Mga Litrato pinaagi ni Ashlee Larsen

Lisod ang pagka-usa ka miyembro sa Ang Simbahan ni Jesukristo sa mga Santos sa Ulahing mga Adlaw dinhi sa Norway tungod kay gamay ra ang mga miyembro. Daghang mga tawo dili gayod relihiyoso. Ang uban adunay obserbasyon nga kon ikaw adunay kwarta, wala ka magkinahanglan og relihiyon. Duna koy daghang higala nga nagsugod sa pag-inom ug paggamit og mga drugas sa batan-ong edad. Kana, dayag lang, mopabati nako nga lahi sa uban. Apan ang Anak sa Dios mianhi sa yuta aron sa pagtabang nato ug pagpakita nato sa dalan nga subayon.

Si Jesukristo mao ang usa ka ehemplo alang nato, ug kita mao unta ang repleksyon Kaniya, naghimo sa mga butang nga Iyang buhaton. Naningkamot ko sa pagtabang sa mga tawo kutob sa akong mahimo. Naningkamot ko kanunay nga mobati ang mga tawo nga giabi-abi, ilabi na sa Simbahan. Naningkamot ko sa paglakip sa tanan. Ug nakita nako nga ang Langitnong Amaha ug si Jesukristo mipanalangin nako kanunay.

Nagtrabaho ko sa uma. Habasan nako ang nataran, motabang sa pag-atiman sa mga baka, mohimo og mga koral, modrayb sa mga traktor, mangibot og sagbot, ug motabang sa pag-ani. Sa tingpamulak, pul-ongan namo ang mga kahoy ug mananom. Sa tingtugnaw, magbugha kami og kahoy para sa sugnod.

Kon ako magbuhat og butang nga bag-o, dili ko gusto nga masayop kini. Sa unang higayon nga ako misakay sa usa ka traktor, medyo nahadlok ko nga modrayb niini tungod kay daghan kaayong mga butang ang mahimong masayop. Nagdrayb ko diha sa patatasan, nagbutang og yuta sa tanom nga patatas aron ang mga patatas dili magberde ug dili madaot. Apan ang pagdrayb diha sa patatasan mao usab ang sayon nga paagi sa pagpatay niini—sama kon ikaw moligis sa mga patatas o modaro niini. Sa wala pa ako magsugod, nag-ampo ko, ug maayo ra ang nahitabo.

Sa unang tuig nga nagtrabaho ko sa uma, nakig-ila-ila pa ako sa tanan. Maniudto mi kanunay kauban sa inahan ug amahan sa akong boss. Siya [inahan] ang moluto sa tanang pagkaon ug ang tanan moabot ug mokaon, ug modalit usab sila og kape. Nangutana sila nako, “Gusto ka ba og kape?” Miingon ko, “Dili,” ug nangutana sila, “Nganong dili?” Miingon ko, “Ah, tungod kay, sa akong Simbahan, dili kami moinom og kape.” Ug dayon nagsugod sila nga gusto pa nga makahibalo ug nangutana nako mahitungod niini. Wala sila makadungog mahitungod sa Simbahan. Mao nga ako adunay oportunidad sa pagsulti nila mahitungod sa unsay akong gituohan. Medyo makahadlok kadto nga higayon! Apan mas mitahod pa sila nako, maoy akong gihunahuna, human niana.