Ang Kasabotan sa Paghunong sa Gubat Panahon sa Pasko

Bisperas kadto sa Pasko niadtong 1914.

Ang Dakong Gubat—sa kadugayan gitawag nga Unang Gubat sa Kalibotan—miulbo sulod sa lima ka bulan.

Didto sa Belgium, ang mga sundalo sa managlahi nga habig nagkombate sa gubat gikan sa taas, pig-ot nga mga tagoanan nga kanal sa kinalot nga yuta.

Ang hawanan diha sa tunga-tunga sa duha ka grupo gitawag nga “No Man’s Land.”

Liboan ka mga sundalo sa parehong habig napatay dinhi niini nga mga tagoanan nga kanal o sa No Man’s Land.

Apan sa Bisperas sa Pasko, ang mga tropa sa Britanya nakadungog sa mga German nga nanganta og mga daygon sa Pasko.

Ang mga sundalo sa Britanya nagsugod usab sa pagkanta.

Nanganta sila sa lainlaing pinulongan, apan ang mga awit bahin sa pagkatawo sa atong Manunubos nahibaloan sa tanan.

Ang diwa sa maong panahon—ang mensahe ni Jesukristo mahitungod sa kalinaw, gugma, ug kapasayloan—mipatigbabaw sa mga sundalo sa parehong habig.

Kadaghanan nila mga batan-ong lalaki nga mga Kristiyano nga nagsaulog sa ilang unang Pasko nga layo sa panimalay.

Ang mga sundalo mibutang sa ilang mga armas ug mabinantayon nga nangatkat gikan sa mga tagoanan nga mga kanal ngadto sa No Man’s Land.

Walay bisan usa nga mipaboto.

Kining batan-on nga mga lalaki—”magkaaway” tungod lamang sa nasod nga ilang gigikanan—nagsugod sa pag-istoryahanay.

Naghinatagay sila og gagmay nga mga gasa sama sa kendi ug mga subenir.

Nagpatid-patid sila og bola sa football.

Migahin sila og panahon sa paglubong sa ilang mga patay.

Kay dili kapugngan, ang gubat kinahanglang ipadayon.

Apan ang kalibotan kanunay nga mahinumdom sa kasabotan sa paghunong sa gubat panahon sa Pasko.

Nagpakita kini nga ang pagtuo ngadto sa Manluluwas, si Jesukristo, makapahitabo sa usa ka butang nga gusto sa tanan:

Kalinaw.