Unsa ang akong mahimo kon nagsagubang ako og kabalaka o depresyon?

Sa miaging duha ka tuig, nanglimbasog ko sa kabalaka ug depresyon tungod sa kadaghan sa mga kausaban nga nahitabo sa akong kinabuhi tanan sa usa ka higayon: mibalhin ko, ang akong mga apohan mibalhin, ug ang akong uyoan namatay sa pancreatic cancer, tanan samtang ang akong lola gitambalan sa kanser sa totoy. Ang pagsugod sa middle school naghatag usab nako og daghang kabalaka. Bag-o kadto nga lugar uban sa bag-o nga mga tawo ug mga kasinatian, ug nabug-atan kaayo ko.

Atol niining panahona, mura kog switch sa suga nga gipalong ug wala nay nahibiling paglaom. Misugod ko sa pagbaton og mga pag-ataki sa kahadlok kada adlaw ug wala mahibalo kon unsay buhaton.

Dayon akong naamgohan nga adunay usa ka mahigugmaong Manluluwas nga motabang nako. Mao nga miduol ko sa akong Langitnong Amahan pinaagi sa pag-ampo ug nagbasa mahitungod ni Jesukristo diha sa mga kasulatan. Misugod ko sa pakigkita og usa ka therapist, ug nadawat ang akong patriyarkal nga panalangin.

Bisan kon kadto nga mga bulan lisod kaayo alang nako, daghan kaayo ko og nakat-onan. Karon kon pabalikon ko ug usbon ang bisan unsa nga butang aron mahimo kining mas sayon, dili nako buhaton.

Bag-ohay lang nahibaloan usab nako nga mobalhin na pod ko, ug akong naamgohan nga ang Langitnong Amahan miandam nako alang sa mga hagit sa umaabot.

Samtang ang akong relasyon ngadto sa Dios naglambo, ako nakabaton og dugang nga pagsalig sa pakigbisog sa mga hagit sa akong pangisip. Ako karon kanunay nga nagtan-aw sa akong Manluluwas. Siya ang akong kahupayan ug akong giya niining gubot nga kalibotan, ug Siya usab nganha kanimo.

Siya ang kahayag sa kalibotan. Siya moalsa sa imong mga palas-anon ug mohupay sa imong mga kasakit samtang maningkamot kamo nga mahimong sama Kaniya.