Ang Pagpasaylo Makaayo

Sa ikapito nga grado adunay usa ka bata nga midaog-daog nako. Nagpakatap siya og ngil-ad, dili tinuod nga mga istorya mahitungod nako ug mituo ang ubang tawo nga ako dili maayong tawo. Ang mga tawo dili mopaapil nako tungod sa mga tabi nga iyang gipakatap, ug gani ang pipila sa akong higala nagsugod sa pagtuo niini. Nakigsulti ko sa akong mga ginikanan ug sa akong mga magtutudlo mahitungod niini, apan nahadlok kaayo ko nga makigsulti ngadto sa maong bata mahitungod niini.

Atol sa ting-init, mikuyog ko sa kampo sa banda, ug kining bataa anaa sa samang grupo nako. Sa sinugdanan, naglagot ko nga nakauban ko siya pag-usab. Apan nakahukom ko nga makigsulti niya. Human sa ikaduha nga leksiyon, giingnan nako siya nga ang mga butang nga iyang gisulti mahitungod nako dili tinuod ug nangutana niya nganong nakasulti siya niini.

Nangayo siyag pasaylo ug misangpot nga mikompisal ngadto sa tanan diha sa eskwelahan nga ang mga istorya mga peke. Ug gipasaylo nako siya. Sa kampo sa banda, gidapit nako siya nga magdula og baraha uban nako atol sa among mga bakante, ug sa kataposan nahimo kaming mga higala.

Isip usa ka miyembro sa Ang Simbahan ni Jesukristo sa mga Santos sa Ulahing mga Adlaw, ang akong tumong mao nga mahimong tigpasiugda sa kalinaw. Naningkamot ko nga mahimong higala sa tanan. Ang akong papa mitudlo nako mahitungod sa pagpasaylo ug nga kon ikaw maghinulsol sa imong mga sala, ang Ginoo miingon nga Siya “dili na mahinumdom niini” (Doktrina ug mga Pakigsaad 58:42). Ang pagpasaylo makaayo og daghan.

Si Jesukristo mao ang labing maayong ehemplo. Siya hingpit. Nasayod ko nga kon ako mosunod Kaniya, makasulod ko sa celestial nga gingharian uban Kaniya ug sa Langitnong Amahan.