Idugang ang Inyong Kahayag
Ang matag tipik sa kahayag nga inyong idugang niini nga Kapaskohan makahimo sa kalibotan nga mas hayag.
Mga Paghulagway hinimo ni Gabriele Cracolici
Ang matag dos anyos nga bata (uban sa matag iring sa balay) nahibalo nga ang gasa sulod sa karton dili kaayo makapahinam kaysa karton mismo. Ang mga karton nagdala og walay kinutoban nga mga posibilidad! Usa ba kini ka makina sa panahon? Presentasyon sa mga proyekto sa siyensiya nga nagpadayon pa? Usa ka seksiyon sa agianan nga langob?
Pinaagi sa tabang sa dinasig nga grupo sa batan-ong ma babaye sa Oregon, USA, ang usa ka karton sa refrigerator nakahimo sa labing maayo nga mahimo niini: nakatabang kini sa pagpahitabo og mga milagro sa tibuok kapanahonan sa Pasko.
Usa ka Karton, Daghang Milagro
Dihang ang organisasyon sa Young Women gitahasan sa pagdumala sa ilang Christmas party sa ward, dali silang nakahukom nga magpahigayon og Light the World [Dan-agi ang Kalibotan] nga tema. Ang unang giving machine [tighatag nga makina] diha na sa ilang dapit sa milabay nga tuig. “Naghunahuna ko nga nindot kaayo nga makaserbisyo sa ingon ka simple ug sayon nga paagi,” miingon si Kisiah H., usa sa mga batan-ong babaye.
Mao nga ang mga batan-ong babaye ganahan nga maghimo og ilang kaugalingong giving machine [tighatag nga makina] alang sa ilang ward ug stake. Ang usa nila, si Rita P., mitanyag nga motabang sa paghimo niini. Ang machine adunay sulod nga “mga kahigayonan sa pagserbisyo nga mahimo ni bisan kinsa, bisan pila ang ilang edad,” miingon si Rita. Naglakip kini sa mga serbisyo sama sa “Pagluto og pagkaon,” “Pag-ampo alang sa tawo nga nanginahanglan,” o “Pagpanaygon.”
Salamat sa presidente sa Young Women nga bag-ohay lang nagpalit og refrigerator, may perpekto sila nga karton nga puston og pula nga papel ug tape. Dayon gidugangan nila og mga sticker nga may nakasulat nga mga oportunidad sa pagserbisyo ug mibutang og gagmay nga mga business card nga pweding dad-on sa mga tawo. Kon makompleto na sa tawo ang iyang buluhaton, mahimo niyang ibitay ang gamay nga business card isip adorno sa Christmas tree sa ward.
“Nindot kaayong tan-awon ang christmas tree nga napuno samtang nagdagan ang oras.” miingon si Kisiah.
Human sa ward party, giganahan ang mga tawo nga gamiton ang giving machine sa Light the World nga kalihokan sa Stake. Ug mao nga nagpadayon ang pagsabwag sa kahayag. “Dunay usa nga miingon nga ganahan unta sila nga ang matag ward sa stake aduna niini,” miingon si Kisiah.
Usa ka gamay nga ideya, dako nga karton, ug makugihong paningkamot nakagiya ngadto sa mas hayag nga Pasko para sa tanan.
Si Kisiah nalingaw usab sa giving machine! Ang iyang pamilya mipili nga “Manaygon” isip usa ka proyekto sa pagserbisyo. Gisugdan nila pinaagi sa pagbisita og pipila ka miyambro sa ward. Dayon, samtang nakita nila ang mapasalamatong mga luha ug dagkong mga pahiyom sa ilang gibisitahan, ang pamilya ni Kisiah nagsige lang og desider nga mobisita pa og usa na lang gyod ka balay. Ug dayon lain na usab. “Ganahan mi nga mosuroy sa tibuok gabii, apan among gihunong kay nagkinahanglan og katulog ang mga tawo!” miingon siya.
Dili mo kinahanglan nga magpalabi og paningkamot aron makahimo og kalainan niini nga Pasko, siyempre. “Dili kinahanglan nga dako ang serbisyo,” mipasabot si Rita. “Paghimo og gamay nga butang, ug magdala kini sa kalipay sa Pasko. Tutoki ang uban, dili ang imong kaugalingon.”
Si Rita (sa wala) ug si Kisiah (sa tuo) mapasalamaton nga nakakita kon pila ka tawo ang naggamit ug ganahan sa giving machine.
Ikaw + Dinasig nga Paningkamot = Kahayag
Siyempre, wala mo magkinahanglan og giving machine—hinimo man sa balay o dili—aron pahayagon ang Pasko sa laing tawo. Among gipangutana ang mga kabatan-onan sa tibuok kalibotan kon unsa ang ilang gustong paagi sa Pagdan-ag sa Kalibotan panahon sa Kapaskohan ug nakadawat mi og lainlaing mga tubag. Ang uban nagpakigbahin og musika ug ang uban makadasig nga mga mensahe sa online. Ang uban nanghatag og mga pahalipay o nagsulat og mabination nga mugbong mga sulat. Sa gihapon, ang uban nagserbisyo sa templo o nagbisita og mga tawo.
Si Emalyn, 16 anyos nga batan-ong babaye, mihulagway og paborito nga tradisyon nga iyang gibuhat sukad pa niadtong 7 anyos pa siya. “Miapil ko sa buhi nga pasundayag sa Talan-awon sa Pagkatawo ni Jesus gikan sa Thanksgiving ngadto sa Pasko,” miingon siya. Dili usab kini simple lang nga tigom sa mga managsoon nga magsul-ob og mga kupo, hunahunaa lang! Usa kini ka libre nga halad sa komunidad nga nagpadayon sulod sa daghang mga katuigan.
Si Emalyn mipasundayag isip tigsaysay sa usa ka buhi nga pasundayag sa talan-awon sa pagkatawo ni Jesus nga nakapanalangin og liboan matag Pasko.
Ania ang tipikal nga adlaw sa pasundayag: Si Emalyn nagsugod sa alas 9 a.m. uban sa iyang inahan ug sa unang tig-organisar. Naggahin sila og unom ka oras sa paghimo og 500 ka donat alang sa mga bisita nianang gabhiona, ug dayon nagsul-ob si Emalyn og costume aron maoy tigsaysay. Ang buhing pasundayag sa Talan-awon sa Pagkatawo ni Jesus nagtanyag og mga talan-awon, mga suga, mga hayop para sa pasongan, 20-30 ka magdudula, ug 15 minutos nga pasundayag nga makita sa liboan ka tawo matag tuig.
“Kusog kaayo ang Espiritu kon magpasundayag mi,” miingon siya. “Sa miaging tuig may batang lalaki nga sukad wala pa nako mahimamat miduol nako ug migakos nako ug miingon, ‘Kini gyod ang akong gikinahanglan!’”
Matag adlaw man kini nga kasinatian o dili, sama sa paghatag og pahalipay ngadto sa silingan o talagsaong butang sama sa pagtan-aw sa usa ka higala nga mipili nga magpabunyag, ang matag usa nga buhat nga makapaambit sa kahayag sa Langitnong Amahan ug ni Jesukristo makahimo sa kalibotan nga mas mahayag nga dapit. Ang maong kahayag mabatyagan, dili kay makita lang.
Ang Kapaskohan segurado gayod nga daghang buluhaton—tingali labihan gayod ka daghang buluhaton kon dili kita magmatngon. Apan sa gamay nga pag-atiman, makakaplag kita og igong panahon aron makahimo og kalainan. Si Elder Patrick Kearon sa Napulog Duha ka Apostoles nagpahinumdom kanato, “Samtang magkaduol kini nga Pasko, dugangan nato ang pagbuhat sa mga importante ug minosan ang dili kaayo importante.”
Kinsa ang nagkinahanglan og mas dugang kahayag sa inyong palibot karon?