Mga Saad alang sa Kahangtoran
Ang pagkahibalo nga ang mga pamilya mahimong mahangtoron nakapanalangin sa akong pamilya sa hangtod. Makapanalangin usab kini sa imong pamilya.
Mga ginikanan ni Elder Soares, nga si Aparecido ug si Mercedes Soares
Sa batan-on pa, ang akong amahan, si Aparecido, dili interesado sa relihiyon. Ang iyang mga ginikanan maayo nga mga tawo apan dili relihiyoso. Apan, sa dihang nahamtong na siya, nagbasa siya sa Biblia, nagtambong og mga klase sa Biblia, ug nagtuon sa kinabuhi ni Jesukristo. Mao kini ang hinungdan nga nainteresado kaayo siya sa ebanghelyo sa Manluluwas ug sa pamilya. Gusto siya nga maminyo sa usa ka tawo nga susama og interes.
Ang akong inahan, si Mercedes, naggikan sa relihiyoso kaayo nga pamilya. Sila mitambong sa simbahan ug nagbuhat sa unsay gitudlo sa ilang relihiyon. Nagdako niana nga kahimtang, ang akong inahan wala gayod mopalta sa pagsimba.
Human nga ang akong mga ginikanan naminyo ug natawo ang akong tulo ka igsoong lalaki ug ako, gibuhat nila ang ilang labing maayo sa pagpadako namo sumala sa mga pagtulun-an sa Manluluwas. Usa ka adlaw ang akong iyaan miingon sa akong amahan, “Kon gusto gyod nimong padak-on ang imong upat ka lalaki nga nakasentro diha ni Kristo ug adunay Dios sa inyong pamilya, kinahanglan ka nga magkat-on pa og dugang mahitungod sa akong simbahan.”
Usa siya ka miyembro sa Ang Simbahan ni Jesukristo sa mga Santos sa Ulahing mga Adlaw.
Ang Ebanghelyo Nagpanalangin sa Akong Pamilya
Ang akong amahan dili kaayo interesado nga mahibalo pa og dugang mahitungod sa simbahan sa akong iyaan, ug walay nahitabo hangtod nga ang mga misyonaryo nanuktok sa among pultahan. Samtang nagtudlo sila namo, usa ka butang nga nakapainteresado sa akong mga ginikanan sa gipahiuli nga ebanghelyo ni Jesukristo mao ang kaimportante sa pamilya ug sa unsang paagi nga ang ebanghelyo makapanalangin sa mga pamilya.
Sulod sa pipila ka bulan, ang akong mga ginikanan mitambong sa simbahan ug nasuod sa mga miyembro, apan wala sila mabunyagi dihadiha dayon. Samtang nakigkita sila sa mga misyonaryo ug nagpadayon sa pagtuon sa ebanghelyo, ilang nakat-onan ang kaimportante sa pagtudlo sa ilang mga anak sa kahayag ug kamatuoran ug nga ang mga pamilya mahimong mahangtoron. Sa kaulahian, nabunyagan sila.
Ang ideya nga makabaton og mahangtorong mga pamilya mitandog sa kasingkasing sa akong mga ginikanan sa hilabihan nga nahimo kining mahinungdanong punto sa ilang pagkakabig. Kanunay usab sila nga nagdapit sa mga silingan sa pagpaminaw sa mga leksiyon sa mga misyonaryo.
Pag-ugmad og Mahangtorong mga Pamilya
Human sa bunyag sa akong nga ginikanan, kanunay na sila nga nagpahigayon og family home evening ug pagtuon sa kasulatan, matinud-anong nagtambong sa simbahan, ug nagsugod sa buhat sa family history. Pinaagi niadto nga mga paningkamot, nanghinaot sila nga makaugmad og usa ka pamilya nga nakasentro sa ebanghelyo ni Jesukristo ug nagtinguha nga maselyo isip mahangtorong pamilya.
Sa tuig nga ang akong mga ginikanan nabunyagan, walay templo sa Brazil. Ang labing duol nga templo sa among gipuy-an sa São Paulo mao ang Mesa Arizona Temple, mga 6,000 ka milya (9,650 km) ang gilay-on! Ang pagbiyahe mahal kaayo, mao nga ang akong mga ginikanan naghulat og pipila ka tuig alang sa pagpahinungod sa São Paulo Brazil Temple, ang labing una nga templo nga gitukod ug gipahinungod sa tibuok South America, una pa nila madawat ang ilang mga ordinansa ug maselyo. Nianang higayona, nagserbisyo ko sa misyon sa Rio de Janeiro.
Mga duha ka bulan sa wala pa mahuman ang akong misyon, ang akong presidente sa misyon mitugot sa akong kompanyon ug nako nga mobiyahe sa tibuok gabii uban sa mga miyembro sa stake gikan sa Rio de Janeiro paingon sa São Paulo Brazil Temple aron maselyo ko ngadto sa akong mga ginikanan ug makadawat sa akong kaugalingong mga ordinansa sa templo. Ang akong kasinatian sa templo adunay dakong epekto sa nahibiling panahon sa akong misyon. Ganahan kong mopamatuod bahin sa templo ug sa kaimportante sa plano sa Dios alang sa mga pamilya. Ang templo nakapausab pod sa akong panglantaw sa umaabot.
Si Elder Soares nga usa pa ka batan-ong misyonaryo, uban sa iyang igsoong lalaki ug mga ginikanan
Sa dihang nauli na ko gikan sa akong misyon, gusto kong mangita og mahangtoron nga kompanyon ug maselyo sa templo. Una nakong nahimamat ang akong asawa, si Rosana, samtang nagserbisyo kami sa sama nga misyon. Pipila ka bulan human sa among misyon, nagkita kami pag-usab atol sa usa ka sayaw sa multistake. Nagsugod kami sa pag-date, ug paglabay sa duha ka tuig, nagminyo kami ug naselyo sa templo uban sa tumong sa pagpadako og among kaugalingon nga mahangtorong pamilya.
Si Elder Soares ug iyang asawa, si Rosana
Si Rosana ug ako nagtambayayong sa pagmugna og usa ka pamilya nga nakatutok sa Manluluwas, sa Iyang mga pagtulun-an, ug sa mga pagtulun-an sa Iyang mga propeta ug mga apostol. Pag-abot sa panahon, napanalanginan ko nga iselyo ang akong tulo ka anak ngadto sa ilang mga kapikas. Ang makita sila nga nagluhod sa altar sa templo usa ka dili makalimtan ug matahom nga kasinatian. Karon, ang among mga anak nagpadako sa ilang mga anak diha sa ebanghelyo—sama sa gihimo sa akong mga ginikanan alang sa akong mga igsoong lalaki ug kanako ug sama sa gipaningkamotan ni Rosana ug nako nga himoon alang nila. Makita nako ang mga panalangin sa ebanghelyo nga mahangtorong nagpadayon alang sa among pamilya!
Si Elder Soares uban sa iyang asawa ug mga anak, ug sa ilang mga kapikas
Ang Manluluwas Naghimo Niini nga Posible
Bisan asa ko moadto sa usa ka buluhaton sa Simbahan, maningkamot ko sa pagpangita og gamayng Talan-awon sa Pagkatawo ni Jesus aron paliton ug dad-on sa panimalay. Si Rosana ug ako mibati nga kini nga mga Talan-awon sa Pagkatawo ni Jesus makatabang nga mapaduol kami ngadto sa Manluluwas. Karon aduna kami ubay-ubay nga koleksiyon! Usa ka tuig sa wala pa ang Pasko, among gibutang ang among mga Talan-awon sa Pagkatawo ni Jesus diha sa duha ka dagkong mga estante sa among panimalay. Human sa Pasko, nakadesisyon nga ipabilin lang kini diha. Matag adlaw kadto nga mga Talan-awon sa Pagkatawo ni Jesus mopahinumdom namo sa unsay labing importante namo—ang Manluluwas, Iyang ebanghelyo, ug among pamilya.
Si Elder Soares mitugot sa iyang koleksiyon sa mga Talan-awon sa Pagkatawo ni Jesus nga mopahinumdom niya sa Manluluwas sa tibuok tuig.
Alang namo, ang pamilya mao ang tanan tungod kay “ang pamilya mahinungdanon sa plano sa Tiglalang alang sa walay kataposan nga destinasyon sa Iyang mga anak.” Apan kon wala si Jesukristo, kana nga plano dili posible. Ang Iyang Pag-ula ug ang Iyang ebanghelyo naghimong posible sa saad bahin sa mahangtorong mga pamilya.
Si Presidente Russell M. Nelson mitudlo, “Pinaagi lamang sa makaluwas nga mga ordinansa sa ebanghelyo ni Jesukristo nga ang mga pamilya mahimaya. Ang [labing mahinungdanong katuyoan] diin kita maningkamot mao nga kita mahimong malipayon isip usa ka pamilya—na-endowed, nabugkos, ug naandam alang sa kinabuhing dayon diha sa presensya sa Dios.”
Sa atong panahon, ang mga propeta ug mga apostol nagtudlo nga “ang kalipay dinhi sa kinabuhi sa pamilya labaw nga makab-ot kon gipasikad sa mga pagtulun-an ni Ginoong Jesukristo.” Bisan unsa pa ang sitwasyon sa imong pamilya, kon imong buhaton ang imong labing maayo aron mosunod sa Ginoo, Siya mopanalangin nimo og kalig-on sa pagpangita og mga paagi sa pagbayaw sa pamilya nga anaa nimo karon ug sa imong pamilya sa umaabot. Siya motabang nimo nga molambo paingon sa mahimayaong posibilidad nga sa usa ka adlaw magpuyo nga malipayon uban sa mga minahal ug uban Kaniya ug sa atong Langitnong Amahan hangtod sa kahangtoran.