsay [atong] nahibaloan ug gituohan ug unsay [atong] gibati” ug nga ang “lunsay nga pagpamatuod … mahimong dad-on pinaagi sa gahom sa Espiritu Santo ngadto sa mga kasingkasing sa uban kinsa bukas sa pagdawat niini.” Mahimo usab kita nga mopakigbahin sa unsay anaa sa atong mga kasingkasing “pinaagi sa pagkahimong maayong mga silingan ug pinaagi sa pag-amuma ug pagpakita og gugma.” Kini “mopadan-ag sa ebanghelyo sa atong kaugalingong mga kinabuhi, ug … modan-ag ngadto sa [uban] sa mga panalangin nga ikatanyag sa ebanghelyo.”
Tingali kulba ang pagpakigbahin. Tingali mabalaka ka nga ang uban dili interesado o gani mosalikway nimo. Mahimong mahitabo kana usahay, apan ang Espiritu mogiya nimo samtang mag-ampo ka ug magpadayon sa unahan uban sa kiasog sa pagpakigbahin sa unsay imong nahibaloan nga tinuod sa matag kahigayonan nga imong maangkon.
Ayaw Pag-undang!
Bisan kon ang matang sa tubag nga gihatag ni Presidente Ballard ngadto sa imbitasyon ni Nedra mahimong dili nimo masinati, importante nga ayaw pag-undang! Ang mga tawo mahimong mobalibad sa imong mga imbitasyon matag karon ug unya. Kon mahitabo kana, dawata kini nga malipayon ug dili masuko. Ang usa ka “dili” pagtambong sa simbahan o kalihokan o sa pagkahibalo pa og dugang mahitungod sa imong gituohan kasagaran wala magpasabot nga ang tawo “dili” [na ganahan nimo].
Padayon sa pagkahimong usa ka higala. Paghimo og positibong butang kutob sa imong mahimo. Ug kanunay nga mangita og mga paagi sa pagpakigbahin sa kahayag sa Manluluwas pinaagi sa imong mga pulong ug binuhatan.
Sama ni Nedra, dili gyod nimo mahibaloan kon unsa ang maayo nga mahitabo sa imong pagpakita sa gugma, pagpakigbahin sa unsay anaa sa imong kasingkasing, ug pagdapit sa uban nga mobati sa gugma ug kahayag sa Manluluwas—panahon sa Pasko ug sa kanunay.