Usa ka Tradisyon sa Pasko—Kausaban

Niadtong 1843, ang Taga-Britanya nga magsusulat nga si Charles Dickens misulat og talagsaon nga istorya A Christmas Carol. Mahitungod kini sa usa ka tigulang nga tawo nga ginganlan og Ebenezer Scrooge, nga walay pagpakabana ni bisan kinsa o sa bisan unsa kaysa sa iyang kwarta. Aron mapakita kon unsa ka miserable nga tawo si Scrooge, gihulagway siya ni Dickens nga mabugalbugalon sa Pasko ug ngadto ni bisan kinsa nga gustong magsaulog niini. Dayon, pagka Pasko, gibisita nianang gabii sa mga espiritu nga mipakita niya sa iyang mga Pasko kaniadto, karon, ug sa umaabot. Kini nga mga panan-awon nakapamalandong niya sa iyang kinabuhi, sa kahimtang sa iyang kalag, ingon man sa iyang mga relasyon sa ubang tawo. Misaad siya nga mag-usab—ug nag-usab siya. Ang bag-o, mas maayo nga Scrooge mas malipayon ug mipanalangin sa uban.

Si Elder Gerrit W. Gong sa Korum sa Napulog Duha ka Apostoles sa makausa naghisgot bahin niini nga istorya ug miingon:

“Niini nga Pasko, tingali makadawat kita—ug motanyag—sa bililhong mga gasa ni Jesukristo sa kausaban ug paghinulsol, sa pagpasaylo ug paghikalimot, sa paghatag niana nga mga gasa ngadto sa uban ug sa atong kaugalingon.

“Makig-areglo kita sa sayop nga nahitabo sa miaging tuig. Kalimti ang emosyonal nga mga kabalaka ug kahasol, ang mga panagbingkil ug mga kalagot nga nakapasamok sa atong kinabuhi. Hinaot nga atong hatagan ang usag usa sa atong bag-o nga mga posibilidad imbes maghunahuna kanunay sa atong nangagi nga mga limitasyon. Atong hatagan ang bag-ong Scrooge nga anaa sa matag usa kanato og kahigayonan nga mausab.

“Ang atong Manluluwas miabot panahon sa Pasko aron sa paghatag og kagawasan sa bihag—ug dili lamang niadtong anaa sa bilanggoan. Makapalingkawas Siya kanato gikan sa mga kalag sa atong mga kagahapon, mobadbad sa mga kadena ug mga pagmahay sa atong mga sala ug sa mga sala sa uban. Makatubos Siya kanato gikan sa atong nakasentro sa kaugalingon, hakog nga pagkatawo pinaagi sa pagpakatawo pag-usab diha Kaniya.”

Dili kamo kinahanglan nga sama ka ngil-ad ni Scrooge aron matugotan ang Pasko nga mousab kaninyo ngadto sa mas maayo. Nan, unsaon sa matag usa kanato paghimo sa Pasko nga panahon sa pagbag-o ug pag-usab? Ania ang pipila ka ideya alang sa pagsugod:

• Magpili og hiyas sa Manluluwas aron maoy tutokan sa matag Pasko. Pweding magtuon mo og usa ka kinaiya ni Jesukristo atol sa Kapaskohan ug sulayan ang mas maayong pagsunod sa Iyang mga paning-ingnan. Alang sa tabang, matan-aw ninyo ang Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo, kapitulo 6.

• Magdugang og nakasentro ni Kristo nga tradisyon. Kon gibati ninyo nga ang inyong pagsaulog sa Pasko nagkinahanglan og dugang nga kahulogan, sulayi ang pagdugang og tradisyon nga makatabang ninyo nga mas makatutok ni Jesukristo. Dili ni kinahanglan nga bongga. Pwede mong maminaw sa mas daghang nakasentro ni Jesus nga musika, moserbisyo og tawo sa inyong pamilya, modapit og mga higala sa simbahan alang sa Pasko nga tigom sa sakramento, o magbuhat og proyekto sa paggama og Talan-awon sa Pagkatawo ni Jesus.

• Usba og gamay ang usa ka tradisyon aron himoong mas maayo. Aron makahimo og gamay nga maayong kausaban sa inyong tradisyonal nga mga kalihokan, mahimong mopaapil mo og bag-ong tawo o modugang og nakasentro ni Kristo nga elemento niini.

• Balibari ang usa ka tradisyon o imbitasyon kon mabug-atan mo. Kon gibati ninyo nga ang inyong lista sa kalihokan sa Disyembre puno na sa nag-abot nga mga kalihokan ug kamo wala nay panahon sa paghunahuna mahitungod sa Manluluwas o paggahin og panahon uban sa mga minahal sa kinabuhi segon sa inyong ganahan, ayaw kaguol sa pagtangtang og usa ka kalihokan.

Kamo usab posibleng mahisama sa bag-ong Scrooge: “Nailhan siya, nga nasayod kon unsay maayo nga pagsaulog sa Pasko.” Masaulog ninyo ang Pasko sa maayong paagi kon pilion ninyo nga mas maduol sa Langitnong Amahan ug sa Manluluwas sa lainlaing paagi matag tuig.