Mga Gasa sa Tanan nga Henerasyon
Samtang mokonekta kamo ngadto sa inyong family history, kamo ug ang inyong mga katigulangan makadawat og daghan nga panalangin.
Mga paghulagway pinaagi sa Guev Design
Ang Kapaskohan mao ang usa ka espesyal nga panahon kauban sa pamilya. Tingali nagpaabot kamo sa inyong paborito nga mga tradisyon sa pamilya o sa mga gasa nga inyong ihatag ngadto sa inyong mga gikinakanan o mga igsoon.
Apan kumusta ang mga sakop sa inyong pamilya sa pikas nga habig sa tabil?
Ang buluhaton sa family history usa ka importante nga bahin sa pagpundok sa Israel, nga mao ang “labing mahinungdanon nga buhat sa kalibotan.” Ug ang katubsanan sa mga patay gihimong posible pinaagi sa Pag-ula sa Manluluwas, kansang pagkatawo atong gisaulog niining panahona. Kay ang Kapaskohan panahon man sa pagpanghatag, unsa nga mga gasa ang inyong mahatag—ug madawat—pinaagi sa family history?
Usa ka Koneksiyon sa Tanang Panahon
Samtang nagdako, nagtuo ko nga nahuman na ang akong buluhaton sa family history. Sa dihang sakto na ang akong pangedaron aron makaadto sa templo, ang tanang nakarekord nga mga ordinansa sa akong mga katigulangan nakompleto na. Murag wala nay lain pang butang nga akong mahimo.
Dayon akong nakaplagan ang mga rekord sa lola sa akong lola nga si Elva Butler.
Si Elva natawo sa Utah human mibalhin ang iyang mga ginikanan didto uban sa mga pioneer. Mihimo siya sa iyang kaugalingong mga pakigsaad samtang buhi pa siya, mao nga wala ko maghunahuna nga may mahimo pa ko para niya. Apan ang pagkaplag sa iyang mga rekord nahimong dako kaayo nga panalangin—para nako!
Wala gyod ko makahimamat ni Elva, apan human makatan-aw sa iyang mga litrato, sa mga gisulat sa journal, ug mga sulat, gibati nako nga nakaila ko niya. Ganahan siya og mga libro ug mga balak, sama gyod nako! Nakadayeg ko giunsa niya pagsalig sa Dios sa panahon sa iyang personal nga mga kalisod.
Tungod sa iyang pagtuo, ang akong pagtuo nalig-on. Gibati nako nga siya ug ang uban nakong mga katigulangan nagbantay nako.
Ang Espiritu ni Elijah
Ang karaang propeta nga si Elija gipadala aron “ipabalik ang mga kasingkasing sa mga amahan ngadto sa mga anak, ug ang mga anak ngadto sa mga amahan,” (Doktrina ug mga Pakigsaad 110:15). Nahitabo kini sa dihang iyang gikomperma ni Joseph Smith ang mga yawe sa gahom sa pagselyo. Mao nga ang espirituwal nga mga pagbati nga mogiya nato sa pagmugna og kasuod tali sa mga henerasyon sa kasagaran gitawag nga “espiritu ni Elijah.”
Ang kasaysayan sa pamilya dili kanunay nga sayon. Tingali ang inyong buluhaton sa family history murag “nahuman” na sama sa akoa. Tingali gamay ra ang inyong family tree kay wala nay mga rekord nga inyong ikadugang o ikakonekta sa mas daghang mga tawo. Bisan unsay dagway sa inyong family tree, masinati ninyo ang espiritu ni Elijah kon ilingi ninyo ang inyong pagbati ngadto sa inyong mga katigulangan. Kon buhaton ninyo kini, makabaton kamo og mas maayong panabot sa inyong katungdanan diha sa plano sa kaluwasan.
Gamhanan kana nga gasa. Unsa nga mga gasa ang inyong ikahatag agi og balos sa inyong katigulangan?