Andam na ba alang sa Mahangtorong Kaminyoon?
Ania ang lima ka paagi sa pagpangandam isip usa ka batan-on.
Sa dihang mga duha pa lang ka semana sukad ko naminyo, hapit gayod nako masunog ang among apartment. Naghimo ko og toast dihang sa kalit lang ang among bag-ong toaster miulbo ngadto sa nagdilaab nga kalayo.
Samtang nagbarog didto nga nakurat, ang akong bag-ong bana miaksiyon dayon. Gidagan niya pagawas ang toaster ug giitsa nga pakulob. Apil sa akong napaig nga toast, migawas ang … maayong pagkasunog nga manwal sa mga instruksiyon. Oops.
Salamat na lang, wala kinahanglana nga mahimong hingpit ang imong paghimo og toast (o bisan unsa pang butang) aron mahimong andam alang sa mahangtorong kaminyoon. Apan adunay pipila ka butang nga ikaw makahimo sa pagpangandam, isip usa ka batan-on, karon dayon.
Kon nagtuo ka nga ang mahangtorong kaminyoon dili pa nimo kinahanglanon, padayon lang sa pagbasa. Oo, ang kaminyoon tingali moabot pipila pa ka tuig. Apan ang kaminyoon ug pamilya mao ang sentro sa plano sa Langitnong Amahan alang sa kalipay—sa laing pagkasulti, kini importante gayod kaayo. Susiha kining lima ka ideya ug sugdi ang pagpangandam karon.
1. Palamboa ang Imong mga Pakigrelasyon
Kumusta ang imong mga relasyon ngadto sa imong mga ginikanan ug mga igsoon? Ug kon dili kaayo ka makaharong, tingali adunay butang nga angay nga tarongon. Mahimo usab nimong tarongon ang imong mga relasyon ngadto sa ubang mga tawo. Makighinabi! Pakig-istorya sa usa ka tawo nga bag-o, bisan sa … kaatbang og sekso. Kon mapraktis nimo ang mga kahanas sa pakigrelasyon, mas sayon na lang kini sa higayon nga ikaw magsugod na sa seryoso nga pakig-date.
2. Paningkamot sa Pagsunod sa Balaod sa Kaputli
Alang sa Kalig-on sa mga Kabatan-onan: Usa ka Giya sa Paghimo og mga Pagpili nag-ingon: “Tungod kay ang sekswal nga mga pagbati sagrado kaayo ug gamhanan kaayo, ang Dios mihatag kaninyo sa Iyang balaod sa kaputli aron sa pag-andam kaninyo sa paggamit niini nga mga pagbati sa Iyang katuyoan. Ang balaod sa kaputli nagpahayag nga ang Dios nagtugot sa sekswal nga kalihokan tali lamang sa usa ka lalaki ug usa ka babaye kinsa minyo” ([2022], 23). Ang pagpaningkamot sa pagsunod sa balaod sa kaputli moandam nimo alang sa mas makahuloganong relasyon sa kaminyoon.
3. Ikonsiderar ang Pagserbisyo og Misyon
Nakaserbisyo ko og misyon sa Guadalajara, Mexico. Ang pagpuyo kuyog sa usa ka kompanyon 24/7 lisod usahay ug miandam nako alang sa umaabot nga mga relasyon. Mitubo usab ko sa espirituwal nga paagi. Si Presidente Russell M. Nelson nag-ingon: “ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. … Alang kaninyong batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad.” Kon gusto ka nga moserbisyo apan dili segurado kon ikaw makahimo ba sa pisikal o sa mental nga paagi, pakig-istorya sa imong bishop mahitungod sa mga opsiyon nga mohaom sa imong mga kahimtang, lakip na ang pangserbisyo nga mga misyon.
4. Moadto sa Templo
Nahibalo ka nga ang templo mao ang dapit nga adtoan, apan kahibalo ka ba nga makatabang kini nimo sa pagpangandam alang sa mahangtorong kaminyoon? Samtang moapil ka sa mga bunyag diha sa templo (ug, sa dili madugay, sa ubang mga ordinansa), ikaw mapanalanginan sa gahom sa Dios aron matabangan ka, lakip na sa pakig-date ug sa kaminyoon. Ang pagserbisyo sa imong mga katigulangan diha sa templo moandam usab nimo sa pagserbisyo sa imong umaabot nga kapikas (tuohi ko—sa kaminyoon, ang pagserbisyo mahinungdanon). Ug ang pagpabiling takos sa usa ka rekomend sa templo ug pagtuman sa imong mga pakigsaad moandam nimo nga maselyo sa templo diha sa pakigsaad sa mahangtorong kaminyoon sa umaabot.
5. Paghinulsol Kada Adlaw
Gawas sa hapit masunog ang balay, nakahimo ko og daghang sayop sukad sa pagkaminyo. Apan tungod ni Jesukristo, OK ra kana! Sa kaminyoon, walay usa nga hingpit. Dili gihapon ka mahimong hingpit karon. Padayon lang sa pagpaningkamot sa pagsunod sa Manluluwas ug sa paghinulsol samtang naghimo niini. Kon buhaton nimo kini, ang Langitnong Amahan moandam nimo, motabang nimo, ug mogiya nimo. Sa higayon nga maminyo na ka, padayon sa pagpaningkamot sa pagpalambo. Maayo na lang kay ang mahangtorong kaminyoon ingon lang niana—mahangtoron. Ikaw ug ang imong kapikas makapadayon sa paghinulsol ug pag-uswag nga manag-uban paingon sa kinabuhing dayon.